KNI-mi sulisuusimasoq: Tununninngaanniit ivianngikkut attuuavaanga

Karen KNI-mi sulileqqaarami paquminartumik oqaluttoqarsinnaaneranik eqqumaffiginnissasoq oqqarfigineqarsimavoq.

Tamannali ikasarnerinnaasoq suleqatiminit oqarfigitissimavoq.

- Sulileqqaalerama oqarfigitippunga qullersap sukangasinnaanera, sukangarujussuartarnera qanoq igissaneriga. Qanoq qisuariarttassanersunga.

- Taava taamanikkut takorluunnginnakku qanoq taama annertutigissasoq, ajunngilaq, sapinngilara. Imminummi tuniniarama suliffissamut.

AAMMA ATUARUK KNI-mi pisortaq: Killissamik qaangiisimaguma utoqqatserujussuarpunga

Karen arnap atigivinngilaa, KNR-illi taanna atiliussaraa. Arnaq kinaassutsiminik isertuusserusuppoq, KNR-illi taassuma aqqa kinaaneralu ilisimavaa.

Taassuma atini saqqummiunneqassappat isumannaassuseqarnissani ernumagaa, taamaammallu kinaassutsiminik isertuusserusunnera KNR-imit akuerineqarpoq.

Karen KNI-p qullersaqarfiani sulisuusimavoq, taannali 2019-imi soraarpoq.

Taassuma arnat allat sisamat KNI-imi sulisut sulisimasulluunniit peqatigalugit maanna pisortaasimasoq kannguttaatsuliortutut politiinut unnerluutiginiarlugu aalajangerpaat.

Tamanna Peter Grønvold Samuelsenip suliffeqarfimmi atuuffimminit soraarniuteqarnerata ippassaq saqqummersinneqarnerani saqqummiunneqarpoq.

Karenip misigisimasai KNI-p Sisimiuni qullersaqarfiani 2019-imi pisimapput.

Torsuusami trillebørertuusaarneq

Karenip Namminersorlutik Oqartussat pigisaani sulilerneranit sapaatit akunneri marluk qaangiutiinnartut killissani qaangerneqartut misigisimavoq. Tamannalu suliffimmi sulilernerani eqqumaffigisassatut oqaatigineqarsimasunut timitaliivoq.

Taassuma pisortaq torsuusami ullut ilaanni naapippai, taassuma Karenip aappanilu trillebørertarnikuusimasut aperaa. Karenip apeqqut paatsuunganartillugu qanoq isumaqarluni taava aperinersoq aperaa?

Karenip kiinnamikkut imminnut qanittuararsuullutik pisortallu talimigut tigummigaani eqquumaniarpaa.

- Uanga assakka natermut tutseriarlugit illuttut, nissukka aapparma tigummillugit uteqattaartillugit, ussersorluni, Karen oqaluttuarpoq.

- Nalunarnermut qanoq qisuariassanerlunga. Siullermik imatut eqqarsaannarpunga ”ah, ikasartoruna”, oqarfigitereerpunga ikasartartoq.

Ullulli ingerlanerini ikasarneri sakkortusiartortutut misigisimavai.

- Taava ilaatigut attortalerpaanga, Karen oqarpoq.

Ullaat ilaanni suliartorami pisrtaq aggerluni tunuatigut tigullugu iviangii inussamini attorpai.

- Taava tunummut qiviarama tupallunga iluaagalugu. Taava oqarfigivaanga ”aah, isumaqalunga taanna”.

AAMMA ATUARUK KNI-mi pisortaanikoq kannguttaatsuliorsimasutut politiinut unnerluutigineqartoq

Illarsimasorlu, Karen oqarpoq, taassumalu kanngusuummersimanini eqqaamavaa.

- Taava iluaagalugu soorunalimi oqarfigivara. Nuannarinagu taamaaliortoq. Illaatigiinnarpaanga, KNI-mi sulisuusimasoq oqarpoq, taassumalu inuk paarlaassissutigineqarnerarnerartoq assiginnginnamiuk tamanna eqqumiigalugu.

Karen suliffeqarfiup sulisoqarnermut sulisunullu immikkoortortaqarfianukarpoq. Taassumali oqarnera naapertorlugu iluaqutaavallaanngilaq:

- Oqarfigineqaannarpunga KNI-mi sulisut nukittuujusariaqarput. Akuerinngikkukku nuannarinngikkukku suliffiga sooq suliffigineriga.

Arnat qassiiusut assingusumik oqaluttuartut

KNR-ip arnat qassiiusut assingusumik nalaataqarsimasut oqaloqatigai. Taakkuli pisimasut pillugit saqqummiusserusunngillat, taakkumi suliaq siunissaminnut ajoqutiginialeqigamikku ernumassutigaat.

Peter Grønvold Samuelsenip arnat misigisimasaat qanoq oqaaseqarfigisinnaanerai apeqquteqarfigaarput. Taassumali KNR-imit SMS-ikkut allannerit sianenerillu akissuteqarfiginngilai, mailikkulli allappoq:

- Ajuusaarlungalu utoqqatserpunga kimulluunniit killissaanik qaangiillunga innimiilliorfiginnissimassaguma pissusilersornikkut oqaatigisimasakkulluunniit. Unnerluutigineqartulli uku eqqunngimmata ilisarisinnaanagillu akuerisinnaanngilakka.

- Suliaq politiinut unnerluutigineqarnikuummat annerusumik oqaaseqarsinnaanngilanga, Peter Grønvold Samuelsen allappoq.

AAMMA ATUARUK KNI-mi millioninik kukkusoqarnera: Quersuarmiittuutit kukkusumik nalilerneri angusanut sunniuteqartoq

KNR-ip tamatuma saniatigut KNI-p siulersuisuinut siulittaasoq, Lars Borris Pedersen suliamut tunngatillugu oqaaseqartinniarsarigaluarpaa, taannali KNR-imik oqaloqateqarusunngilaq.

KNI-p sulisoqarnermut sulisunullu immikkoortortaqarfiata KNR-ip saaffiginnissutaa akissuteqarfigagalugu suliffeqarfiup sulisoqarnermut politikkia kinguaassiutitigullu kannguttaatsuliornermut tungnatillugu malittarisassat innersuussutigai ”suliallu inummut tunngassuteqartut” oqaaseqarfiginissai itigartitsissutigalugit.