Akuerineqarpoq: Nunatsinni nalunaaqutaq 2027-mi allanngoqqissaaq

Nunatsinni nalunaaquttap ingerlaqatigiiffia ukioq ataaseq missaa qaangiuppat allanngussaaq.

Nalunaaquttap ingerlaqatigiiffia UTC-3-mi atorneqalissaaq. Inatsisartut tamanna sisamanngornermi aalajangerpaat.

- Tamanna isumaqarpoq, nalinginnaasumik ukiuunerani nalunaaqutaq akunnermik ataatsimik kinguartikkutsigu, aappaagu nalunaaqutaq nalunaaquttap akunnerinik marlunnik kinguartissagipput, Jens-Frederik Nielsen (D) oqaluttarfimmit oqarpoq.

Naalakkersuisulli siulittaasuata siunnersuutip kingunerisaanik sunniuteqarnerlunnerit arlaliussasut aamma erseqqissaatigaa.

- Aningaasaqarnermut Naalakkersuisoqarfiup missingersorpaa nalunaaquttap ingerlaqatigiiffiata allanngortinneqarnera ataavartumik inuiaqatigiit tamarmiusut aningaasaqarnikkut sunnernerlunneqartussaasut, ilanngullugu aningaasanut inatsit sunniuteqarnerlunnermik malitseqartussaasoq, Jens-Frederik Nielsen oqarpoq.

Taassuma timmisartumik angalanerit ikinnerusut akisunerusullu, peqqinnissaqarfimmut kingunerluutit aamma ualikkut qaamanerunerani timersornissamut periarfissat ajornerulerneri aamma eqqaavai.

- Taamaattoq Inatsisinut Ataatsimiititaliami amerlanerussuteqartut inassuteqaataat Naalakkersuisut ataqqivaat aammalu aalajangiineq Inatsisartut akueriumaagaat malissamaarlugu, Jens-Frederik Nielsen oqarpoq.

Nalunaaquttap ingerlaqatigiiffiata 2023-p siornani atuuttumut utertinneqarnissaa Siumut siunnersuutigaa.

- Nuannaartorujussuuvugut, Erik Jensen (S) oqaluttarfimmit oqarpoq:

- Suliaq suliarineqarnera ilungersunarsimavoq. Innuttaasunut, piniartunut aalisartunullu sineriammeersunut qujanaq.

Nalunaaquttap ingerlaqatigiiffiata allanngortinneqarnissaa 16-init akuersissutigineqarpoq arfineq-marlullu taasinatik. Nunatsinni nalunaaquttap ingerlaqatigiiffia nutaaq, UTC-3 taamaalilluni 2027-mi aggustip 31-anni atuutilissaaq.

Aasaanerani nalunaaqutaq

Aasaanerani nalunaaquttap aappaagumit atorunnaarsinneqarnissaa siunnersuummut siusinnerusukkut aamma ilaavoq. Inatsisinut Ataatsimiititaliarli taamaaliortoqassanngitsoq isumaqarpoq.

- Tamatumani ilaatigut isiginiarneqarpoq EU-mit siulliulluni aasaanerani nalunaaqutaqartarneq atuukkunnaarsinneqarpat assersuutigalugu Danmarkimut ukiuunerani nalunaaquttat nikingassutaat tassaassammata nalunaaquttap akunneri sisamat Danmarkimilu aasaanerani nalunaaqutaqartillugu nikingassutit tassaassammata nalunaaquttap akunneri tallimat, ataatsimiititaliaq allappoq.

Taamaammat ataatsimiititaliap aasaanerani nalunaaquttamik atorunnaarsitsinissaq EU-p atorunnaarsitsinissaanut utaqqissunneqartariaqarsoraa.

Tamannali Naleqqap siulittaasuanit, Pele Brobergimit isornartorsiorneqarpoq, taanna kalaallinut inunnut malinninnani EU-mut Danmarkimullu taamaalilluni malinnittoqaqqittoq isumaqarpoq.