Illorsuit ammaqqinneqarnissaannut Naalakkersuisut pilersaarummik suliaqalersut
Illorsuit ammaqqinneqarnissaannut Naalakkersuisut pilersaarusiornissaannut aalajangiiffigisassaattut siunnersuut Inatsisartunit marlunngormat akuerineqarpoq. Nunaqarfiup ammaqqineqarnissaanut pilersaarummik suliaqarnissamut siunnersuutip akuerineqarnera Illorsuarmiut nuannaarutigaat.
Allattoq Jonna Enoksen Dahl, Gaaba Olsen
novembarip 14-at 2026 09:03
Illorsuarmiut nunaqarfimminniit qimagussorneqarnerminniit ukiut qulingiluanngoreerpaat.
Nunaqarfiup ammaqqinnissaanut pilersaarusiornissaq Inatsisartut ukiaanerani ataatsimiinnermi marlunngormat aappassaa eqqartorpaat.
Siunnersuullu akuerineqarpoq.
Agnethe K. Jonassenip, Illorsuarmiup, Illorsuit ammaqqinneqarnissaannut Naalakkersuisut pilersaarummik suliaqarnissaannut siunnersuutip akuerineqarnera nuannaarutigaa.
-Soorlu misiginarluni kiisami tusarneqariartorluni, 2017-illi kingorna taamannak nilliaateqarujoornikuulluta kiisami.
Angerlarsertuarput
Illorsuit ukiut qulingiluat matuma siorna matuneqarmalli Agnethe K. Jonassenip ilaquttanilu aasat tamaasa ornittuartarpaat.
- Meerartamma nuannarigamikku assorujuk taavaniillutik. Eqqaalaartuaannarpavut sapaatit akunneri tamaasa. Massakkut soorlu kaperlak aallartikkiartorpoq, juulleriartungajalerpoq. Juulleriartornerani pisartut nunaqqatigiiulluta pisartuunikut eqqaaqqajaanartorujussuusarput, Agnethe K. Jonassen oqarpoq.
Agnethe K. Jonassen ukiup tulliani nunaqarfimminut uteqqikkusuppoq, Illorsuarmiullu allat aamma uteqqikkusupput.
-Nuussagutta inoqarluarumaartoq ilimagisarpara. Kinguaariit nikinnerat, meeqqiortut amerlatsinnikuugamik, meerarpaalunngornikuupput.
Agnethe K. Jonassen
Agnethe K. Jonassenip meeraaqatigisimasaa Hans Frederik Møller Ilulissani maannakkut najugaqarpoq.
Taannalu Inatsisartunut siorna qineqqusaarnermini Illorsuit ammaqqinnissaat sulissutiginiarlugu oqariartuutigivaa.
Illorsuit ammaqqinneqarnissaannut Inatsisartut oqallinnerat Hans Frederik Møllerip malinnaaffigaa, nunaqarfiullu ammaqqinneqarnissaa neriuutigaa.
-Soorunami suliaq sukkatikkusunnarnerugaluarpoq. Oqarsinnaagaluaruma uanga oqassagaluarpunga: Aqagu ammarsiuk. Kisianni paasinnippunga, Hans Frederik Møller oqarpoq.
Hans Frederik Møller
Qaqqanik qanittukkut sisoortoqarsinnaaneranik takussutissaqanngitsoq
Nunaqarfiit Nuugaatsiaq aamma Illorsuit qaqqap sisoortoqarnerata kingunerisaanik tassaarsuaqarnerata kingorna 2017-mi matuneqarput.
Isorliunerusunut naalakkersuisup, Iddimanngiiu Jensen Biancop (IA) qaqqanik ukiut 50-it ingerlaneranni sisoortoqarsinnaaneranik takussutissaqanngitsoq oktobarip 22-anni oqaatigaa.
- Nunalli ukiut 50-it tulliuttut ingerlaneranni sisooratarsinnaanerata ilimanaateqarneranik ataatsimut naliliinermut allanngortitsinngilaq, taanna oqarpoq.
Aatsitassanut oqartussaqarfik Uummannap eqqaani qaqqanik sisoortoqaratarsinnaaneranik nutaamik naliliinerat naapertorlugu, Umiammakku Nunaanni qaqqani ajornerulertoqarneranut takussutissaqanngilaq.
Hans Frederik Møllerip Illorsuarmiinneq ulorianartutut misigineq ajorpaa.
- Naamik ulorianartutut misigisimanngilara, taanna oqarpoq.
Illut aserfallakkiartortut
Illut ukiorpaalunni najorneqannginnerisa kingunerisaanik aserfallakkiartorput.
Agnethe K. Jonassen ilaquttanilu Illorsuarni illoqarput, illuallu ukioq naallugu najorneqarneq ajormat aserfallakkiartorpoq.
- Ajuluallakkiartornartarpoq qanoq pinerpa, soorlu hajja aappaagumita qanorissua? Soorlu taamaannaasattarluni.
Agnethe K. Jonassenip Illorsuarni illua
Hans Frederik Møllerip Agnethe K. Jonassenip oqaasii ilaliinnarpai.
- Tassa matunngikkallarmalli aserfallalaareernikuuvoq taanna illunnguaq. Soorunami najortannginnatsigu aserfallannera annertusiartorpoq.
Suli ukiorpassuusinnaasoq
Illorsuit ammaqqinnissaannut pilersaarutip nunaqarfiup pilerseqqinneqarnissaanut pisortallu ingerlatsinerisa aallarteqqinneqarnissaannut pisariaqartinneqartunik inatsisitigut tunngavissat ilaatinneqassasut Inatsisartut oqallinnerminni eqqartorpaat.
Inatsisartunut siunnersuummik siunnersuuteqartup Aqqalu C. Jeremiassenip (A) siunnersuutip akuerineqarnera tuppallissutigalugulu nuannaarutigaa.
Illorsuilli ammaqqissappat Naalakkersuisut isumannaallisaaneq pillugu misissueqqaassapput.
-Soorunami naalakkersuinikkut taakkua suliarissaqqaarpaat qanoq isumannaattumik uteqqinnissaannut tunngatillugu nunaqarfiup ammariartuaqqissinnaanissaanut ingerlanissaq, pingaarnerpaavorli maannakkut suliassaq siulleq ammarneqarami, Aqqalu C. Jeremiassen oqarpoq.
Illorsuit ammaqqinnissaannut Naalakkersuisut pilersaarutissaat kingusinnerpaamik Inatsisartut ukiaanerani ataatsimiinneranni 2027-mi Inatsisartunut saqqummiunneqassaaq, tamatumalu kingorna nunaqarfiup ammaqqinnissaanut suliniutit ingerlanneqalissapput.
Tamannalu ukiorpassuusinnaasoq Aqqalu C. Jeremiassen oqarpoq.
-Neriuutigivaralu ukiuni tulliuttuni, aap immaqa sivisulaartutut misinnarsinnaavoq, kisianni suleriaqqinnissaa tulleq aamma uagut uningata Naalakkersuisunut apeqqutigisarumaarpagut. Tamakkua massakkut killiffiit taama ittut uagut imaaliinnarluta iliuuseqarfigisinnaanngilagut, kisianni tassa suliassaq naalakkersuisunut tunniunneqarpoq. Ukiulerneqanngilaq kisianni suliassaq tassa aallartippoq.
Aqqalu C. Jeremiassen
Nunaqarfiup ammaqqinnissaanut suli ulluliisoqanngikkaluartoq Hans Frederik Møllerip qinigaaffik naatinnagu Illorsuit ammarneqarnissaat neriuutigaa.
-Neriuppunga una qinigaaffik naanngitsoq ammarneqassasoq.
Agnethe K. Jonassenilli nunaqarfiup ammarnissaanut utaqqisinnaanerarpoq.
-Uagut utaqqisinnaavugut. Utoqqalillunga pisinnaajunnaariataassaguma ilimagilluinnarpara meeqqama arlaat taavunga angerlarumaartoq.
