Nukissiorfiit: Ajutoortoqartillugu pilersuutit nungullarsimasut taarserneqassapput

Nukissiorfiit eqqaanni ataasinngornermi ikuallattoqarnerani imaanit nillusaatit ikuallapput.

Qanoq ikuallattoqalersimanera suli ilisimaneqanngilaq. Tamanna Kalaallit Nunaanni Politiit ikuallattoqarneranik misissuinikkut paasiniassavaat.

Aasianni innuttaasut ikuallattoqarnerata kingunerisaanik akunnerit tallimat arfinillillu akornanni innaallagiaqanngillat. Unnuup ingerlanerani qamittoortoqallattaavoq, ajutoornermimi pilersuutit nungullarsimasut aallartinneqartut atuisunit tamaviaartinneqarput.

- Taamaammat innuttaasut ilaat sarfaneqqillutillu sarfaaruteqqinneq nalaappaat, Nukissiorfinni teknikkikkut pisortaq, Filip Sivertsen oqarpoq.

Marlunngornermi ualikkut killiffik qanoq ippa?

- Pingaarnermik pilersuinermi pilersuut ataasiinnaq atorneqarpoq, tassannga illoqarfiup ilarujussua pilersorneqarpoq, kisianni illoqarfiup ilaa containerimit ajutoornermi pilersuummik suli pilersortarput, taanna oqarpoq.

Taassumali imaanit nillusaatip atuleqqinnissaa sulissutigineqartoq erseqqissaatigaa, taannalu atuutilerpat pingaarnermik pilersuinermi pilersuutit marluk atorneqalissallutik.

- Tamanna pilersuinermut qajannaatsuutitsissaaq, taanna oqarpoq.

Ajutoornermili pilersuutit nungullarsimasut ingerlajunnaaqqissinnaanerannik tamanna aamma isumaqarpoq.

2026-mi 2028-milu ajutoornermi nutaanik pilersuuteqalissasoq

Teknikkeqarnermulli pisortap Aasianni ajutoornermi pilersuutit nungullarsimasut qamittoortoqarnerani tamaviaangaatsiartartut isertuutinngilaa, taassumali illoqarfiup patajaannerusumik pilersupallalernissaanut ajutoornermi pilersuutinik amerlanerusunik peqalernissaanut pisariaqartitsiviusutut isiginngilaa.

Taassumali Aasianni ajutoornermi nukissiorfimmik nutaarluinnarmik 2026-mi sanaartortoqarnissaa oqaatigaa.

- Ajutoornermi pilersuutit Aasianniittut nungullarluinnarsimapput, taamaammat containerinik aaqqiissutaagallartunik peqarpugut, Filip Sivertsen oqarpoq.

Ataatsimut isigalugu Aasiaat kisimi sarfaarunnermik nalaassinngilaq. Illoqarfinni allani soorlu Ilulissani, Nuummi Sisimiunilu aamma nalaanneqartarpoq. Tamanna pilersuiviit nungullarneranik isumaqarpa?

- Aningaasaliinissamut kinguleruttoornermi ilungersuuteqarpugut, aamma pilersuutit pisoqqat -atorlugit pilersuileqqinniarneq soorunami ilungersunarneruleriartorpoq.

- Tamannalu Nuummi nalaattarparput, pinerimmi tamaasa illoqarfiup pilersoqqilerneqarnissaa ilungersuutigisarparput. Taamaammat ajutoornermi pilersuivimmik nutaamik 2028-mi piareertussamik sanaartornissaq aamma pilersaarutaavoq, Filip Sivertsen oqarpoq.

Illoqarfiit ineriartortut

Illoqarfiit soorlu Ilulissat aamma Nuuk alliartuinnavipput, taamaammat pilersuinermi ilaalertussat amerliartorput. Tamanna piareersimaffigineqarpa?

- Ineriartorneq malinnaaffigaarput, politikerinullu inuiaqatigiinnullu tunngatillugu isumaqatigiissutitsinnik malinninniarluta sunut aningaasaliisariaqarnerluta inerisaavitsinnut nalunaarutigisarlugu.

- Iliuuserineqartariaqartunut ilisimasatsinnut aningaasassaqannginnerput ilungersunartuuvoq – tamatuma saniatigut aningaasanik atorneqartussanik pissarsiuaannanngilagut.

Taava Nukissiorfinnit siunissamut qanoq qulakkeerisoqarpa?

- Aningaasaqarnerup oqimaaqatigiinnissaa pitsaanerpaavoq, taamaalilluta piffissaq eqqorlugu atortorissaarutinut pisariaqartitatsinnut aningaasaliissuteqarsinnaassalluta.

Assersuutigalugu Nuummi paasissutissaasivimmik nutaamik Tusassimit sanaartorneqartussamik oqaluuserinnittoqarpoq. Tamanna nukissiuutinik atuingaatsiartussaavoq, nukissiorfiit tamanna piareersimaffigivaat?

- Aap, piareersimavugut, pissutigalugu paasissutissaasivik nammineerluni aamma ajutoornermi pilersuuteqartussaavoq, taamaammat paasissutissaasik pilersuinerup uninnganera imminut pilersuilertussaavoq.

- Taakkulu Utoqqarmiut Kangerluarsunnguani erngup nukinganik nukissiorfimmit pilersornissaat ajornartorsiutaanavianngilaq.

Nukissiorfiit teknikkeqarnermut pisortaata Aasianni pissutsit naggataatigut uteqqiffigai, taassuma innuttaasut inuiaqatigiittut akisussaassuseqarnermik ippassaq unnukkut takutitsinerannik qujassuteqarfigai.

- Sulisutsinnut qatserisartunullu ippassaq unnukkut unnuaanullu suliaqangaatsiarsimasunut nerisassanik pajuttoqarpoq, tamannalu qujassutigaara.