KNI pisortartaartoq
Peter Grønvold Samuelsen perulluliortitsereersorlu KNI A/S-mi siulersuisuunerit pisortassamik atorfinititsipput.
Jeppe Jenseniussaaq, taannalu Mittarfeqarfinni allaffisoornikkut pisortatut atorfeqarnikuulluni.
- KNI-p siulersuisuniit assut iluarisimaarparput inuk eqqortoq KNI-mut naleqqulluinnartoq siunissamilu KNI-p qanoq ineriartortinneqarnissaanut suliaqarsinnaasoq atorfinitsissinnaanngoratsigu”, siulersuisut siulittaasuat Lars Borris Pedersen oqarpoq.
KNI-mi pisortaaninngortussaq Ilulissani inunngorpoq peroriartorlunilu kingusinnerusukkullu Nuummut nuussimalluni, ullumikkullu ilaquttanilu Nuummi najugaqarlutik. Jeppe Jensen Aarhusimi Handelshøjskolemi cand.merc.-itut nunarsuaq tamakkerlugu niuernerup iluani ilinniagaqarpoq.
AAMMA ATUARUK KNI-mi pisortaq: Killissamik qaangiisimaguma utoqqatserujussuarpunga
- Jeppe Nunatsinneersuuvoq aqutsisutut pikkorilluinnartoq, Nunatsinni attaveqarfigilluartakkaminik peqarluarpoq kiisalu pingaarneq tassaalluni Jeppe Nunatsinni inuiaqatigiit pitsaasumik sunniuteqarluarfigerusuttuummagit. Tamannarpiarlu KNI-p ataneranut tunngaviulluinnartuuvoq, Lars Borris Pedersen oqarpoq.
Jeppe Jensen aggustip tallimaani suliffeqarfimmi aallartinnissaminut qilanaarpoq.
- KNI-mi pisortaaninngornissannut tatigineqarnera assut maniguuffigaara. Nunatsinni attaveqaatitigut atortulersuutitigullu KNI ilaalluinnartuuvoq - suliffeqarfiuvoq Nunatsinnik ataqatigiissitsisuusoq tamattalu arlaatigut attuumassuteqarfigisarput. KNI-mi sulisut pikkorissut peqatigalugit suliffeqarfiup Nunatsinni inuiaqatigiinnut iluaqutaasussamik ineriartortitsinissannut qilanaarpunga. Jeppe Jensen oqarpoq.
Quersuarmiittuutit pillugit kusanaatsuliaq
Taanna Peter Grønvold Samuelsen taarserpaa, martsip naanerani taanna suliffimminit tassanngaanartumik soraarpoq.
Peter Grønvold Samuelsen arnanit arlaqartunit suliffeqarfimmut atassuteqartunit kannguttaatsuliorsimasutut unnerluutigineqarpoq.
KNI-mi innimiilliortoqarsimaneraanerup saniatigut allamik ukiaq aamma kusanaatsuliorfiuvoq. Tamannalu taamanikkut pisortap politiinut unnerluutigineqarneranik ilaatigut kinguneqarpoq.
Tassami KNI quersuarmiittuutiminik ukiuni arlalinni 50-70 millionit koruunit tungaannut nalitunaarisarsimavoq. Tamanna Namminersorlutik Oqartussat piginneqatigiiffiutaata maannamut 50 millionit koruunit tungaannut nalilinnik annaasaqarneranik kinguneqarpoq.
Peter Grønvold Samuelsen piginneqatigiiffimmi ukiuni arfineq-marlunni akisussaasuuvoq. Taassumali, aqutsisut allat KNI-illuuunniit kukkunersiuisuisa avataaneersut quersuarmiittuutit millionilikkaanik nalitunaarneqartarsimanerat arajutsisimavaat.
KNI-imi aqutsisut siulersuisullu suliaq taanna tamanut novembarimi saqqummiunneqarmalli pisuussuteqannginnerarput.
