Air Greenland: Kulusummut timmisartuussinerit amerlanerussapput – arlalinnilli piumasaqaateqarfiusumik

Kulusummi akunnittarfik Islandimut timmisartukkut aqqutip matuneqarnerata kingunerisaanik ukiuunerani matuvoq.

Tamanna Air Greenlandimut ilaasartuinullu aamma sunniuteqassaaq.

Air Greenlandimmi ilaasuni ingerlariaqqissinnaanngitsut unnuiffissaannik qulakkeerussinnaanngikkunigit timmisartuussissanerlutik eqqarsaatigilluaqqaartariaqarpaa.

Piujuartitsinermut attaveqaqatigiinnermullu pisortaq, Inga Dóra Markussen taama oqarpoq.

- Tasiilaminngaanniit Kulusummut apuutereersunut kinguneqassaaq. Soorlu unnuiffissaqarnavianngillat imatut paasillugu namminneq ineeraqarsinnaanngillat.

Air Greenlandip Piujuartitsinermut attaveqaqatigiinnermullu pisortaata, Inga Dóra Markussenip Nuummiit Tasiilamut marlunngornermi marloriarlutik timmisartuussisarlutik oqaatigaa. Tamanna Icelandairip ukiuunerani timmisartuussiunnaarneranik pissuteqarnerarpaa. Assi © : Henriette Simonsen / KNR

Mittarfik siniffissianik sinngup puunillu piareersimasuuteqarluni unnuiffiunissamut periarfissaalissaaq.

Air Greenlandilli mittarfiup unnuiffiusarnissaa pinngitsoortinniarsaraa.

- Taamaattumik kinguneqassaaq imatut, maanngaanniit (Nuummiit aaqq.) silarluttussaasoq takusinnaagaangatsigu, marloriarluta pingasoriarlutaluunniit eqqarsaatigeqqaassavarput ilumut ulloq taanna timmisartussanerluta, Inga Dóra Markussen oqarpoq.

Hotel Kulusuup matunerata kinguneri

Air Greenlandip Kulusummi akunnittarfiup ukiuunerata nalaani matuneqarnera qanoq qisuariarfigineraa apeqqutigineqarmat Inga Dóra Markussenip tamanna uggornartuunerarpaa.

- Soorunami uggornarpoq taamatut pisoqarnera.

Oqarputit aallassanngippat aallassappalluunniit pingasoriarlusi eqqarsaqqittariaqartarlusi?

- Taakku eqqarsaatigeqqilaartarpagut massakkumiit, unnuiffissaqannginneq peqqutigalugu. Sorpassuit eqqarsaatigeqqaartariaqartarpagut.

Naalli Icelandairip ukiuunerani timmisartuussisarnerminik unitsitsinerata kingunerisaanik Air Greenlandip timmisartuussisarnerit amerlanerulersikkaluarai akunnittarfiup matuneqarnera angalanissanik taamaatitsiinnartoqarnissaanut aarlerinartoqarnerulersitsivoq. Assi © : Markus Valentin / KNR

Kamannermik sulisunut tutsitsisoqartarnera

Air Greenlandip Kulusuup Tasiilallu akornanni qulimiguulia teknikkikkut upernaaq ajornartorsiuteqarpoq. Tamannalu pakatsissutigineqarpoq.

Pakatsinerlu taanna sulisunut tutsinneqapallassinnaasartoq, Inga Dóra Markussenip oqaatigaa.

- Tusaasinnaasara unaavoq, anersaaruluutaat paasinarput upernaaq teknikkernerput peqqutigalugu. Kisianni una nipi tusaasara aamma piaarisoqartoq, kangiagooq salliutinneqanngisaannartoq, soqutigineqanngitsoq ilaalu ilanngullugit. Tamanna Air Greenlandimut tutsinniarneqartorujussuusarpoq.

Tasiilami qulimiguulik upernaap ingerlanerani teknikkikkut ajornartorsiuteqarpoq. Tamanna ilaasartut akornanni pakatsissutigineqarmat tamanna sulisunut tutsinneqarpoq. Sulisut tatineqaraangamik tamanna timmisartuussinerup isumannaatsuunissaanut sunniuteqarsinnaasarpoq. Tamanna Air Greenlandip Piujuartitsinermut attaveqaqatigiinnermullu pisortaata, Inga Dóra Markussenip oqaatigaa. Assi © : Markus Valentin / KNR

- Innuttaasunik ataatsimiisitsinermi arlaleriarlunga oqaatigivara, sulisugut mekanikerit, pilotit aamma uagut taakku illersortussaavagut, paarisussaavagut, taanna oqarpoq.

Ilaasussat sulisunut tutsitsigaangata tamanna timmisartuussinissaq isumannaassusaanut naggataatigut kinguneqarsinnaasoq taassuma oqaatigaa.

- Kisianni tutsittarneri sulisutsinnut kamannaq, nipit nuanninngitsut saassutsinnerit nalaattarpaat assorujuk, taannalu massakkut assut ernumatitsivoq.

Timmisartuussinerit amerlanerusut

Inga Dora Markussenip Ineqarnermut, Attaveqaasersuutinut Isorliunerusunut Upalungaarsimanermullu Naalakkersuisoq, Iddimanngiiu Jensen Bianco (IA) peqatigalugu septembarimi Tunumiippoq.

- Tassani innuttaasut suliffiutillit takornariartitsisullu naapippagut qanimullu oqaloqatigalugit. Tassani anersaaruluutaat soorunami tusaavagut. Aamma paasissutissanik sukumiinerusunik tunioraavugut.

Ataatsimiititsinerit Air Greenlandip timmisartuussisarnernik amerlanerulersitsineranik kinguneqarput. Tasiilamut marlunngornermi maannakkut marloriarlutik timmisartuussisarput.

- Tassa marlunngornikkut marloriarluta Tasiilamukartarpugut, tassani saniatigut aamma assartugassat nassiussat immikkut ilanngunneqartarput. Tamanna Iceland Airip timmisartuussisarunnaarnerata kingunerivaa, Inga Dora Markussen oqarpoq.