Tusagassiuut: Pentagon nunatsinni aappaagu sakkutooqarfiliorusuttoq

USA-p nunatsinni aappaagu sakkutooqarfiliornissani naatsorsuutigaa Amerikamiullu illersornissamut ministereqarfiata Pituffik Space Basep annertuumik nutarterneqarnissaa pilersaarutigalugu.

Tamanna tusagassiorfik Washington Examiner taama allaaserisaqarpoq, Amerikamiullu illersornissamut ministereqarfianni qaffasissumik atorfilittaq, Amerikap illoqarfiisa pingaarnersaanni illersornissamut tusagassiortunik marlunngornermi ataatsimeeqateqarnermi oqalugiartoq, innersuussutigalugu.

- Aappaagu aallartisalereersimassalluta neriuutigaara, atorfilittaq præsidentip USA-p nunatsinni marlunnik sakkutooqarfiliorusunneranik nalunaaruteqarnera innersuussutiutigalugu oqarpoq.

Narsarsuaq Tunumilu Mestersvigi pilersaarutaapput. Taakkunani sakkutooqarfiliornissaq USA-p, nunatta Danmarkillu illersornissamut isumaqatigiissuteqarneranni allaqqavoq.

Sila apeqqutaasoq

Pentagon pilersaarusiulereerpoq silali ukioq manna suliaqarnissamut killeqartitsivoq, Trumpip atorfilittaasa sinniisuat oqarpoq.

- Pilersaarusiuleruttorpugut pissutigalugu suliaqalernissatsinnut sila atoruminarunnaariartormat, atorfilittaq oqarpoq. 

Atorfilittap oqarneratut, kujataani suliaqarnissamut sila ukiumut ulluni 300-t missaanni atoruminartarpoq. Pituffimmili ukiumut taamaallaat qaammatialunnguusarlutik. 

Atortunut nutaanut pilersaarummi atorneqarsinnaasumik, Mestersvigimi 1.830 meterisut takitigisumik ujaqqanik mittarfeqareerpoq. 

Radarinik nukissiuutinillu pilersuinermik nutarsaarusuttut

Atortut nutaat saniatigut, USA Pituffik Space Basemi aningaasaliinialersaarpoq, USA-p missilinik saassunneqassangaluaruni illersornissamut atorneqartussanik. 

Taakkulu radarinik, nukissiuutinik pilersuinermik hangarinillu nutarterinerussapput. 

Atorfilittap oqarneratut aningaasaliinissamut erseqqissumik pilersaaruteqareerpoq, suliaqalernissarlu aappaagu, sila atoruminarseriarpat, naatsorsuutigineqarpoq. 

Pituffik Amerikap nunataata missilinik saassunneqarnissaanut USA-p kalerrisaarutaani qitiusuni ilaavoq. 

Nunatta nunatut inissisimanera, Issittoq qulaallugu saassusisoqassagaluarpat, isumannaallisaanikkut periusissiornermut pingaaruteqarpoq. 

 - Tamanna isumaqarpoq, Pituffiup silaannarsuakkut periusissiornikkullu kalerrisaarisussatut sullissinera pitsaavallaarsorineqarsinnaanngilaq, atorfilittaq oqarpoq.