Sulisitsisut: Ikiorsiissut suliffeqarfinnut ingerlanerliortunut amerlasuunut annaassissaaq
Ikiorsiissut suliffeqarfinnut ingerlanerliortunut amerlasuunut annaassissaaq sulisullu sulisoriinnarnissaannut periarfissiilluni. Sulisitsisut taama nalunaaruteqarput.
- Suliffeqarfiit amerlasuut coronavirus peqqutigalugu ikiorserneqaratik ingerlaqqissinnaanngillat. Sulisartut amerlasuut suliffitsik annaaratarsinnaagaat, Sulisitsisut oqarput.
Taamaattumik ikiorsissutissaq iluarisimaarpaat.
Coronavirusimik nunatsinni tunillatsissimasut marluupput. Nunatsinni illoqarfiit pingaarnersaanni Nuummi upalungaarsimaneq pingasunngornermi, marsip 18-iani nalunaaqutaq sisamanit sukannersinneqarpoq.
Annaasanut matussutissat
Ikiorsiiissut ilaatigut kaaviaartitsinermi annaasanut matussutissanik imaqarpoq aamma suliffeqarfinnut pisiniarfinnullu aningaasartuutinut aalajangersimasunut matussutissatut matunissamik pinngitsaalineqarnermik matugallarnissamik peqqussut peqqutigalugu kaaviaartitanilluunniit annertuumik annaasaqartunut. Soorlu hotelit, neriniartarfeqarfiit, takornariartitsisartut sullissisutulluunniit inuussutissarsiortut soorlu nujalerisut il.il.
Sulisitsisuni pisortaq, Brian Buus Pedersen taama allappoq.
AAMMA ATUARUK Coronap ajornartorsiortitsinera: Inuussutissarsiutit milliardip affaanik ikiorserpaat
Suliniutit suliffeqarfinnut nioqquteqarfinnullu coronavirusimit eqqorneqarsimasunut sunniuteqangaatsiassasut, Brian Buus Pedersen oqarpoq.
Oqaluttuarisaanermi pisoq aatsaat taamaattoq
- Oqaluttuarisaanermi pisoq aatsaat taamaattoq takuarput ikiorsissutillu iluaqutaangaatsiassapput. Maannakkut iliuuserisarput aalajangiisuusinnaavoq Kalaallit Nunaata coronavirus qaangiuppat qanoq inissisimanissaanut. Ikiorsiissut piffissami ilungersunartumi neriuuteqalersitsivoq, Brian Buus Pedersen oqarpoq nangillunilu:
- Politikkikkut iliuuseqartoqarsimanngikkaluarpat nunatta karsianut inuiaqatigiinnullu tamanut sunniuteqarnerlorujussuarsinnaavoq, Brian Buus Pedersen oqarpoq.
Ikiorsiissut pillugu uani paasisaqarnerusinnaavutit.
