KNI-mi naatsorsuusiornermi pisortaq soraarsinneqartoq

KNI-mi naatsorsuuserinermi pisortaq soraarsinneqarsimasoq, KNR-imi tusarparput.

Suna pillugu soraarsitaasimanersoq, suliffeqarfissuup oqaatigerusunngilaa. Tamanna inunnut ataasiakkaanut tunngassuteqarmat oqaaseqarfigineqarusunngilaq.

Nutaarsiassaq Sermitsiaq.AG-mit saqqummiunneqarpoq. Nutaarsiassaqartitsivik naapertorlugu oqaloqatigineqartut arlallit oqaloqatigineqarneranni pineqartoq piaartumik soraarsinneqarpoq.

Oqaaseqarusunngitsut

Naatsorsuusiornermi pisortaq, Per Jensen, 2010-mi februaarimiit soraarsitaanissani tikillugu atorfik pisortaaffigaa. Taassuma nittartakkami qupperniani Linkedin-profiliani maajip aallaqqaataani 2021-imi suliunnaarsimasutut allaqqavoq.

Aamma KNI-p nittartagaani naatsosuusiornermi pisortap ataani atia allaqqajunnaarluni "Inuttaqanngitsoq"-mik allaqqavoq.

AAMMA ATUARUK Immikkut ilisimasallip KNI-mi aqutsisoqatigiit sakkortuumik isornartorsiorai

KNI-mi pisortaagallartoq, Jan Lynge Pedersen, siulersuisuisa siulittaasuat, Lars Borris Pedersen aamma naatsorsuusiornermi pisortaasimasoq, Per Jensen KNR-imit sisamanngornermi attaveqarfiginiaraluarpagut.

Per Jensen Jan Lynge Pedersenilu apersorneqarusunnatik oqarput. "KNI inunnut ataasiakkaanut oqaaseqarsinnaanngitsoq" Jan Lynge Pedersen mailikkut akissuteqarpoq.

Lars Borris Pedersen saaffiginnissutitsinnik akissuteqanngilaq.

Millioninik kukkuneq

KNI mamianartunik arlaleriarluni ukiarli nalaataqarpoq.

KNI-mi quersuarmiittuutit naatsorsorneqarneri kukkuneqartut siorna novemberi naalersoq nutaarsiassiarineqarpoq.

AAMMA ATUARUK KNI-p pisortaanera quersuarmiittuutit pillugit mamianartuliamut ajuusaarpoq

Quersuarmiittut 2010-mili nalitunaarneqartarsimasut, KNI ilisimatitsivoq. Ukiuni pingasuni 70 millionit koruuninik ukiunilu kingullerni arfineq marlunni 50 millionit koruuninik nalitunaarneqarsimapput.

Taamaakkaluartoq siulersuisut siulittaasuat, Lars Borris Pedersen isumaqarpoq, nammineq, siulersuisut suliffeqarfiulluunniit qullersai arlaatigulluunniit akisussaasuunngitsut.

Pisortaq soraartoq

KNI-mi pisortaasimasoq Peter Grønvold Samuelsen, marsip naalernerani pisortatut atorfimminit tunuarluni nalunaaruteqarpoq.

Taanna suna pillugu soraarniuteqarnersoq paasineqarnikuunngilaq.

Peter Grønvold Samuelsen quersuarmiittuutit pillugit suliamut tunngatillugu politiinut unnerluutigineqarpoq.

Pisullu kingorna arnanit arlaqartunit suliffeqarfimmut atassuteqartunit kannguttaatsuliorsimasutut aamma unnerluutigineqarpoq.