Amerlanerusut Timersoqatigiit Kattuffianni taasisinnaatitaalersut
Timersoqatigiit Kattuffiat immikkut ittumik ilaasortanut taamaallaat naatsorsuunneqassanngilaq.
Kattuffiit allat Timersoqatigiit Kattuffiata ataatsimeersuarnerani peqataanissamut, oqaaseqarnissamut taasinissamullu periarfissaqalissapput.
Timersoqatigiit Kattuffiat ataatsimeersuarnerup kingorna tusagassiuutinut nalunaarummi allappoq.
- Timersorneq nukittunerpaavoq kikkut tamarmik ataatsimoornerup iluani peqataasutut misigigaangata. Aalajangiinikkut matumani peqatigiiffinnut nunarput tamakkerlugu ullut tamaasa timersornermik, ataatsimoornermik kajumissutsimillu ingerlatsiviusunut peqataatitsinerput annertusivarput, siulittaasoq, Claus Nielsen tusagassiuutinut nalunaarummi oqarpoq:
- Tamanna timersornermi oqartussaaqataanerup nukittorsarneqarnissaanut aammalu amerlanerusut ataatsimoorluta sammivitsinnut ingerlarusunnerput sunniuteqarfigisinnaanissaannut pissusissamisoortumik alloriarneruvoq.
Kattuffiup immikkut ittumik ilaasortaannaanngitsut oqaaseqarnissamut taasinissamullu periarfissaqalernerat oqaluttuarisaanermi pingaarutilimmik aalajangernerunerarpaa.
- Kalaallit Nunaanni Timersoqatigiit Kattuffianniit kissaatigaarput peqataasut tamarmik piginnittutut misigisaqassasut. Immikkut ittumik kattuffimmut ilaasortaagaluaruit imaluunniit ilaasortaanngikkaluaruit, isumassarsiannik misilittakkatillu tunngavigalugit peqataasinnaasariaqarputit. Amerlanerusut tusarnaaraangatsigit aalajangiinerput pitsaanerulersarpoq, taamaalillunilu Kalaallit Nunaanni timersorneq nukittunerulersarluni, Claus Nielsen oqarpoq.
Ataqqinaammik ilaasortaq nutaaq
Kattuffik Nuummi sapaatip akunnerata siuliani ataatsimeersuaarpoq, tassanilu Timersoqatigiit Kattuffianni ataqqinaammik ilaasortamik nutaamik aamma toqqaasoqarpoq.
Pâviâraq Heilmann kalaallit timersornerannut ‘pingaarutilimmik angisuumillu ukiorpassuarni suliaqarsimanera pillugu ataqqinaammik ilaasortanngortinneqarpoq.
- Pâviâraq Heilmann ukiuni amerlasuuni kajumissutsimik sulisuusutut, aqutsisuusutut timersornermillu uummateqartuulluni timersornerup iluani immikkut ittumik suliaqarsimavoq. Suliai Kalaallit Nunaanni timersornerup ineriartortinneqarneranut nukittorsarneqarneranullu pingaarutilimmik sunniuteqarsimapput, timersortartunut, peqatigiiffinnut, kattuffinnut najukkallu inuiaqatigiivinut iluaqutaasumik, Timersoqatigiit Kattuffiat allappoq.
