Politiit ullormut nalunaarutaat: Politiit tillinniartoqarsimanerani takunnittussarsiortut
Nuup qiterpasissuani Akikimi marlunngornermi ullaassakkut tillinniartoqarsimaneranik nalunaaruteqartoqarpoq. Inuusuttut sisamat sumiiffimmiit qimaasut takuneqarsimapput, politiillu takunnissimasinnaasunik ujartuipput.
- Tillinniat matut ilaat aseroriarlugu isersimapput, immiaaqqanik imeruersaatinillu eqeernartortalinnik tillinniarniarsimanerattut isikkoqarpoq, Kalaallit Nunaanni Politiit pigaartuisa pisortaat Lars Even KNR-imut oqarpoq.
Sanioqquttup tillinniartoqarnera politiinut nalunaarutigaa, inuusuttullu sisamat tassanngaanniit qimaasut takusimanerarlugit. Politiilli innuttaasunit takunnissimasinnaasunit aamma nalunaarfigineqarusupput. Takunnissimaguit Kalaallit Nunaanni Politiinut saaffiginnissinnaavutit, politiit oqarasuaataasa normoraat 70 14 48.