Peter Grønvold Air Greenland siulersuisuinit aamma tunuartoq
Peter Grønvold Samuelsen ullut marluk qaangiuppata KNI-mi pisortaajunnaassaaq - taannalu Air Greenlandip siulersuisuinit maanna aamma tunuarpoq.
Tamanna Air Greenlandip tusagassiuutinut nalunaarummi paasissutissiissutigaa.
Timmisartuutileqatigiiffiup oqarnera naapertorlugu Peter Grønvold Samuelsenip siulersuisuni siorna novembarimili ilaasortaaffigisaminit tunuarnissani ippassaq nalunaarutigaa.
Peter Grønvold Samuelsenip tusagassiutitigut maannakkut sammineqarnini Air Greenlandimut sunniuteqannginnissaanik kissaateqarnini tunuarniarnerminut peqqutaanerarpaa
- Piitap aalajangernera aammalu aalajangernerminut tunngavigisaa ataqqivarput. Siulersuisuni suleqatigilluarneranut qujavugut, siulersuisunut siulittaasoq Bodil Marie Damgaard oqarpoq.
Kannguttaatsuliorfiginninnerit quersuarmilu kukkusumik naliliineq
Peter Grønvold Samuelsen pillugu maanna pisoqangaatsiarpoq.
Arnat qassiiusut KNI-mut atassuteqartut Peter Grønvold Samuelsen kannguttaatsuliorsimasutut unnerluutigaat.
- KNI quersuarmiittuutiminnik nalunaarsuinermini naatsorsuinerminilu ukiuni qulini kukkujuartarsimavoq.
- Tassa imaappoq: 2010-miit ukiuni pingasuni quersuaarmiittutit naleqassusaat 70 millionit koruuninik amerlavallaagaapput, ukiunilu kingullerni arfineq marlunni 50 millionit koruuninik amerlavallaagaalutik.
- Kukkuneq KNI-p naatsorsueriaasianut nalunaarsuineranit allaaveqarpoq, kikkulli kukkuluttorsimanersut KNI-p oqaatigisinnaanngilaa.
- Tamanna suliffeqarfiup nammineq pigisaata 50 millionit koruuninik ukiup qiteqqunnerani decembarimi naatsorsuusiornermi ikilineqarnerannik kinguneqassaaq.
- Kukkuneq suliffeqarfiup aningaasaqarneranut, tamatumani ingerlatsinermi angusaanut, KNI-meersut oqarnerat naapertorlugit sunniuteqangaarnavianngilaq
Arnat taakku KNR-miit attavigineqarlutillu politiinut unnerluutiginnissimanermut uppernarsaataat takuneqarput. Tassani KNI-p qullersaqarfiani sulinermullu atatillugu angalanermi ilaatigut 2016-mi kannguttaatsuliorsimanerit pisimapput.
Taanna KNI-mi ukiut arfineq-pingasungajaat pisortaavoq. Taannalu sisamanngorpat maanna soraartussanngorpoq.
Arnat unnerluutiginninnerat Peter Grønvoldip soraarneranut pissutaavinnersut ilisimanngilarput.
KNI-mi suliami allami ukiaq aamma eqqissiviilliortoqarpoq, tassanilu Peter Grønvold Samuelsen politiinut aamma unnerluutigineqarluni.
Ingerlatseqatigiiffiup nammineq aningaasaataasa 50 millionit koruuninik ikilineranik kinguneqartoq, KNI-p ukiup affaanut naatsorsuutaani tallimanngormat saqqummertumi allaqqavoq. Taamaalilluni ingerlatseqatigiiffik 50 millionit koruuninik annaasaqarpoq.
Peter Grønvold Samuelsen ingerlatseqatigiiffimmut ukiuni arfineq marlunni akisussaasuuvoq. Taassuma, aqutsisut KNI-illuuunniit kukkunersiuisuisa illup avataaniittut millionilikkaanik kukkuneq arajutsisimavaat.
Ukioq kingulleq novemberimi suliaq aallartimmalli tassunga tunngatillugu KNI-mi pisortat siulersuisullu pinngitsuunerarput.
Namminersorlutik Oqartussat siulersuisunut ilaasortamik nutaamik Air Greenlandip immikkut ittumik maajip ulluisa 18-ianni ataatsimeersuarnerani toqqaassapput.
