Kommune Kujalliup imigassat aalakoornartortallit matoqqatiinnarlugilluunniit piumasaqaatitalimmik ammaassiffiginiarpaa

Imigassat aalakoornartortallit pillugit periarfissat marluk Kommune Kujallermi kommunalbestyrelsip sisamanngornermi oqaluuserissavai. Matoqqatitsinerup attatiinnarneqarnissaa, aalakoornartortalinnilli tuniniaanermi sukannersumik piumasaqaateqartoqarnissaa siunniunneqarpoq.
Assi © : Emil Weis / KNR
Allattoq Mads Lynge
novembarip 18-at 2026 14:03

Imigassat aalakoornartortallit tuniniarneqarnerisa oktobarip ulluisa aappaanniilli matoqqatinneqarnerat attatiinnarneqassanersoq, Kommune Kujallermi kommunalbestyrelsip aqagu ullaap tungaani nalunaaqutaq qulingiluanut oqaluuserissavaa.

Periarfissat marluk oqaluuserineqassasut, kommunalbestyrelsip ataatsimiinnissaanut ullormut oqaluuserisaani allassimavoq.

Imigassanik aalakoornartortalinnik tuniniaanerup matoqqatiinnarneqarnissaa, suliffeqarfinnulli sukannersumik piumasaqaateqarlunilu kikkut aamma pisisinnaassanersut pillugu ammaassisoqarsinnaanera oqaluuserineqassaaq.

- Imigassamik aalakoornartortalimmik tuniniaanerup maanna killilersorneqarnerata attatiinnarneqarnissaa siunertaavoq, soorlu aamma pinaveersaartitsineq, katsorsaaneq inerteqqutigineqarneranullu uppernarsaatit suliarineqarnerisa nanginneqarnissaat, imigassat aalakoornartortallit tuniniagaanerisa matoqqatinneqarnerannut atatillugu kommunalbestyrelsip ataatsimiinnissaanut ullormut oqaluuserisassaanni allassimavoq.

Tamanna pillugu tusarniaasoqarnissaa Kommune Kujalliup oktobarip naalernerani ammaappaa, illuatungeriit imigassat aalakoornartortallit tuniniarneqarnerisa matuneqarnerat pillugu tusarniaavigineqarsinnaanerat ammaassiffigineqarluni.

Tusarniaanermi akissutit aallaavigalugit Kommune Kujalleq taamaasilluni maanna aalajangertussanngorpoq, imigassap aalakoornartortaqartup siunissami qanoq inissisimanissaa eqqartorneqassalluni.

Imigassat aalakoornartortallit matuneqannginnerisa siulianni inatsisit uterfigeqqinneqarnissaannut eqqarsartoqanngilaq.

Imigassanik aalakoornartortalinnik tuniniaaneq sukannersumik piumasaqaatitalik

Imigassanik aalakoornartortalinnik tuniniaanerup matoqqatiinnarneqarnissaata inuussutissarsiortunut aningaasatigut kinguneqarsinnaanera, imigassanillu anngiortumik tuniniaasoqartalerneranik kinguneqarsinnaanera takuneqarsinnaasoq, kommunalbestyrelsip oqaluuserisassaasa ullormut oqaluuserisassanni atuarneqarsinnaavoq.

Taamaammat allatut aamma siunnersuusiortoqarpoq.

Tassa imigassamik aalakoornartortalimmik tuniniaanerup ammaqqinneqarnissaa, tuniniaanermili malittarisassanik piumasaqaatinillu nutaanik atuutilersitsisoqarnera.

Assersuutigalugu imigassamik aalakoornartortalimmik pisiniaraanni 21-leereersimanissaq, taavalu Brugseni, Pisiffik Pilersuisorlu kisimik imigassanik aalakoornartortalinnik tuniniaasinnaassasut.

Imigassat aalakoornartortallit tuniniagaanerisa sumiiffinni aalajangersimasuni taamaallaat tuniniagaasinnaanissaat kommunip siunissaq ungasinnerusoq kissaatigaa.

Imigassanik aalakoornartortalinnik pisiniarfissuarni ataasinngornermit tallimanngorneq ilanngullugu ulloqeqqaninngaanniit unnukkut nalunaaqutaq arfineq-pingasut tungaannut taamaallaat pisisoqarsinnaanissaa aamma siunniunneqarpoq.

Imigassallu aalakoornartortallit pillugit aamma ussassaarisoqarsinnaassanngilaq. Imigassallu aalakoornartortallit akikinnerpaaffilerneqarnissaat aamma eqqarsaatersuutigineqarpoq.

- Imigassat aalakoornartortallit akii nuna tamakkerlugu misissorneqassasut siunnersuutigineqarpoq, imigassap aalakoornartortallip ataatsip akiata inatsisitigut akikinnerpaaffilerneqarnissaa eqqarsaatersuutigineqarluni, siunnersuummi allassimavoq.

Inatsisit maanna atuuttut aallaavigalugit taamaallaat taama suliniuteqartoqarsinnaasoq kommunip erseqqissaatigaa. Piumasaqaatit ilaat ingerlaannartumik taamaammat atuutilersinnaanngillat.

Imigassaq aalakoornartortaqartoq pillugu politikki sukannersoq 

Imigassamik aalakoornartortalimmik tuniniaaneq Kommune Kujalliup ammassappagu tamanna naalakkersuisunit akuersissutigineqaqqaartussaavoq.

Ilungersunartunik arlalinnik pisoqareernerata kingorna imigassamik aalakoornartortalimmik tuniniaanermik Kommune Kujallermi matusisoqarnissaa, Kommune Kujallermi borgmesterip Malene Vahl Rasmussenip(D) naalakkersuisunut oktobarimi kissaatigaa.

- Piffissaq kingulleq ilungersunartunik pisoqaqattaarnerata kingorna, sapaatip akunnera kingulleq naalluinnartoq taakkua Nanortalimmi pisut aallaavigalugit innuttaasut noqqaassuteqarnerat aamma uanga isumaqatigigakkit, kommunalbestyrelsimi ilaasortakka tusarniarsimavakka, Malene Vahl Rasmussen KNR-imut taamani oqarpoq.

Naak imigassamik aalakoornartortalimmik ammaassisoqaqqissagaluarpat imigassaq aalakoornartoq pillugu politikkimik sukannersumik politikkeqartoqassasoq, kommunalbestyrelsip ullormut oqaluuserisassaani ilaatigut allassimavoq:
- Malittarisassanik sukannersunik atuutilersitsiartuaarluni ammaassisoqarneratigut imigassanik aalakoornartortalinnik  tuniniaasoqaqqilerlunilu sassalliisoqaqqissinnaalissaaq, imigassarli aalakoornartoq pillugu politikkip sukannernerusorlu, pinaveersaartitsinermillu tunngavillip atuutilersinneqarnissaa pillugu suliaq ilutigitillugu sulissutigineqarpoq.