Aningaasanut inatsisissaq akuersissutigineqartoq

Inatsisartut aningaasanut aappaagu inatsisissaq ataasinngornermi akuersissutigaat. Innuttaasunut pitsanngorsaataasussat arlallit ataatsimiittarfimmi oqaluuserineqarput, siammasissumillu suleqatigiinneq qujassutigineqarluni.
Assi © : KNR/Mads Malik Fuglsang Holm
Allattoq Emil Weis
novembarip 16-at 2026 14:13
Nutserisoq Connie Fontain

Aningaasanut inatsisissatut isumaqatigiissut, Demokraatit, Inuit Ataqatigiit, Siumut Atassutsillu sapaatip akunnerata siuliani ataasinngornermi saqqummiussaat Inatsisartuni akuersissutigineqarpoq.

Tamanna Naleraq minillugu partiinit tamanit taperserneqarpoq. Aningaasanut 2027-mut inatsisissatut siunnersuut taamaalilluni akuerineqarpoq.

Aningaasaqarnermut naalakkersuisup, Aqqaluaq B. Egedep (IA) Siumut Atassullu oqaaseqartarfimmit aamma qujassuteqarfigai.

- Siumup oqaatigisaa pingaaruteqarluinnarpoq: ‘Naak illuatungiliuttuugaluarluta akisussaaffimmik tiguseqataaniarlutalu politikkikkut sunniuteqaqataarusuppugut’, Aqqaluaq B. Egede Siumup oqaasiinik issuaavoq:

- Tamanna politikkikkut misilittagaqarnermik suleqatigiinnerullu qanoq pingaaruteqarneranik takutitsisoq isumaqarpunga. 

Aqqaluaq B. Egedep aningaasanut inatsisissami naammagisimaakkani arlallit oqaatigai.

Utoqqaat siunissami amerlanerulernissaanni aningaasaqarnikkut artukkiissutissat, aamma ulluunerani paaqqutarinniffinnut nammineq akiliuteqartarunnaarsitsisoqarneratigut ilaqutariinnut meerartalinnut aningaasaqarnerup pitsaanerulernissaa ilaatigut oqaluuserineqarput.

Aningaasaqarnermi akisussaassuseqarneq

Demokraatinit Vivian Motzfeldt kingorna oqaaseqartarfimmukarpoq, taassumalu aningaasaqarnermi akisussaassuseqarnerup tunngaviusariaqarnera pillugu erseqqissaatigaa.

- Siunissami eqqarsaateqaraanni kissaatigisat piffissaq ungasinnerusoq eqqarsaatigalugu attanneqarsinnaasuussapput Vivian Motzfeldt oqarpoq: 

- Tamatuma kingunerisaanik aningaasaqarnikkut tapiissuteqarnissaq kisimi pineqanngilaq. Nunatsinni toqqissisimaneq kissaatigaarput, meeqqat periarfissarissaarlutik ineriartornissaat utoqqaallu ataqqineqarlutik utoqqalisinnaanissaat kissaatigaagut.

Vivian Motzfeldtip oqarnera naapertorlugu utoqqaat nunatsinniiginnarnissaannik ilaatigut qulakkeerinissamut tunngassuteqarpoq, aamma timersornerup timigissarnerullu tamanut nukittorsarneqarnissaanut. 

Tamatuma saniatigut oqaluffimmut 5 millionit koruuninik aamma immikkoortitsisoqarnerarpaa-

- Amerlasuut tarnikkut anniaateqarlutik inuuneranni anersaakkut atukkat isumagineqassapput. Taamaammat palasit, ajoqit oqaluffeqarfiillu pitsaanerusunik periarfissaqarlutillu atugassaqarnissaat aamma pingaaruteqarpoq, Vivian Motzfeldt oqarpoq.

Ilinniartitaanermut nukittorsaasoqarneratigut sulisinnaasut amerlanerulersinneqarnissaa aamma utoqqaat soraarnerussutisiaqarnermi saniatigut sulisinnaanissaanik ajornannginnerulersitsinissaq aningaasanut inatsimmi aamma ukkatarineqarput.

- Nunarput aningaasaqarnikkut pitsaanerusumik ineriartortinneqassappat assaat sulisinnaasut pisariaqartippagut, Vivian Motzfeldt oqarpoq.

Aningaasanut inatsit sungaartoq aappaluaartoq

Naleqqap siulittaasua, Pele Broberg aningaasaqarnermut naalakkersuisumut, Aqqaluaq B. Egedemut qujassuteqarpoq.

Naleqqammi aningaasanut inatsimmi siunnersuuterpassuit imminnit siunnersuutaasut isumaqarpoq.

- Siunnersuuterpassuimmi partiimit sungaartoq aappaluaartumit, Naleqqameersuugaluarput. Amerlangaarmata suut tamarmik sungaartoq aappaluaartumik qalipaateqangajapput, Pele Broberg oqarpoq.

Naleraq Inatsisartuni partiini kisiartaalluni aningaasanut inatsisissamut nutaamut atsioqataanngilaq.

Siulittaasup oqarnera naapertorlugu aningaasanut inatsisissap nammineq oqarneratut taama sungaartoq aappaluaartuutiginerani amerlasuut apeqquserpaat.

Pele Brobergip partiip aningaasanut inatsimmut tapersiisinnaannginneranut aalajangersimasunik arlalinnik pissutissaqarnerarpaa.

Assersuutigalugu mittarfiit nutaat innuttaasunut iluaqutaanissaat neriorsuutigineqarpoq, mittarfiilli naatsorsuutigineqartumit akisunerulerput.

Aalisarnermiillu saniatigut isertitaqartoqarnissaa naatsorsuutigineqarpoq.

- Isertitaqartoqarnissaanik neriorsuisoqarnera kingornalu aningaasartuutinik akuersisoqarnera siusinnerusukkut takoreerparput. Tamanna eqquinnginneruvoq. Eqquutsissinnaasanit annerusumik neriorsuuteqarput, Pele Broberg oqarpoq.

IA, Siumut aamma Atassut

Inuit Ataqatigiit aningaasaqarnerup patajaallunilu pitsaasuunissaa pingaartippaat, aamma meeqqanut tunngasunik susassaqarfik partiip pingaartippaa.

- Meeqqat angerlarsimaffiup avataanut inissinneqartartut ukiuni kingullerni amerlingaatsiarput, tamannalu misissuiffigeqqissaarneqassasoq aalajangiusimavarput, Mimi Karlsen (IA) oqaluttarfimmit oqarpoq:

- Meeqqat ilaquttatik najorlugit toqqissisimasumik peroriartornissaminnut pisinnaatitaaffeqarput.

Partiit allat assigalugit Erik Jensenip Siumumit oqaaseqarfimmukarami utoqqarnut tunngasut oqaaseqarfigai.

Soraarnerussutisiallit sulisinnaanissaata ajornannginnerulernerata saniatigut soraarnerussutisianut aaqqissuusseqqinnerujussuaq 2027-mut aamma pilersaarutigineqarpoq. 2028-mit 2030-mut 28,3 millionit koruunit ukiumik immikkoortinneqartarniarput.

Erik Jensenip Siumup kommuninut tapiissutit akit qaffakkiartornerat iluatigalugu naleqqussarneqartassannginnerat aningaasanut inatsisissami pingaarnerpaatissimagaa aamma oqaatigaa.

Tamanna kommuninut tapiissutinut 2030-mut 218,4 millionit koruuninik atuinerunissamik isumaqarpoq.

- Kommunit sipaarniartoqannginnissaa pisariaqartippaat, Erik Jensen oqarpoq.

Atassutip aningaasanut inatsisissaq aamma naammagisimaarpaa:

- Naalakkersuisut Atassutip siunnersuutaanik arlalinnik suliaqarnerat nuannaarutigaarput, Aqqalu C. Jerimiassen (A) oqarpoq.