Podcast: Inuiaqatigiit ikiorsinnaanngikkaangatsit
Narsami radioqarfikoq. Igalaat matullu peerneqarsimapput, kiffiutissat peqanngillat pisataqaranilu. Illutoqqamili oqquiniartoqarsimasoq apummi tumit takutippaat.
Isumaginninnermut politikki pillugu Ilisimatusarfimmi ilisimatuup Steven Arnfjordip takusimasani taakku podcastimi nangeqattaartumi Nunarsuup avannaanit ilisimasat-ni oqaluttuarai. Taassuma angerlarsimaffeqanngitsunik kisitsinertik pillugu oqaluttuuppaatigut aamma nunatsinni isumaginninnermut tunngatillugu sooq suli unammilligassaqartiginerput pillugu nassuiaalluni.
Steven Arnfjordimmi nunatsinni isumaginninnermut politikki pillugu atuakkiaa saqqummeqqammerpoq. Ajornartorsiutit sooq taama aaqqikkuminaatsiginerat aamma ingerlaqqittoqassappat qanoq pisoqarnissaa misissorpaa.
Oqaluttuarisaanermilu qanga pisimasut nassuiaatissanut ilaasut paasivaa.
Danskit periusaat nunatsinnut tulluanngitsoq
Sorsunnersuup Aappaata kingorna nutaanngorsaanerujussuaq nunatsinni isumaginninnermi ajornartorsiutinut aallaaviusutut oqaatigineqakkajuttarpoq. Aallaaviali siusinnerungaartukkut aallartittoq, Steven Arnfjordip podcastimi oqaatigaa.
- Inoqarfinni ilaquttat tassaasarsimapput imminnut ikiorsinnaanngitsunut ikiuuttartut. Aammali immikkoortitsisoqartarsimavoq. Tamarmik assigiimmik agguaassiffigineqartarsimanngillat, Steven Arnfjord oqarpoq.
Taamaammat danskit atorfilittaat inuiaqatigiinnik europamiunngorsaallutik 1800-kkunnili aallartissimapput, ilaqutaasullu akisussaasuusarnerat oqartussaasunut tunniukkiartuaarneqalersimalluni.
- Inuit avataaniit nunamut tikikkaangamik namminneq isumaqakkajuttarput iliuuseq eqqunniagartik inuiaqatigiinnut pitsaanerpaasoq, naak kingunerisassai qanoq innersut paaseqqissaarsimanngikkaluarlugit, Steven Arnfjord oqarpoq.
Angerlarsimaffeqanngitsutut inuuneq
Nunatsinni inuiaqatigiit atugarissaarnermik tunngaveqartut ukiuni qulikkaani tulliuttuni pilersikkiartuaarneqarput. Amerlasuut illoqarfinnut nuussorput aalisarnermullu tunngasunik suliaqalerlutik.
Sulisartukkormiut inuussutissaqarumallutik nalunaaqutaq arfineq-pingasuniit sisamat tungaanut sulisartut pileriartorput. Inuiaqatigiilli ineriartupiloorneranni katataasoqartarnera ajornartorsiutaavoq.
Inuiaqatigiinnilu suliffeqaratik malinnaanngitsoortut tassaakkajupput inuiaqatigiit avataanni inuullutik inuuniarnikkut ajornartorsiuteqalersartut.
Sulilu ullutsinni taamaattoqartoq Steven Arnfjord isumaqarpoq.
Qaqortumeersoq Inunnguaq Lund assersuutaasinnaavoq.
Aasianni ukiuni tallimani pineqatissinneqarsimasunut inissiisarfimmeereerluni suliffissamik inissamillu nassaarsinnaasimanngilaq. Ukiunilu qulingiluani kammalaatimini inisimasuuvoq, taannali kammaa ukiut marluk matuma siorna toqummat Inunnguaq Lund inisimaffissaarussimavoq.
- Sakkortoqaaq, inuiaqatigiinnut akuuleqqinnissara ajornakusoortinnikuuara. Ukiut tallimaannaagaluartut pissutsit allanngupallassimasorujussuupput, Inunnguaq Lund aallakaatitassiami oqarpoq.
Taanna Nuummi angerlarsimaffeqanngitsut unnuiffigisartagaani maanna unnuisarpoq, Frelsens Hærimilu nerisassioqataalluni allanillu isumagissassaqartarluni sulisarpoq.
Politikkikkut pilersaarutit saniatigut iliuuseqarneq
Steven Arnfjordip oqarnera naapertorlugu nunarput tamakkerlugu angerlarsimaffeqanngitsunut periusissiaq amigaataavoq. Inissiat amerlanerusut isumaginninnermilu neqeroorutit imminnut ataqatigiittut aamma angerlarsimaffeqanngitsut sorliit ikiorneqarnissaminnut pisinnaatitaaffeqarnerat pillugu inatsisit erseqqissut pisariaqartinneqarput.
Ajornartorsiutilli tamarmik pisortanit aaqqinneqarsinnaanngillat. Kajumissutsimik sulerusussuseqarneq aamma najugarisami pimoorusserusussuseqarneq nukittorsarneqartariaqartut, Steven Arnfjord isumaqarpoq.
- Inuiaqatigiinnik tapersersuinngikkaanni inuiaqatigiit atugarissaarnissaq tunngavigalugu ingerlalersinniarneqarsinnanngillat. Najugarisami piumassuseqartoqartariaqarpoq, soorlu meeqqanik aasaanerani taammaarsimaartitsinermik aaqqissuilluni, sulorarnermi sungiusaasuulluni, nammineq kajumissutsimik sulilluni imaluunniit atuakkanik atorniartarfik unnukkut ammatillugu, taanna oqarpoq.
Steven Arnfjord aamma Inunnguaq Lund aallakaatitassiani nangeqattaartumi Nunarsuup avannaanit ilisimasat-ni tusarfiginerusinnaavatit, immikkoortoq ateqarpoq ”Inuiaqatigiit ineriartupiloortut”.
Aallakaatitassiaq podcastiuvoq aamma KNR.gl-miilluni. KNR Radiomittaaq kalaallisut sapaatiuppat nalunaaqutaq 14:05 aamma danskisut marlunngorpat 21.00 tusarnaarneqarsinnaapput.
Aallakaatitat kalaallisut danskisullu suliarineqartarput, tassanilu tapiisuvoq Carlsbergfondet.
knr.gl/podcast Nunarsuup avannaanit ilisimasat - Inuiaqatigiit ineriartupiloortut
