Nagdlúnguak Futsal Super Cupimi ajugaavoq

Tamaviaartoqarluaqaaq Futsal Super Cup pingajussaa pisoq sapaammi ualikkut timersortarfissuarmi Inussivimmi Nuummi naammassimmat.
Allattoq Noah Mølgaard
novembarip 16-at 2026 11:40

Utaqqikatajuissuseq uteriinnerlu Nagdlúnguup Ilulissaneersup pisariaqartippai futsalimi B-67 Nuummeersoq ajugaaffigisinnaajumallugu. Tassami Futsal Super Cup sioqqullugu B-67 2018-ip kingorna ajorsartinneqanngilaq.

Taamaammat nuannattoqaqaaq Nagdlúnguak Futsal Super Cupimi sapaammi ualikkut ajugaammat taannalu sioqqullugu unamminerni aallarniutaasuni tallimanngornermi ualikkut aamma B-67 ajugaaffigalugu.

Muminnermi Nagdlúnguak 2-1-mik siuaqqavoq siuaqqanertillu 6-2-mut annertusereeraat unammineq naammassisoq nalunaarlugu dommerit siggarput.

Qamuuna suliarineq

Ajugaaneq taanna timikkut sungiusarnerinnakkut anguneqanngilaq. Nagdlúnguami anføreriullunilu sungiusaasoq Lars Erik Reimer naliliivoq eqqarsartaatsikkut piareersarneq unamminerup taama naammassineranut tunngavileeqataasoq.

- Iligisakka peqatigalugit una angusarput angusinnaajumallugu tamaviaarnikuuvugut, Lars Erik Reimer KNR-imut oqarpoq oqaatsinilu ilavai eqqarsartaatsikkut piareersarnermut sammitillugit.

- Uanga imminut assersuutigisinnaavunga: Ersarinnikuuvoq kamaqqajaallunga arsartarnera. Tamanna uannut inuttut suliassaanikuuvoq. Soorunami ineriaratta aamma allannguisinnaallutalu. Nammineq kissaatiginikuuara allannguinissamut imminut immaqa annerpaatut allanngortinnissaralunga. 

- Taanna sunniuteqartoq takusinnaavara assorujussuaq. Pissutigalugu iligiit imminnut upperisut uani takugakkit tunniutiinnarusunngittullu. Taamaammat inuk ataaseq allanngorsinnaaguni suna tamarmi allanngorsinnaavoq, Lars Erik Reimer oqarpoq.

Video file

Sungiusarusussuseq

B-67ip akuerivaa Nagdlúnguup ajugaanera inissaminiittoq. Sungiusaasuujutigalugu arsartoq Patrick Otiri Frederiksen isumaqarpoq iligiit pitsanngoriaqqissagunik imminnut qiviartariaqartut.

- Isumaqarpunga piumassuseq imminullu upperineq ullumikkut assigiinngissutaasut, Patrick Otiri Frederiksen KNR-imut oqarpoq.

- Takusinnaasara malillugu isertitsinissamut periarfissaqartaraluarpugut atorluanngikkaangatsigit illuani isertitsiffigineqartarluta. Taassuma takutippaa sakkortuumik sungiusartoqartariaqartoq sungiusarnernullu takkuttuaannartoqartariaqartoq. Ullumi unamminerup taamatut naammassinera tassaagunarpoq sungiusarluarsimannginnerup kingunera, Patrick Otiri Frederiksen oqarpoq.

Video file

IT-79 bronzennappoq bronzennanniunnermi Young Guns Futsal ajugaaffigalugu.