Meeqqat atuarfiata aaqqissuuteqqinneqarnissaanut inatsit nutaaq Inatsisartut akuersissutigigaat
Meeqqat atuarfii pillugit inatsit nutaaq Inatsisartuni partiinit tamanit tapersersorneqarluni marlunngornermi akuersissutigineqarpoq. Meeqqat atuarfiini atuartitsinerit malunnaatilimmik allanngussapput.
Atuartut 1.klassimit 3.klassimut kalaallisut, danskisut, inuiaqatigiilerinermi, oqaluttuarisaanermik, upperisarsiornermik, filosofiimik, matematikkimik, pinngortitalerinermik, inuttut ineriartornissamik, eqqumiitsuliornermik timersornermillu maanna atuartinneqartarput. Nipilersorneq, assassorneq ilusilersuinerlu fagit arlallit aqqutigalugit taassuma saniatigut aamma atuartitsissutigineqartarput.
Inatsilli nutaaq tunngavigalugu danskisut tuluttullu 1.klassimiit 3.klassimut maanna atuartitsisoqartarunnaassaaq. Oqaatsit taakku marluk 4.klassimiit aatsaat atuartitsissutigineqartalissapput.
Kalaallisulli matematikkimillu atuartitsisoqarnerusalissaaq.
Atuartut inuusunnerit kalaallisut oqaluttariarsornikkut allattariarsornikkullu pikkorinnerulernissaat siunertaavoq, soorlu aamma matematikkimi pikkorinnerulernissaat anguniagaasoq.
1.klassimiit 3.klassimut ullut atuarfiit taassuma saniatigut aamma ikilisinneqassapput.
Ukiup ingerlanerani ullut atuarfiit maanna 200-t 240-llu akornanniipput, maannalu 180-it 200-llu akornanniilissallutik.
Atuartut atuartitsinerup nalaani eqqissillutik itisilerinerusinnaalernissaat, atuartitsineq taamaaliornikkut pitsaanerulerlunilu atuartut toqqissisimanerulissasut politikerit oqarput.
Arlalinnit isornartorsiorneqartoq
Meeqqat atuarfiat pillugu inatsit nutaaq meeqqat pillugit oqaaseqartartumit MIO-mit, meeqqat atuarfii pillugit ilisimatusartunit inuussutissarsiortuniillu isornartorsiorneqangaatsiarpoq.
Ullut atuarfiit ikilisinneqarnerisigut meeqqat ajortiasut, atuarfiullu toqqissisimatitsineranik ataatsimuussuseqarnermillu misigititsineranik pisariaqartitsisut eqqorneqarsinnaasut MIO isumaqarpoq.
Danskisut tuluttullu atuartitsisarnerit kinguartinneqarnerisa atuartunut iluaqutissaanut takussutissat amigaataasut, MIO-p ilisimatusartullu oqaatigaat.
Danskisut atuartinneqartarnerup meeqqanut kingusinnerusukkut ilinniarnertuunngorniartussanut, inuussutissarsiornermulluunnniit sammivilimmik ilinnialersussanut, ilinniaqqittussanulluunniit pingaaruteqarnera isornartorsiuisut oqaatigaat.
Ilinniartitsisutut ilinniarsimasunik amigaateqartoqarnerata nalaani meeqqat atuarfiata aaqqissuuteqqinneqarnera iluaqutaassanersoq MIO-p aamma apeqquserpaa.
Meeqqat atuarfiat pillugu inatsisip nutaap suliarineqarnerani meeqqat naammattumik peqataatinneqarsimannginnerat MIO-p aamma isornartorsiorpaa.
Meeqqanut inuusunnerusunut tunngatillugu allannguisoqarnerata saniatigut inuussutissarsiornermut sammivilimmik 9.klassimi 10.klassimilu atuartitsisoqarsinnaalernissaa inatsisikkut nutaakkutaamma ammaanneqarpoq. Meeqqat atuarfiata inuussutissarsiortullu akornanni suleqatigiinnerup nukittorsarneqarnissaa siunertaavoq, suliffeqarfeqarfiit aamma suleqatigineqarnerat aamma nukittorsarneqarniarluni.
Inatsit nutaaq aappaagu 2027-mi aggustip aallaqqaataani atuutilersinneqassaaq, meeqqanullu inuusunnernut tunngatillugu allannguutit ukiumi atuarfiusumi 2028-2029-mi aatsaat atuutilissalluni.