Sammisaq: Takornariaqarneq

Ilulissani takornariartitsisartut nunanit allaneersut ernumassutigaat

Nunani allamiut suliffeqarfii Ilulissani takornariaqartitsinermi ukiorpassuarni salliusutut inisisimapput. Akuersissuteqarnissamulli piumasaqaatit nutaat najukkami suliffeqarfiit iluanaaruteqarnerunissaannut aappaagumit qulakkeerissapput, najukkamili suliffeqarfiit unammilleqatigiinnerup suli naligiinnginnissaa ernumassutigaat.
- Nammineq sullitassarsiussaagut aamma nammineq isumaqatiginninniassaagut. Maani illoqarfimmi taama iliornerput iluaqutaanngilaq. Nunarsuarmukarluta sullitassarsiussaagut, I Love Ilulissat Toursimit Suulut Geilser oqarpoq. Assi © : KNR
Allattoq Isak Hüllert
novembarip 18-at 2026 07:32

Takornariat Ilulissanut tikeraaraangamik – imaluunniit tikeraarnissamut pilersaarusioraangamik – danskit angalatitsisartut angisuut, soorlu Topas Explorer Group aamma Albatros Travel naammattoorajuppaat.

Nunami allamiut takornarianik angallassisartut suliaqartartullu nunami imaanilu ilulianik nunattalu pinngortitaani alutornartunik allanik takutitsinissamut piareersimasarput.

Takornariaqarnerli kiap iluanaarutigaa – aningaasanut sumut pisarpat?

Apeqqut tamanna Ilulissani inuussutissarsiornermik ingerlatsisut eqqarsaatigigajuppaat.

Avannaata Kommuniani takornariaqarnermut allaffiup immikkoortortaani aqutsisoq ukiorpassuarnilu misigisassarsiorluni takornarianut angallassisartoq, Lars Noahsen taakku ilagaat.

- Takornariartitsinissamut piareersimanngissoraluta nunanit allanit takornarianik angallassisartut atorneqartuarsimapput. Uagulli piareersimavugut. Ilulissaní suliffeqarfiit piareerfissinneqaannassapput, taamaalillutik ineriartussapput, taanna oqarpoq.

Kangiata sullua nunarsuarmi tusaamasaavoq, nunatsinnilu illoqarfiit annersaasa pingajuanni iluliarsuit qanimut takuniarlugit, nunarsuarmit tamarmit ukiut tamaasa takornariaqartarpoq. Assi © : KNR/Isak Hüllert

Takornariaqarnermit isertitanik Ilulissaniiginnartitsinissamik qulakkeerinninnissaq Lars Noahsenip pingaartippaa.

- Ilulissani najugaqaraanni aningaasat maaniiginnassapput. Najukkamiittullu ineriartorsinnaasariaqarput. Tamanna nunavissunit kissaatigineqarnerpaavoq.

Taassuma suliffeqarfissuit nunani allamiunik takornarianik angallassisartullit Ilulissaniittut suliffeqarfimminnik ineriartortitsinissaannut ajornakusoortitsisorai.

Malittarisassat nutaat ernumassutit taakkuuinnartut

KNR-ip Ilulissami mittarfiup ammaanersiorneqarneranut atatillugu tikeraarmagu Ilulissani suliffeqarfiit nunani allamiut suliffeqarfiisa takornariaqarnermut taama inissisimaffeqartigineranni Ilulissani aallartitsisut inissisimalernissaminnik ilungersornerat ernumassutigalugu oqariartuutigaat.

Suliffeqarfissuit aningaasassarissaarnerunissamut, immikkut ilisimasaqarnissamut sulisussaqarnissamullu ukiuni qulikkaani siuaqqapput.

Ilulissani suliffeqarfiit oqarnerat naapertorlugu unammilleqatigiinnissamut atugassarisanit naligiinnerannik tamanna pilersitsivoq.

Takornariaqarnermut inatsit nutaaq Ilulissani suliffeqarfiit inissisimanerat nukittorsassavaa. Inatsit 2025-mi januaarip aallaqqaataanni atuutilerpoq, suliffeqarfiullu aningaasaataasa taasinnaatitaaffiisalu ikinnerpaamik pingasorarterutaannit marluk nunatsinni najugaqartunit akileraartartunillu pigineqarnissaat piumasaqaataalluni.

Piumasaqaatit suliffeqarfinnut pioreersunut suliffeqarfinnullu nutaanut 2027-mi januaarimit atuutilissapput.

Suliffeqarfiit 50.000 koruunit ataallugit ukiumut kaaviiaartitaqartut ilaatinneqanngillat.

Pisuni immikkuullarissuni immikkut ittumik akuerissuteqartoqarsinnaavoq.

Takornariaqarnermulli inatsit najukkami nalilinnik pilersitsiffiunerulissagaluartoq tamanna Ilulissani ernumanermut annikinnerulersitsinngilaq.

Inatsisilli ernumajunnaarsitsinngilaq. Najukkamiittut piumasaqaatit sakkukillisinneqarnissaat ernumassutigaat. Ilulissat Kommuniani Qaasuitsup Kommunianilu borgmesteriusimasoq Ole Dorph taakku ilagaat.

Neriuuteqartoq ajornerpaarli ernumassutigigaa

Ole Dorphip Ilulissani takornariaqarnerup ineriartornera qanimut malinnaaffigaa.

Taassuma siuariartortoqarnera takuaa: Ilulissani arlallit takornariaqarnermut aamma ilaatigut angallatinut ATV-nullu aningaasaliinissamut periarfissat ukiuni kingullerni qulini takuaat.

Unammilleqatigiinnerli suli naligiiffiunngitsoq, taanna isumaqarpoq.

- Takornariaqarnermut inatsit tamakkiisumik atuutsilersinneqaruni naalakkersuisunukarlutik ‘asasara ikinngutiga, millionippassuarnik atuereerpugut, taavami sussaagut? Taamaappat eqqunngitsunik naatsorsuuteqarluta aningaasaliisimavugut.’-mik oqaaseqarnissaat ernumassutigaara, Ole Dorph oqarpoq. Assi © : KNR

- Takornariaqarnermut inatsit ukiuni kingullerni sisamani oqaluuserineqarpoq, kisianni soorlu ukiuni kingullerni sukkukillisinneqarsimasutut ippoq. Takornariaqarneq allarluinnarmik periaaseqarluni suliarineqartariaqarsoraara. Suliffeqarfissuit maanna unikaallattariaqartut oqarfigineqartariaqarsoraakka.

Taassuma piumasaqaatit nutaat najukkamiittut pituttornissaannut nunatsinniitinneqarnissaannullu nalilimmik pilersitsinissaat neriuutigaa. Aammali ajornerpaamik pisoqarnissaa aamma ernumassutigaa:

- Takornariaqarnermut inatsit tamakkiisumik atuutsilersinneqaruni naalakkersuisunukarlutik ‘asasara ikinngutiga, millionippassuarnik atuereerpugut, taavami sussaagut? Taamaappat eqqunngitsunik naatsorsuuteqarluta aningaasaliisimavugut.’-mik oqaaseqarnissaat ernumassutigaara, borgmesteriusimasoq oqarpoq.

Aningaasat nunatsinni annissorneqartut

Avannaata Kommuniani borgmesterip, Lars-Erik Gabrielsenip Ilulissani suliffeqarfiit inissisimanerat aamma nukittorsarusuppaa.

Taassuma nunani allamiut suliffeqarfiisa takornariaqarnermit aningaasanik iluanaaruteqarnissaat itigartitsissutiginngilaa.

Suliffeqarfissuilli Ilulissani takornariartitsisartunit tigusinissaat kissaatiginngilaa.

- Suliffeqarfissuit pitsaanerusumik atugassaqartinneqarnerunissaannit najukkami suliffeqarfiit periarfissaqarnerunissaat qulakkeerusunneruara, taanna KNR-imut oqarpoq.

Borgmesterip nunani allamiut suliffeqarfiisa suliffeqarfiup ilusilersugaanera aqqutigalugu aningaasanik nunatsinnit annissuisinnaanerat oqaatigaa. Tamanna taassuma oqarnera naapertorlugu nunatta akileraarutitigut isertitassanik annaasaqarneranik kinguneqassaaq.

Avannaata Kommuniani borgmesterip, Lars-Erik Gabrielsenip nunani allamiut takornariartitsinermik suliffeqarfii akerlerinngilai. Kisianni suliffeqarfimmiut Ilulissani suliffeqarfinnit tigusinissaat kissaatiginngilaa. Assi © : KNR / Markus Valentin

Gabrielsenip oqarnera naapertorlugu kommuni suliffeqarfinnit siorna 6,5 millionit koruuniinnarnik pissarsivoq. Borgmesterip kommunip nammineq naatsorsuineri innersuussutigai, taassuma oqarnera naapertorlugu aningaasat taakku 800 millionit koruuniusinnaagaluarput.

Taassumalu suliffeqarfissuit takornariaqarfiunerpaami taamaallaat suliaqartarnerat erseqqissaatigaa, Ilulissanilu suliffeqarfiit ukiup sinnerani suliassaqartaratik.

Akuersissutit sivitsorneqarnissaannut tatisisoqarnissaa ernumassutigigaa

Suliffeqarfimmit Whaletoursimit Claus Foss Hansenip takornariaqarnermut inatsit nutaaq pitsaasutut isigaa.

- Kalaallit takornariaqarnermut ineriartortitsinissaat kissaatigineruarput. Taamaammat inatsit nutaaq pitsaasumit ilassilluarparput, taanna oqarpoq.

Taassumali naalakkersuisut nunani allamiut suliffeqarfiinit taakkulu inatsisip piumasaqaataanut immikkut ittumik akuersissutaannik sivitsuisoqarnissaanit tatineqarnerminnit tunniutiinnarnissaat ernumassutigaa.

Suliffeqarfimmit Whaletoursimit Claus Foss Hansenip takornariaqarnermut inatsit nutaaq pitsaasutut isigaa. Taassuma inatsisip najukkamiittut takornariartitsinissamut tunngavissaqartinnerulissagai neriuutigaa. Assi © : Privatfoto

Taassuma angalatitsinerik suliffeqarfissuaq, Albatros pillugu suliaq innersuussutigaa, taassuma oqarnera naapertorlugu suliffeqarfiup immikkut akuersissumminik sivitsuisoqanngippat Kangerlussuarmi akunnittarfimminik matusinissani sioorasaarutigaa. Claus Foss Hansenip oqarnera naapertorlugu tamanna suliffeqarfiup kissaataanik akuersisoqarnissaanut politikkikkut tatisineruvoq.

Saniatigut angalatitsivissuit Ilulissaniittut unammillersinnaanermut iluaqutissaqareersorai, taakkumi takornarianut isumaqatigiissutimi ilarujussui angalatitsiviit ataatsimullu angalanissamut neqeroorutitik aqqutigalugit namminneq aqukkaat isumaqarpoq.

Tamanna Ilulissanii takornarialerisut takornarianik attaveqarnissaannut misigisassarsiortitsisarnerminnillu tunisaqarnissaannut ajornakusoortitsivoq.

Claus Foss Hansenillu taakku aningaasaqarnertik atorlugu nunatta siuttui kissaatigisaminnik tunniussinissaannut tatisinnaagaat aamma ernumaatigaa.

Taanna takornariaqarnermut inatsit akuerineqartussanngormat Albatros Travel immikkut arlaatigut akuersissuteqarfigineqanngikkuni Kangerlussuarmi akunnittarfimminik inuussutissarsiummillu allamik matusinissaminik sioorasaarisimasoq oqarfigineqarsimavoq.

Claus Foss Hansenillu oqarnera naapertorlugu taakku taamaalillutik akuersissuteqarfigineqarsimapput, Naalakkersuisummi Kangerlussuarmi akunnittarfittut ittumik unnuisarfimmik taama pingaaruteqartigisumik matusisoqarnissaa kissaatiginngilaat.

'Sullitassatsinnik ujartuissaagut'

Suulut Geislerip I Love Ilulissat Toursimeersup Ilulissani suliffeqarfiit ingerlalluarnissaminnut suli periarfissarissaarsorai.

Takornariaqarnerli ineriartupiluussappat tamatuma allanngorsinnaanera suliffeqarfissuillu siuttuulersinnaanerat ernumassutigaa.

Saniatigullu Ilulissani suliffeqarfiit sullitassaminnik ujartuinissamut akisussaaffimmik nammineq tigusisariaqarsorai.

- Sullitassatsinni ujartuissaagut, nammineerluta isumaqatiginninniassaagut. Maani ujartuiniarnerput iluaqutaanngilaq. Nunarsuarmukarluta ujartuissaagut, taanna oqarpoq.

- Ilulissani suliffeqarfiit suli ingerlalluarsinnaapput, kisianni takornariaqarneq siuariangaatsiassappat killormoortuanik pisoqarsinnaanera ernumassutigaara. Inuussutissarsiummi matumani ikittuinnaat siuttuulersinnaapput. Kisianni tamanna uagut nammineq qanoq iliuuseqarfigineripput apeqqutaavoq, Suluut Geisler oqarpoq. Assi © : KNR

Suliffeqarfissuarnilli unammillerneqarneq najukkami suliffeqarfiit ajornartorsiutigisaanni kisimiinngilaq.

Visit Greenlandip inissaqartitsinermik misissuinerani umiatsianut talittarfiit amigaataanerat takornariaqarnermik suliffeqarfinnut nutaanut toqqaannartumik ajornartorsiutaanerat ilaatigut oqaatigineqarpoq.

Sulisussaaleqineq aamma akunnittarfinni neriniartarfinnilu inissat killeqarnerat takornariaqarnerup ineriartortinneqarnissaanut aamma aporfiliipput.

Ilulissani suliffeqarfiit takornariaqarnerup ineriartornissaanut peqataanissaat taamaammat unammillerneqarnermut kisimi tunngassuteqanngilaq, suliffeqarfiulli annertusarnissaanut inissaqartitsineq sulisussaqarnissarlu aamma apeqqutaapput.

KNR-ip nunani allamiut takornariaqarnermik suliffeqarfiinik aamma takornariaqarnerup najukkami iluaqutissanik pilersitsiffiunissaata pisariaqartinneqarneranik isornartorsiuineq takornariaqarnermi suliffeqarfinni pisortaanernut aamma Inuussutissarsiornermut Naalakkersuisoqarfimmut saqqummiuppaa.

KNR-ip ilanngutassiap immikkoortuata aappaani taakku qanoq isiginninnerannik malitseqartitsiffigissavaa.