Immikkut ilisimasallip KNI-mi aqutsisoqatigiit sakkortuumik isornartorsiorai
KNI-p ukiumoortumik naatsorsuutai aggustip ulluisa aqqaneq-aappaanni tamanut saqqummiunneqartut, ingerlatseqatigiiffissuup quersuarmiittuutaasa kukkusumik nalilerneqarsimanerannut tunngasunik allaqqasoqanngillat, naak aqutsisut KNI-p siulersuisuisa siulittasuata oqarnera naapertorlugu apriilip 29-ani ilisimatinneqaraluartut.
Aqutsisoqatigiilli naatsorsuutit kukkuneqarataannaanerat tamanut nalunaarutigisariaqarsimagaluaraat, Copenhagen Business Schoolimi piginneqatigiiffilerinermi inatsisilerinermut lektori Troels Michael Lilja naliliivoq.
AAMMA ATUARUK KNI millionilikkaanik kukkunermini allamik misissuititsilertoq
- KNI quersuarmiittuutiminnik nalunaarsuinermini naatsorsuinerminilu 2010-miilli kukkujuartarsimavoq.
- Tassa imaappoq: 2010-miit ukiuni pingasuni quersuaarmiittutit naleqassusaat 70 millionit koruuninik amerlavallaagaapput, ukiunilu kingullerni arfineq marlunni 50 millionit koruuninik amerlavallaagaalutik.
- Kukkuneq KNI-p naatsorsueriaasianut nalunaarsuineranit allaaveqarpoq, kikkulli kukkuluttorsimanersut KNI-p oqaatigisinnaanngilaa.
- Tamanna suliffeqarfiup nammineq pigisaata 50 millionit koruuninik ukiup qiteqqunnerani decembarimi naatsorsuusiornermi ikilineqarnerannik kinguneqassaaq.
- Kukkuneq suliffeqarfiup aningaasaqarneranut, tamatumani ingerlatsinermi angusaanut, KNI-meersut oqarnerat naapertorlugit sunniuteqangaarnavianngilaq.
- Ukiumoortumik naatsorsuutinik atuartup ingerlatseqatigiiffissuarmik ukiumoortumik nalunaarusiap saqqummiunneqannginnerani naliliineranut sunniuteqarsinnaasunik paasisaqarsimagaanni, taakkua aqutsisoqatigiit nalunaarutaanni erseqqissaatigineqartussaapput, taanna KNR-imut oqarpoq.
Assersuutigalugu KNI-p piginnittuaneersut, tassa Namminersorlutik Oqartussaneersut, ingerlatseqatigiiffissuulluunniit pisiortorfianeersut naatsorsuutit atuartarpaat.
Ukiumoortumik naatsorsuusiornermut inatsit unioqqutissimarataannaagaat
Aqutsisoqatigiillu nunatsinni ukiumoortumik naatsorsuusiornermut inatsit unioqqutissimarataannaagaat, Troels Michael Lilja naliliivoq.
- Aqutsisoqatigiit quersuarmiittuutitat nalingisa naatsorsorneri kukkuneqartut paasereeraluarlugu, inatsimmi maleruagassat piumasaqaatillu malillugit ukiumoortumik nalunaarusiortoqarsimasoq nalunaarutigaat, Troels Michael Lilja oqarpoq.
Aqutsisoqatigiilli allatut iliorsinnaasimanatik siusinnerusukkut oqarput.
AAMMA ATUARUK KNI-mi millioninik kukkusoqarnera: Quersuarmiittuutit kukkusumik nalilerneri angusanut sunniuteqartoq
Allat pisortaaneranni siulersuisuunerannilu taama pisoqarsimasoq oqaatigaat.
Tamannali inatsit naapertorlugu apeqqutaavallaanngilaq. Aqutsisoqatigiit ukiumoortumik nalunaarusiaq atsioraangamikku eqqortumik suliaasoq uppernarsartaraat, Troels Michael Lilja naliliivoq.
- Tamannami aqutsisoqatigiit akisussaatinneqarnerannik kinguneqarsinnaavoq, taanna oqarpoq.
Akiliisinneqarataannaasut
Taassuma suliaq ilungersunartutut taassallugu nangaanartoqartinngilaa. KNI-milu aqutsisoqatigiit akiliisinneqarataannaasut, lektori oqarpoq.
- Immikkut illuinnartumik pisoqarsimanngippat aqutsisoqatigiit tamanna pillugu akiliisinneqarataannaapput, taanna oqarpoq.
AAMMA ATUARUK Quersuarmiittuutit naatsorsorneri kukkuneqarujussuartut: KNI-p siulittaasuata qullersat pisuunnginnerarai
Aqutsisoqatigiimmi naatsorsuutit kukkuneqartut ilisimagaluarlugu eqqunngitsumik ilisimatitsisimagunik tamanna isornartoqartoq, Troels Michael Lilja isumaqarpoq.
- Aqutsisoqatigiit naatsorsuutit kukkuneqartut ilisimatinneqareeraluarlutik, quersuarmiititat nalitunaarneqarsimanerannut tunngasumik ukiumoortumik nalunaarusiami nalunaarutiminni erseqqissaateqarsimannginnerat uani pineqarpoq, taanna oqarpoq nangillunilu:
- Taamaaliorsimannginnerat apeqqusernarpoq.
KNR-ip KNI-mi aqutsisoqatigiit sakkortuumik isornartorsiorneqarnerat pillugu apersorusussimagaluarpai, sulili akisinnaanatik nalunaarput.
AAMMA ATUARUK KNI-mi quersuarmiittuutit naatsorsorneri 2008-mili kukkuneqartut
