Misissukkat inerneri nutaat: Coronavirusimik tunillatsissimasut suli marluinnaapput

Nunatsinni coronavirusimik tunillatsissimasut suli marluinnaapput.

Nakorsaaneq Henrik L. Hansen ullumi arfininngornermi tusagassiortunik katersortitsinermi taama nalunaaruteqarpoq.

- Nutaarsiassatsialaavoq. Misissuinerit 42-t akissutissarsipput. Amerlanerit Nuummeersuupput aamma sineriamminngaanneersoqarpoq. Tamarmik ajunngillat. Nuummi annertuumik tuniluuttoqanngilaq, Henrik L. Hansen oqarpoq.

Inuup allap coronavirusimik tunillatsissimananerata pingasunngornermi tusarliutigineqarnerata kingorna Nuuk pingasunngornermi nalunaaqutaq 16.00 matuvoq. Inuup taassuma sumi tunillatsissimanera ilisimaneqanngimmat oqartussat sakkortuumik iliuuseqarput.

- Peqqussutigineqartut malilluarneqarneratigut upperilluinnarpara, tuniluunneq annikinnerpaaffimmiitinneqarnera Henrik L. Hansen oqarpoq nangillunilu:

- Naatsorsuutigaarali maleruaqquneqartut malinneqaannassasut.

86-it suli akissutissarsineqanngitsut

Peqqinnissaqarfimmi oqartussani suleriutsit sapaatip akunnerata siuliani allanngortinneqarput, piffissamilu aggersumi coronavirusimut misissortittartussat suli amerliartuinnassallutik. Maannamut inuit 83-it misissortissimanerminnik akissutissarsisimalerput, taakkunanngalu marluk coronavirusimik tunillatsissimallutik.

- Arlalinnik misissugassanik tiguseqqinnikuuvugut. 86-it suli akissutissarsinngillat, taakkulu ulluni tulliuttuni akissutissarsineqarumaarput. Amerlanerpaallu Nuumminngaanneerput, Henrik L. Hansen oqarpoq.

Misissortinnerit nunatsinni suli akissutissarsineqarsinnaanngillat. Taamaammat misissuinerit Københavnimut Statens Serums Institutimut oqartussat nassiuttarpai tassanngaaniillu akissutissarsisarlutik.

Nakorsaanerup oqarnera naapertorlugu Danmarkimut assartuussiniarneq aamma eqqugaaqqavoq.

- Sinerissamiit assartuussiniarneq ajornartorsiorfigilaarparput. Tamannali tupaallaatissaanngilaq. Taakku misissugassatut nassiunneqartussat pillugit immikkut timmisartuussisoqarneq ajorpoq, taanna oqarpoq.

Coronavirusi pillugu napparsimmavimmut unitsitsisoqanngilaq

Nunatsinni coronavirusimik tunillatsittoq siullerpaaq ataasinngormat nalunaarutigineqarpoq. Taanna nunani allani angalanermini tunillatsippoq, nunatsinnullu tikinnerminiit angerlarsimatitaavoq.
- Pineqartoq anineq ajorpoq, Henrik L. Hansern oqarpoq.
Alla aamma tunillatsissimasoq paasineqarpoq, taannali sumi tunillatsissimanersoq ersarissumik oqartussanit nassuiaatissaqartinneqanngilaq.
- Napparsimmavimmi unitsitsisoqarnikuunngilaq. Marluinnaat tunillatsissimapput, taakkulu maleruagassat malillugit katsorsarneqarput, angerlarsimatiinnarneqarlutillu, nakorsaaneq oqarpoq.