MIO-p atuarfeqarnermik aaqqissuusseqqinneq nutaaq isornartorsioraa
MIO atuarfeqarnermik aaqqissuusseqqinnerujussuaq Inatsisartuni inaarutaasumik suliarineqarnissaa sioqqutilaarlugu politikerinut mianersoqqussuteqarluni ammasumik allagaqarpoq.
- Apeqqutaasoq tassaavoq allannguutissatut siunnersuutigineqartut ilisimasat paasissutissallu naammattut tunngavigalugit suliarineqarsimanersut, Meeqqat pisinnaatitaaffiinik sullissivik Naalakkersuisunut Inatsisartunullu ammasumik allakkami allappoq.
Atuarfeqarnermik aaqqissuusseqqinneq nukarlerni atuartunut ikinnerusunik atuartitsissuteqarnissamut ilaatigut tunngassuteqarpoq. Tamatuma saniatigut ilitsoqqussaralugu kalaallisut oqaatsit nukittorsarnissaat pillugu danskisut tuluttullu atuartitsinerit 4. klassilernissamut utaqqissunneqassapput, atuartullu angajulliit inuussutissarsiutinut sammisunik suliaqarnerutinneqassallutik.
MIO-lli siunnersuutit taakku pingasut naammattumik nukittuumillu tunngaveqanngissorai.
- Taamaattumik allannguutit annertuut atuutilersinneqannginnerini qulaajarneqareersimasariaqarpoq, meeqqat ilinniarnerannut, atugarissaarnissaannut, ineriartornerannut siunissamilu periarfissaannut qanoq sunniuteqassanersut. Peqatigisaanillu ersersinneqarsinnaasariaqarpoq allannguutit meeqqanut pitsaanerpaamik iluaqutaassanersut, MIO allappoq.
Oqaatsit pillugit oqallinneq kukkusumik tunngaveqartoq
Kalaallisut atuartitsinerup nukittorsarneqarnissaa tunngaviusumik pitsaasuusoq, MIO oqarpoq.
Taamaakkaluartorli allamiut oqaasiinik soorlu danskisut tuluttullu atuartitsinerit 4. klassimut utaqqissunneqarnerisigut oqaatsitigut ilikkagassanut pitsanngorsaasoqarnissaa qularutigaat.
Atuarfeqarfeqarnermik aaqqissuusseqqinnermi Islandimi misissuinermi meeqqat danskisut atuartinneqaliaartut oqaatsitigut piginnaasaqarnerulersimanngitsut ilaatigut takutinneqartoq innersuussutigineqarpoq.
- Misilittagaq tamanna pingaaruteqarpoq, tamannali kingusinnerusukkut aallartinnermi inernerit pitsaanerulernissaannik takutitsinngilaq, MIO allappoq:
- Nalunaarusiami ersersinneqarpoq ilinniartitsisunik piginnaasalinnik atuartitsinermilu atortussanik naleqquttunik amigaateqarneq Islandimi qallunaatut siusinnerusukkut ilinniartitsinermik misileraanerup anguniakkanik angusisimannginnermut pissutaasut ilagigaat.
MIO meeqqat danskisut ullumikkut ilinniarnissaat aamma pingaaruteqarsoraa, inuussutissarsiornermimmi ilinniarfiit ilinniarfiilluunniit ingerlariaqqiffiusut kalaallisuinnaq ullumikkut ingerlanneqarsinnaanngillat.
- Ilinniagaqarfiit suli qallunaatut oqaatsinik piumasaqaateqarpata, oqartussaasut qulakkeertariaqarpaat meeqqat atuarfimmi pisariaqartitaminnik qallunaatut piginnaasaqalersinneqarnissaat, MIO allappoq:
- Siunissami oqaatsit pillugit allannguutit annertunerusut kissaatigineqassappata, peqatigisaanik piviusorsiortumik tatiginartumillu pilersaarusiortoqartariaqarpoq. Pilersaarummi ersersinneqartariaqarpoq ilinniartitaanerup sinnerata qanoq inuusuttunik kalaallisut imaluunniit tuluttut ilinniartussanik tigusinissaanut ilinniartitseqqinnissaannullu piareersarneqassanersoq.
Ullut atuarfiusut ikinnerunerat ajornartorsiutaasoq
Meeqqat pisinnaatitaaffiinik sullissiviup siunnersuummi nutaami nukarlerni atuartitsinermi akunnerit ikinnerunissaannut tunngassuteqartoq aamma ernumassutigaa.
- Meeqqat atuartarfimmi ulluisa ikilinerata meeqqanut qanoq sunniuteqassanersoq, pingaartumik meeqqanut pitsaanerpaajussanersoq, pillugu misissuisoqarsimannginnera MIO-p isumakuluutigaa.
Atuartut atugarissaarnerannik sunniuteqarsinnaasumik allannguisoqartinnagu kingunerisinnaasai ilisimaneqartariaqartut MIO isumaqarpoq:
- Atuarfimmiinneq meeqqanut amerlasuunut atuarnerinnaaneq ajorpoq. Atuarfik aamma meeqqanut ataatsimoornissamut, inersimasunik tatigisaminnik attaveqarnissamut, ulluinnarni aalajangersimasumik aaqqissuussinissamut peqataaqataanissamullu periarfissiisarpoq.
Atuarfeqarnermi aaqqissuusseqqinnermi 1. klassimit 3. klassimut ullut atuarfiusut 180-it 200-llu akornannik amerlassuseqalersillugit ikilisinniarneqarput. Meeqqat piffissami tassani ullut 200-t 240-llu akornanni atuartaraluarput.
Atuartitsissutit akunnerillu ikinnerunissaannik oqallinneq nunatsinni meeqqat atuarfiisa pitsaassusaannik oqallinnissamut pingaaruteqarnerusumut assersuutaasoq MIO oqarpoq:
- Ilinniartitsisussaaleqineq suli ajornartorsiutaappat, atuartitsissutit aaqqissuussaanerisa allanngortinneqarnerat meeqqanut qanoq iluaqutaassava? Atuartitsinermut piffissaliussat allanngortinneqarpata, atuarfinnili ilinniartitsinerup pitsaassusia suli naammaginanngippat tamanna qanoq iluaqutaassava?
Meeqqat tusaaneqassasut
Atuarfeqarnermik aaqqissuusseqqinnerup ilaa atuarfiit inuussutissarsiutinut sammiveqarnerulersinneqarnissaannut, inuussutissarsiutinut sammisunik klasseqarnissaannut, suliffeqarfimmilu sulinermi misilittaanerunissamut aamma tunngassuteqarpoq.
MIO-p tamanna meeqqat ilikkariartornerannut atugarissaarnerannut qanoq sunniuteqarsinnaaneranik nalunaajaasoqarnissaa aamma amigaatigaat.
Naalagaaffiit Peqatigiit meeqqat pisinnaatitaaffii pillugit isumaqatigiissut naapertorlugu suliani meeqqanut tunngasuni meeqqat tusarniaavigineqartassapput.
- Allannguutit pillugit aalajangiisoqannginnerani meeqqat qanoq isumaqarnerat tusarneqartariaqarpoq, isummersuutigineqartullu aalajangiinermi tunngavissatut atorneqartariaqarput, MIO allappoq.
Meeqqat atuarfeqarnermut aaqqissuusseqqinniarnermut atatillugu tusarneqanngitsut MIO isumaqarpoq.
Atuarfeqarnermut aaqqissuusseqqinneq Upernaakkut ataatsimiinnermi siullermeerneqartoq novembarip aallartinnerani aappassaaneerneqarlunilu pingajussaaneerneqassaaq.
