Inuussutissarsiutinut ikiorsiissutit Vittus Qujaukitsup aamma Jess Svanep saqqummiuppaatAssi: Maria Kuitsi Kristensen

Coronap ajornartorsiortitsinera: Inuussutissarsiutit milliardip affaanik ikiorserpaat

Naalakkersuisut Nunatsinni inuussutissarsiutinut ikiorsiissuteqarput. Millionilikkaanik aningaasaliiffigineqartut ilagaat aningaasarsiatigut annaasaqarneq

Corona-virus pissutigalugu inuiaqatigiit matugallarnerat inuillu amerlasuukkaarlutik katersuuteqqusaajunnaarnerat inuussutissarsiortut millionilikkaanik annaasaqaatigaat. Taamaammat Naalakkersuisut inuussutissarsiutinut ikiorsiissutaagallartunik aalajangersaapput landskarsimut koruunit milliardip affaa angullugu akeqarsinnaasunik.

Aningaasarsiatigut annaasanut 107 millioner koruunit immikkoortinneqarput.

Tusagassiortunik katersortitsinermi tamanna arfininngornermi saqqummiunneqarpoq.

AAMMA ATUARUK Misissukkat inerneri nutaat: Coronavirusimik tunillatsissimasut suli marluinnaapput

- Soraarsitsinerit pinngitsoorniarpagut. Taamaattumik sulisut angerlarallartinneqartu akissarsiassaraluisa 75 procent namminersorlutik oqartussat matussusissavaat, Jess Svane oqarpoq.

Inuussutissarsiutinut ikiorsiinissaq pillugu sulinermi inuussutissarsiutillit kattuffiat SIK aamma sulisitsisut peqatigiiffii GE aamma Nusuka peqataatinneqarput. Aalisartut piniartullu kattuffiat KNAPK aamma peqataatinneqarpoq.

Takornariaqarnermi akunnittarfiuteqarnermilu suliffiit 50 millioner koruuninik aningaasaliiffigineqarput. Aningaasaliissutit atorneqassapput soraarsitsinerit pinngitsoorniarlugit.

Nunami suliffiit assut eqqorneqarput

Inuussutissarsiutinut naliginnaasumik ikiorsiinissamut 100 millioner koruunit immikkoortinneqarput. Aningaasat taakku atorneqassapput nualluussuaq corona pissutigalugit suliffeqarfiit annaasaqaataannut.

AAMMA ATUARUK Coronavirusi Air Greenlandimut ilungersortitsisoq

Aalisartut aamma annaasaqarsinnaanerat piareersimaffigineqarpoq.

- Aalisarneq sorpassuarnik attuisarpoq aammalu namminersorlutik inuussutissarsiortut tassaallutik angallataatillit umiatsiaararsortullu. Aalisartut annaasaqarsinnaanerat KNAPK peqatigalugu misissussavarput, Jess Svane oqarpoq.

Akileraarutinut akitsuutinullu akiliinnissat aamma kinguartinneqarsinnaanerat periarfissiuunneqarpoq.

- Akileraarutini akitsuutinillu akiliutissat kinguartikkallarneqarsinnaanerat periarfissipparput coronamik ajornartorsiornerup nalaani suliffeqarfiit aningaasanik tigoriaannaataarussinnaanerat pinngitsoorniarlugu, Vittus Qujaukitsoq oqarpoq

- Nunami inuussutissarsiutit corona pissutigalugu ajornartorsiornermi eqqugaanerupput soorunami aamma aalisarneq eqqumaffigaarput inuussutissarsiut taanna nuna tamakkerlugu aningaasaqarniarnermut pingaaruteqarluinnarmat, aningaasaqarnermut naalakkersuisoq Vittus Qujaukitsoq oqarpoq, ilanngullugulu oqaatigaa aaqqiigallarneq aasap tungaanut atuutissasoq.

- Maanna ikiorsiinermi aningaasaliissutinut aningaasat sumiit pissarsiarineqarpat?

- Nutaamik aningaasaliisoqarpoq. Aningaasat nassaarineqarput aningaasaliissutaareersut nikisiternerisigut. Taamaasiornermi ilaatigut sanaartugassanut aningaasaliissutit kinguartikkallarneqarput, Vittus Qujaukitsoq nassuiaavoq.

Taassumali oqaatigisinnaanngilaa inuiaqatigiit unitsinneqarnerat qanoq sivisutigisumik aningaasaqarniarnikkut attanneqarsinnaanersoq.

- Tamanna ukiamut aatsaat takusinnaalissavarput, Vittus Qujaukitsoq oqarpoq, aammalu periarfissaanerarpaa pisariaqalissappat immikkut ittumik taarsigassarsiniarsinnaaneq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat