Aningaasanut inatsisissaq: Naalakkersuisoq ataatsimiititaliamut utaqqisitsisoq
![](/sites/default/files/styles/image_934x467/public/article_images/hermanndone.png?itok=_t0mmPps)
Aningaasat taakkua Vittus Qujaukitsup aningasanut aappaagumut inatsisissatut siunnersuut saqqummiukkamiuk amigartoorutaassasut oqarpoq.
Amigartooruteqarnissamik saqqummiussineq coronap ilungersunartorsiortitsineranik peqquteqartoq, naalakkersuisoq siusinnerusukkut oqarpoq.
Aningaasaqarnermut akileraartarnermullu ataatsimiititaliap taama saqqummiussaqarneq isoreqaa, akuerinagulu.
AAMMA ATUARUK Vittus Qujaukitsoq: Aappaagu amigartooruteqarnissaq pinngitsoortinneqarsinnaanngilaq
Taamaammat naalakkersuisoq aappaagu missingersuutissaq oqimaaqatigiisissaguniuk sipaarniutissanik nassaartariaqarpoq.
Ataatsimiititaliarlu siunnersuummik nutaamik maanna suli utaqqivoq.
- Allaanerusumik suli isumminngilagut. Taamaammat kisitsisit allallu takkuttussat qanoq isikkoqarnerisa allamik isummissanersugut takutikkumaarpaa, ataatsimiititaliap siulittaasua, Hermann Berthelsen KNR-imut oqarpoq.
Ataatsimiititaliaq isumaliutissiissusiornissaminut ima kinguaattooqatigaaq, siunnersuut Inatsisartuni aappassaaneerlugu suliarinissaanut suli naammassinagu.
- Isumaqarpugut ingerlariaqqilerutta Naalakkersuisut akissutaat tamaasa pereerutsigit aatsaat ingerlariaqqissinnaasugut, Hermann Berthelsen oqarpoq, nangillunilu:
- Ataasinngorpat ulloqeqqartinnagu tigunissaat piumasarisimavarput.
AAMMA ATUARUK Aningaasanut inatsisissap suliarineqarnera kinguaattoorpoq: Piffissamik pisariaqartitsivugut
Kinguaattoorneq inatsimmik eqquutitsinerunngilaq. Aningaasanummi inatsisissaq ukiup tullianoortoq inatsit malillugu novembarip 15-anni piareereersimasussaavoq.
Taamaammat Naalakkersuisut immikkut inatsisiliornissamik siunnersuuteqarput, Inatsisartut tamarmiusut sisamanngornermi akuerisaannik.
Inatsisartut siunnersuut taamaalilluni novembarip 27-ani naammassillugu suliarisinnaanngorpaat.
Aningaasanut inatsisissaq piffissaq eqqorlugu kingullermik 2013-imi akuersissutigineqarpoq.