Ataatsimiititaliami ilaasortaaffiit pissaanermilu pissutsit nutaat

Inatsisartuni ataatsimiititaliami ilaasortaaffiit agguataarneqarput. Tamanna Atassutip naalakkersuisoqataajunnaarnerata kingunerisaanik pivoq.

Allattoq Markus Valentin

novembarip 13-at 2026 11:13

Atassut naalakkersuisoqatigiinnit ataasinngormat tunuarluni Siumut Nalerarlu teknikkikkut suleqatigilerpai.

Taakku ataatsimoorlutik Inatsisartuni qinigaaffinnut 31-nut 12-inik qinigaatitaqarput.

Demokraatit Inuit Ataqatigiillu maanna kisimik Naalakkersuisoqatigiilernerat pissutigalugu Inatsisartuni inissat kiisalu siunnersuisoqatigiinni, aalajangiisartunilu ilaasortaatitat agguataaqqinneqarput.

Partiit sinneruttut suleqatigiilernermini nutaami ilaasortaatitatik agguataarinermi sunniuteqarsinnaanerutinniarlugit ataqatigiissippaat.

Atassut tunuanngikkallarmat naalakkersuisoqatigiit ataatsimiititaliani assigiinngitsuni 56-inik ilaasortaaffeqarput. Siumut Nalerarlu 16-inik ilaasortaatitaqarlutik.

Demokraatit Inuit Ataqatigiillu Naalakkersuisoqatigiinni nutaani maanna 42-nik ilaasortaatitaqarput. Siumut, Naleraq Atassullu taamaalillutik 28-nik ilaasortaatitaqarlutik.

Ataatsimiititaliani ilaasortat agguataarnerat

Atassut, Demokraatit Inuit Ataqatigiillu naalakkersuisoqatigiinnerminni Inatsisartuni ataatsimiititaliani ataatsimut 56-inik ilaasortaatitaqarput.

Naleraq Siumullu 16-inik aamma ilaasortaatitaqarlutik.

Atassut: 11
Demokraatit: 24
Inuit Ataqatigiit: 21
Siumut: 3
Naleraq 13

Atassutip naalakkersuisoqatigiinnit tunuarnerata kingorna agguataarnerat ilaalerpoq:

Demokraatit: 21
Inuit Ataqatigiit: 21
Siumut: 6
Naleraq: 14
Atassut: 8

Allisiguk

Pissaanermik sunniuteqartuni taarsersuinerit

Atassut Inatsisartut siulittaasoqarfiani ilaasortaatitaqarunnaarpoq. Taarsiullugu Mette Arqe-Hammeken (N) ilaasortanngorpoq.

Naleraq taamaalilluni siulittaasoqarfimmi marlunnik ilaasortaatitaqalerpoq, tassanimi Aki-Matilda Høegh-Dam ilaasortaareerpoq.

Aqqalu Jeremiassen (A) Aningaasaqarnermut Akileraartarnerullu ataatsimiititaliami siulittaasuugaluarpoq. Taanna maanna tunuarpoq, Vivian Motzfeldtimillu (D) taarserneqarluni.

IA aamma Atassut Nunanut allanut Sillimaniarnermut Ataatsimiititaliami Pipaluk Lyngep (IA) aamma Bentiaaraq Ottosenip (A) ilaasortaajunnaarneranni ilaasortaminnik annaasaqarput.

Taarsiullugu Bo Martinsen (D) aamma Erik Jensen (S) ataatsimiititaliami ilaasortanngorput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.