Aningaasanut inatsisissatut siunnersuut 180,7 millioninit amigartoorfiusoq

Naalakkersuisut siunnersuusioqqaaramik aappaagumut 183,2 millionit koruuninik amigartoornissaq saqqummiuppaat, aappassaaneerinninnissamulli maanna 180,7 millionit koruuninik suli amigartooqqapput. Ataatsimiititaliarlu suli akuersinngilaq.
Ataatsimiititaliap siulittaasuata, Múte Bourup Egedep ukiuni missingersuusiorfiusuni sisamani oqimaaqatigiisitsineq ataatsimiititaliap suli piumasaringaa KNR-imut oqarpoq. Assi © : KNR / Malik Brøns
Allattoq Andreas Wille, Anders Dall
novembarip 20-at 2020 05:30

Nualluut corona nunatta karsianut ukioq manna 500 millionit kooruninik akeqassasoq, Aningaasaqarnermut Siunnersuisoqatigiit siusinnerusukkut ilimasaarutigaat.

Tamannalu peqqutigalugu aningaasanut ukiuni tulliuttuni inatsisiliornissaq Naalakkersuisunut oqimaaqatigiisikkuminaattoq, aningaasaqarnermut naalakkersuisoq, Vittus Qujaukitsoq KNR-imut siusinnerusukkut oqarpoq.

AAMMA ATUARUK Naalakkersuisoq: Vi går alligevel efter underskud på næste års finanslov

Aningaasanut aappaagumut inatsisissatut siunnersuut 180 millionit koruuninik amigartoorfiusoq Inatsisartut aningaasaqarnermut akileraartarnermullu ataatsimiititaliaata isumaqatigiittup aappassaaneernerani akuerineqarnissaa innersuussutigaa.

Aningaasaqarnermulli naalakkersuisup aappassaaneerinninnissamut ukiuni missingersuusiorfiusuni tulliuttuni sisamani 165 millionit koruuninik amigartoornissaq naatsorsuutigaa.

Suli iluarineqanngitsoq

Inatsisissalli pingajussaaneernissaanut, ukiunut missingersuusiorfinnut tullernut sisamanut inatsit oqimaaqatigiittuunissaa ataatsimiititaliap suli piumasaraa.

- Tassa taanna piumasaq anguniarlugu sulivugut, aamma pingajussaaneerinninnissamut Naalakkersuisut aammalu ataatsimiitialiaq partiillu akunnerminni tassunga anguniakkamut qanillattornissaq suliarissagaat naatsorsuutigivarput,

Aningaasaqarnermut Akileraartarnermullu ataatsimiititaliap siulittaasuata tullia, Múte Bourup Egede KNR-imut taama oqarpoq.

AAMMA ATUARUK Aningaasanut inatsisissaq: Naalakkersuisoq ataatsimiititaliamut utaqqisitsisoq

Aningaasaqarnermut naalakkersuisup, Vittus Qujaukitsup, ukiuni missingersuusiorfiusuni tullerni sisamani 139 millionit koruuninik amigartoornissaq pingajussaaneerinnissamut saqqummiutissallugu naatsorsuutigaa.

Taamaassappalli Inatsisartut aningaasaqarnermut akileraartarnermullu ataatsimiititaliaata amigartooruteqannginnissamik piumasaa Naalakkersuisut naammassissanngilaat.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk