Aningaasanut inatsisissap suliarineqarnera kinguaattoorpoq: Piffissamik pisariaqartitsivugut
Aningaasanut inatsisissatut siunnersuutip Inatsisartuni aappassaaneerneqarnissaa ullulernagu kinguartinneqarpoq.
Aningaasanut ataatsimiititaliap siunnersuummik suli suliarinnginnerat pissutaasoq, Aningaasaqarnermut akileraartarnermullu ataatsimiititaliap siulittaasua, Hermann Berthelsen (Siumut) oqarpoq. Taamaammat kinguartitsisoqarnissaa ataatsimiititaliamit piumasarineqarpoq.
- Aappassaaneernissaanut qaqugu piariissanerluta oqaatigisinnaanngilara, Inatsisartut aningaasaqarnermut akileraartarnermullu ataatsimiititaliaanni siulittaasoq, Hermann Berthelsen KNR-imut oqarpoq.
Inatsisartut Naalakkersuisut aningaasanut inatsisissatut siunnersuutaat septembarip ulluisa 30-anni siullermeerpaat.
Taanna Aningaasanut Akileraartarnermullu Ataatsimiititaliamut suliarineqarnissamut sukkasuumik innersuussutigineqarpoq.
Inatsisissatut siunnersuut inatsimmik saqqummiussineruvoq, taannalu akuerineqartigani Inatsisartuni pingajussaaneerneqarluni suliarineqaqqaassaaq.
- Ataatsimiititaliami suliassagut suli naammassinnginnatsigit aappassaaneerinninnissamullu piffissaliussaq eqqorlugu naammassisinnaannginnatsigit pingajussaaneerneqarnissaata novembarip 25-anut kinguartinneqarnissaa Inatsisartut siulittaasoqarfianut qinnutigaarput, tassa tassannga peqquteqarpoq, Hermann Berthelsen oqarpoq.
Ulloq taanna ukiakkut ataatsimiinnissami kingulliuvoq.
AAMMA ATUARUK Naalakkersuisut skal finde 175 millioner kroner i finanslov
Aningaasaqarnermut naalakkersuisup, Vittus Qujaukitsup aningaasanut inatsisissatut siunnersuut aggustip ulluisa 31-anni saqqummiuppaa.
Aappaagumut 183,3 millionit koruuninik amigartooruteqarnissaq saqqummiunneqarpoq. Partiilli tamarmik tamanna isumatsiaanngissoraat - kinguaattoornerli tassunga attuumassuteqanngilaq.
- Aningaasaqarnermut ataatsimiititaliami isumaqatigiinngittoqarneranik pissuteqanngilaq. Suliap torersumik isumagineqarnissaa pineqanngilaq. Kinguartoortoqarnera soorunami uggornarpoq - tamannali akuerisariaqarparput.
Aappaagumut aningaasanut inatsisissaq novembarip ulluisa 15-iat sioqqullugu Inatsisartunit akuersissutigineqartussaagaluarpoq.
Tamanna Inatsisartut missingersuutit pillugit inatsit eqquutsitsisinnaajunnaarnerannik kinguneqarpoq. Tassanili aapaagumut aningaasanut inatsisissatut siunnersuut novembarip ulluisa 15-iat sioqqullugu akuersissutigineqartussaq allassimagaluarpoq.
Inatsisartut 2017-mi aningaasanut inatsisissaq suliarigamikku aamma kinguaattoorput. Taamani kinguaattoornermut atatillugu immikkut inatsisiliortariaqarput.