Coronavirusi Air Greenlandimut ilungersortitsisoq

- Covid-19-ip timmisartortitseqatigiiffit, Air Greenland taakkununnga ilaalluni, ilungersunartorsiortippai, Air Greenlandip attaveqaqatigiinnermut pisortaa, Masaana Egede KNR-imut allappoq.

Corornavirusip nunarsuarmi tuniluunnera pissutigalugu ikinnerusut timmisartortarmata timmisartuussinernillu taamaatitsisoqartarmat nunarsuarmi timmisartortitseqatigiiffiit ilungersorput.

Air Greenland taakkununnga ilaavoq.

- Air Greenlandip isertitassaraluanik annaasaqarnissaa maannalu annaasaqartalereertoq qularnanngilaq, Masaana Egede allappoq.

Aningaasalli qanoq amerlatigisut annaaneqarsimanersut annaaneqassasulluunniit maanna oqaatigissallugu siusippallaartoq taassuma ilanngullugu oqaatigaa.

AAMMA ATUARUK Oqartussat allannguipput: Nuummiit Danmarkiliarsinnaaneq ammaanneqarpoq

Air Greenlandi aningaasaateqarluarami piffissami isertitakiffiusumi ingerlagallarsinnaasoq, Egedep erseqqissaatigaa.

- Air Greenland suliffeqarfiuvoq ingerlalluartoq, aningaasaateqarluartorlu. Ukiuni kingullerni arlalinni angusaqarluarami coronavirus pillugu ajornartoorfiup sapinngisamik qaangernissaanut tunngaveqarpoq, attaveqaqatigiinnermut pisortaq oqarpoq.

Ilanngulluguli ima oqarpoq.

- Sivitsorujussuanngitsorli qaangiuttoq ilungersornerulissaaq.

Sulisut sulisoriinnarnissaat kissaatigigaat

Timmisartunut ilaasut coronavirusip tuniluunnerani ikinnerupput, tamannalu nunarsuarmi timmisartortitseqatigiiffinnut kinguneqareerpoq.

Skandinaviami SAS ingerlaannarnissani qulakkeerniarlugu naalagaaffinniit ikiorserneqarniarpoq. Timmisartortitseqatigiiffik ilungersortorujusuuvoq, sulisullu 10.000 angerlartiinnartariaqarsimallugit.

Air Greenlandimilu assingusumik pisoqannginnissaa sulissutigineqartoq, Masaana Egede allappoq.

- Suleqatitsinnik annaasaqannginnissarput, soraarsitsinnginnissarpullu kissaatigisupilussuuarput, Masaana Egede allappoq.

AAMMA ATUARUK Air Greenland: Billettit tamaasa utertissavagut

Aningaasanik isertitakinneruutigalutik sulisut qanoq sulisoriinnarnissaannut paasiniaanermi kattuffiit suleqatigineqartut, attaveqaqatigiinnermut pisortaq nassuiaavoq.

- Ilaatigut pinngitsaaliissummik sulinngiffeqartitsineq, qaangiuttoornermut taarsiullugu pinngitsaaliissummik sulinngiffeqartitsineq, akissarsianik kinguartitsineq akissarsianillu appaaneq, ullup ilaannaani sulisarnermut aaqqissuussat ajornanngippallu pisortat inuussutissarsiortunut ikiorsiissutissaannik sapinngisamik atorluaaneq misissuiffigineqarput. Tamanna sulisunut tamanut paasissutissiissutigineqareerpoq, Masaana Egede allappoq.

Coronavirusip timmisartortitseqatigiiffimmut piffissaq sivisunerusoq eqqarsaatigalugu kingunissai suussanersut oqaatigissallugu siusippallaartoq, Egede oqarpoq.

- Uku qanittukkut pisuupput, taamaammat sulinerput piviusumut nutaamut maanna naleqqussarpagut. Tamannalu ilutigalugu oqartussat upalungaarsimaneq pingaarutilerujussuaq, uagut peqataaffigisarput, pillugu oqaloqatigisaqattaarpagut, Masaana Egede allappoq.