Royal Greenland pasilliinermut: Akimik appaaneq tamatta eqqorneqaatigaarput
Royal Greenland saarullinnut aki 10 koruunit 75 ørimiiit 8 koruunit 25 ørimut oktoberip ulluisa qulingiluaanni apparmagu, KNAPK sakkortuumik isornartorsiuivoq. Appaat 23 procentiuvoq.
Aalisartut piniartullu kattuffiata Royal Greenland niuffannermi initussutsiminik atornerluinerarpaa. Taamaammat Atuisoqarnermut Unnammilleqatigiinnermullu Aqutsisoqarfimmut aamma maalaarutigaa.
Tassalu aalisartut Royal Greenland niuffannermi unammilleqatigiinnermik killiliissutaasumik unammillikkaminut isumaqatigiisssusiorsimanerarpaa. Taaamaaliorneq inatsisinik unioqqutitsineruvoq.
Taama unnerluutiginninneq Royal Greenlandip tunisassiornermut pisortaata, Lars Nielsenip, ilumuunnginnerarpaa.
- Isumaqarluinnarpugut sutigulluunniit taamaaliornata, taanna KNR-imut oqarpoq.
Royal Greenlandili aalisakkanik niuffannermi nunatsinni initoqisoq, Lars Nielsenip nassuerutigaa, suliffeqarfissuarli nunaruarmi niuffannermi mikeqisoq erseqqissarlugu.
Nunarsuarmi saarullittassiissutit 2 procentiinnanngui nunatta pigigai nunarsuarmilu niuffaffinni akit aallaavigalugit appaanerusoq, ingammillu saarulliit Ruslandimeersut akiisa Europami niuffaffinni 30 procentimik apparsimasut, Royal Greenland tusagassiutinut siusinnerusukkut nalunaarpoq.
Saarullinnut aki nunarsuarmi aatsaat taama qaffasitsigilerluni 2021-p naanerani qaffariapiloorpoq, tamatuma kingornali appariartuaaqqilluni.
- Akimik appaanerput nunarsuarmi niuffaffinni akinut naleqqussarnertut isigaarput. Ajoraluartumik tamanna tamatta eqqorneqaatigaarput. Aalisartuinnaanngitsut aammali Royal Greenlandip eqqorneqaatigeqaa, Lars Nielsen oqarpoq.
- Soorunami sunniivoq
KNAPK-p pasilliilluni Atuisoqarnermut Unnammilleqatigiinnermullu Aqutsisoqarfimmut aamma maalaaruteqarnera, aalisartut piniartullu kattuffiata Royal Grenlandillu siunissami isumaqatigiinniarnissaannut sunniuteqassanersoq nalunartoq, Lars Nielsen oqarpoq.
Kattuffiulli taama sakkortutigisumik isornartorsiuinera Royal Greenlandimut sunniivoq.
- Soorunami sunniivoq. Kalaallit Nunaanni aalisartut ingerlalluannginnissaannik soqutigisaqanngilluinnarpugut. Pissutsinilli, uagut sunniuteqarfiginngisatsinnit, qulangersimaneqarnerput nassuerutigiinnartariaqarparput. Tamakkununnga naleqqussaannarsinnaavugut, Lars Nielsen oqarpoq.
Akit taamaatsillugit aalisartut ingerlaqqissinnaajunnaarsinnaasut, KNAPK-miit oqarput. Akilli Royal Greenlandip nammineq suliffeqarfittut qanoq iliuuseqarfigisinnaanngikkai taanna oqarpoq. Taamaammat KNAPK-p kissaataanik naammassinnissutaasinnaasumik aaqqiissutissaalatsipput.
- Matumunnga aaqqiissutaasinnaasumik takusaqarsinnaanngikkallarpunga. Akit iluarsinngippata, Lars Nielsen oqarpoq.
KNAPK-p Royal Greenland unammillikkaminik akit pillugit isumaqatigiissuteqarsimanerarlugu kisermaassillunilu ingerlatsisimanerarlugu maalaaruteqarneranik Atuisoqarnermut Unammilleqatigiinnermullu Aqutsisoqarfimmiit, Royal Greenland pisortatigoortumik suli nalunaarfigineqarsimanngitsoq, taanna aamma oqarpoq.
KNAPK saarullinnik tunisinermi akit appartinneqarnerat pillugu akerliussutsimik novembarip aallaqqaataani takutitsissalluni pilersaarpoq.
