KNI-p pisortaanera quersuarmiittuutit pillugit mamianartuliamut ajuusaarpoq
Ajuusaarnarpoq.
Namminersorlutik Oqartussat ingerlatseqatigiiffiutaata KNI-p 2013-imiit pisortaanera, Peter Grønvold Samuelsen quersuarmiittutinut mamianartuliaq pillugu taama naliliivoq.
KNI quersuarmiittuutiminik ukiuni arlalinni nalitunaarisarpoq.
- Taanna ajuusaarnarpoq. Tamatta takunngitsoorsimavarput aamma illup avataani kukkunersiuisutta arajutsisimavaa. Kisianni ukiup affaanut naatsorsuutini maannakkut saqqummerpoq iluarsineqarlunilu, taavalu aamma taamatut pisoqaqqinnginnissaa iliuuseqarfigineqareerluni, Peter Grønvold Samuelsen KNR-imut oqarpoq.
AAMMA ATUARUK Kim Kielsen KNI pillugu kusanaatsuliamut akuliukkumanngikkallarpoq
Tamanna ingerlatseqatigiiffiup nammineq aningaasaataasa 50 millionit koruuninik ikilineranik kinguneqartoq, KNI-p ukiup affaanut naatsorsuutaani tallimanngormat saqqummertumi allaqqavoq. Taamaalilluni ingerlatseqatigiiffik 50 millionit koruuninik annaasaqarpoq. KNI-li 1,3 milliardit koruunit naliginut nammineq pigisaqarpoq.
Pisuunnginnerartoq
Peter Grønvold Samuelsen ingerlatseqatigiiffimmut ukiuni arfineq marlunni akisussaasuuvoq. Taassuma, aqutsisut KNI-illuuunniit kukkunersiuisuisa illup avataaniittut millionilikkaanik kukkuneq arajutsisimavaat.
- Illit nammineq suliamut tunngasumut suliatit qanoq nalilerpigit?
- Taanna maannakkut oqaaseqarfigissanngilara, politiit suliamut tunngasumik misissuinerat pissutigalugu., Peter Grønvold Samuelsen nassuiaavoq.
- KNI quersuarmiittuutiminnik nalunaarsuinermini naatsorsuinerminilu ukiuni qulini kukkujuartarsimavoq.
- Tassa imaappoq: 2010-miit ukiuni pingasuni quersuaarmiittutit naleqassusaat 70 millionit koruuninik amerlavallaagaapput, ukiunilu kingullerni arfineq marlunni 50 millionit koruuninik amerlavallaagaalutik.
- Kukkuneq KNI-p naatsorsueriaasianut nalunaarsuineranit allaaveqarpoq, kikkulli kukkuluttorsimanersut KNI-p oqaatigisinnaanngilaa.
- Tamanna suliffeqarfiup nammineq pigisaata 50 millionit koruuninik ukiup qiteqqunnerani decembarimi naatsorsuusiornermi ikilineqarnerannik kinguneqassaaq.
- Kukkuneq suliffeqarfiup aningaasaqarneranut, tamatumani ingerlatsinermi angusaanut, KNI-meersut oqarnerat naapertorlugit sunniuteqangaarnavianngilaq.
KNI peqquserlunneraaneq pillugu politiinut nalunaarutigineqarsimanera taassuma innersuussutigaaa.
Ingerlatseqatigiiffimmi siusinnerusukkut kukkunersiuinermut pisortaallunilu siunnersortaasup, Hans Peter Lynge-Larsenip, Peter Grønvold Samuelsen peqquserluttuliornermi akisussaasutut aviisimi Sermitsiami allaaserisani arlalinni unnerluutigaa.
AAMMA ATUARUK Quersuarmiittuutit naatsorsorneri kukkuneqarujussuartut: KNI-p siulittaasuata qullersat pisuunnginnerarai
Pisortaanerulli unnerluussineq oqaaseqarfigiumanngilaa.
- Pisuutinneqarneq taamaattoq nikarnarsaanermillu annertuumik aallaaveqartoq oqaaseqarfigissanngilara, politiit misissuinerat ingerlatillugu, Peter Grønvold Samuelsen oqarpoq.
Nalunaarusiaq isertuukkaat
KNI-imi aqutsisut siulersuisullu suliaq tamanut novembarimi saqqummiunneqarmmalli pisuussuteqannginerarput. KNI-imi siulersuisuni siulittaasup Lars Borris Pedersenip, misissuineq KNI-p taassumalu ukiorpassuarni kukkunersiuisuisa Deloittep suliarisaa innersuuppaa.
AAMMA ATUARUK KNI-mi quersuarmiittuutit naatsorsorneri 2008-mili kukkuneqartut
Ingerlatseqatigiiffiulli misissuinermit nalunaarusiaq tamanut saqqummiunnikuunngilaa. Saqqummiussinnginneq sumik peqquteqarnersoq pisortaaneq aperaarput, Peter Grønvold Samulesenilli siulersuisut siulittaasuat Lars Borris Pedersen innersuuppaa.
KNR-ip misissuineq sooq saqqummiunneqannginnersoq Lars Borris Pedersen aperiumagaluarpaa, taannali tamatuminnga apersorneqarusunngilaq.
Kukkunersiuisut PwC-meersut suliaq misissorneqareersoq misissoqqissavaat.
