Mittarfittaassaq ullumi ammassaaq: - Mittarfiliarput atornialerparput
Ilulissani nunanut tamalaanut mittarfissaq ullumi ammassaaq taamaalillunilu Kalaallit Nunaanni attaveqaasersuutinik alliliinerujussuaq aallarnerneqassaaq.
Mittarfiit nutaat maanna sanaartorneqaannassanngillat. Ineriartortitsinermulli atorneqassapput.
Air Greenlandip pisortaanera, Jacob Nitter Sørensen, KNR-imit apersorneqaqqammerluni Københavnimit Ilulissat tungaannut timmisartuussinermut siullerpaamut ilaassalluni Danmarkiliartoq, taama oqarpoq.
- Tamanna mittarfiliornissaq 2015-imi isumaqatigiissutigineqarmalli piareersarfigaarput. Taamaattumik ukiuni aqqanilinni piareersarnerit maanna naammassipput, taanna KNR-imut taama oqarpoq.
Air Greenlandimi pisortap ammaanersiorneq - mittarfiliornissamullu aningaasaliinerit siammasissumik isigalugit - nunatta ineriartorneranut pingaaruteqarluinnartutut allannguisutullu isigaa.
- Naatsuaranngorlugulu oqaatigissagukku, mittarfissualiornermit mittarfiit maanna atulerpagut.
Sanaartornerit, allanngortiterinerit naleqqussarnerillu sivisupput, pisortap Greenland Airportsip ukiorpassuarni suliai pillugit oqarpoq. Piviusullu nutaap aallartinnissaa qilanaaraa.
- Piviusoq nutaanngortussamut pinissarput qilanaaraara, tamanullu iluaqutaasussamik ineriartortitsiumaarnissarput neriuutigaara.
Takornariaqarneq ukioq naallugu inuussutissarsiutinngortikkusukkaa
Ilulissani mittarfik nutaaq aqqutigalugu Københavnimut toqqaannartumik aqqutissaqalissaaq, nunattalu avannaanut angalaneq ajornannginnerulissalluni.
Air Greenlandip mittarfik nutaaq takornarialerinermut pingaaruteqartorujussuussangatippaa. Pisortap Nuummi mittarfimmit nutaamit misilittakkat, nunanillu tamalaanit timmisartuussisarnerup periarfissanik nutaanik aammaassinera, innersuutigai.
- Mittarfiup Kalaallit Nunaannut pingaarutilerujussuanngornissaa qularutissaanngilaq, pingaartumik Avannaanut. Nuummut toqqaannartumik timmisartuussisalernerup sunniutai paasivagut, isumaqarpungalu Ilulissanullu sunniutissai minnerunavianngitsut, taanna oqarpoq.
Ingerlatsiviup Kalaallit Nunaanni illoqarfiit annersaata pingajuannut nunanit tamalaanit timmisartuussisoqartarnissaa aallaqqaammulli naatsorsuutigaa.
Jacob Nitter Sørensenip oqarnera naapertorlugu, tamanna Air Greenlandip Kalaallit Nunaata ineriartorneranut nunamullu attaveqarnermut tapersersuinissap suliassaanut ilaaneranik pissuteqarpoq.
- Air Greenlandimmi tamanna siunertarivaa - Kalaallit Nunaata ineriartortinnissaa. Tamannalu uuminnga toqqaannartumik timmisartuussisalernissamik aaqqissuussinikkut angussavarput.
Ilulissanut ukiuunerani takornariaqarnerulernissaa anguniakkat pingaarnersaasa ilagaat. Taamaalinerani inissaqartitsisoqarpoq ingerlatseqatigiiffillu tamatumunnga atorluaaqataarusuppoq.
Takornarialerineq qaammatini arlalinni ingerlanneqarsinnaasuuppat, pisortap oqarneratut, tamanna najukkami takornarianik sullissisunut akunnittarfinnullu nutaanut aningaasaliisoqarnissaanut tunngavissagissaartitsinerulissaaq.
Nunatsinni takornariaqarnerup annertusarniaraanni tamanna iliuusissat siullersaattut pingaaruteqarnera nunatsinni aningaasaqarnermut isumalioqatigiissitap ukiaanerani nalunaarusiamini aamma erseqqissaatigaa.
Tamatumunngalu Jacob Nitter Sørensenip oqarneratut, Air Greenlandip nunarsuarmi angalatitsivinnik, takornarialerisunik Visit Greenlandimillu suleqateqarnerunissaa pisariaqarpoq, angalanissat pilerinartut ukioq naallugu ineriartortinneqarlutillu tuniniarneqarniassammata.
- Ukiuunerani takornariaqarneq annertunerulersissinnaagaanni, takornarialerineq ukioq tamaat inuuniutaasinnaanerulersissinnaavarput. Tamannalu najukkami takornarialerisut amerlanerulernissaannut pilerinarsaanermi pisariaqarpoq. Tamannalu akunnittarfinnut amerlanerusunut aningaasaliinissamut aamma pilerinarsaataassaaq.
Naatsorsuutigisani isertuutinngilai.
- Isumaqarpunga tamanna arlalitsigut allannguilluinnassasoq. Suliaqarnerup tungaatigut Kalallillu Nunaata aningaasaqarneranut tapersiilluarnerussaaq.
Timmisartoq nutaaq Avannaanut iluaqutaassasoq
Mittarfeqalernermit Air Greenland sumiiffimmi timmisartuussinerusalissaaq.
Ammaanersiortoqareerpat Jettimemiit Boeing 737-800 siullermik timmisassaaq, Air Greenlandimiillu Airbus A320neo nutaaq 2027-mi upernaakkut timmisalissangatinneqarpoq. Taanna Unaamik ateqassaaq.
Timmisartoq Ilulissani nunattalu avannaani pingaarnertut atorneqassaaq, Nuummulli angallannermut aamma ilassutaassalluni. Københavnip Ilulissallu akornanni piffissami angalasoqarnerpaaffiusumi timmisartuussinerit sapaatip akunneranut arfinillit tikillugit amerlassuseqartinneqartarnissaat pilersaarutaavoq. Ukiuunerani pingasunngornikkut timmisartuussisoqartassaaq, saniatigullu juullip ukiortaallu akornanni marsillu qaammataani timmisartuussinerit saniatigut ilaneqassallutik.
Timmisartumut ilaasut amerlanerusut taamaalillutik nunatta avannaanut, inissiaqartitsinermut maannamut killeqarsimasumut ingerlasalissapput.
Kangerlussuup nunanut tamalaanit Ilulissanut angalasunut qitiusumik mittarfiusimasup matuneqarnerata kingorna Nuummit nunap iluani angallanneq pisariaqarluinnalerpoq. Pisortap oqarnera naapertorlugu tamanna timmisartuutileqatigiiffiup ilaasussanik qanoq amerlatigisunik angallassisinnaaneranut killiffiliivoq.
Qaqortumi mittarfik nutaaq nunatta kujataani timmisartuussinermi siusinnerusukkut killiffilersuutaasimasut ilaannik aamma piuneerutsitsivoq.
- Nuummi suliniutitsinnik annikinnerulersitsinianngilagut. Sumiiffiit allat suliniuteqarfigineruinnarpagut aporfiimmi killiffilersuutillu annikillipput, Jacob Nitter Sørensen oqarpoq.
Taassuma mittarfiit nutaat nunatsinni timmisartuussinermut ataatsimut pitsaanerusumik sunniuteqarnerulersitsinissamut periarfissatut isigai.
Inissaqassuseq pillugu mianersortumik neriuuteqartoq
Pisortap mittarfittaami periarfissarpassuaqarnissaa naatsorsuutigigaluarlugu Nuummi nunanut tamalaanut mittarfiup ammarneqarneratulli ajornartorsiuteqarsinnaanera eqqumaffigigaa.
Taannali mianersortumik neriuuteqarpoq, Greenland Airportsilu Nuummi misilittagaqarlualersimasoraa.
- Greenland Airportsip tungaaniit Nuummi ilikkagarpassuaqartoqarlunilu misilittakkanik atuilluartoqartoq takusinnaasoraara. Akerlinganilli maani mittarfik angivallaanngilaq.
Taassuma mittarfiup illutaata sinaakkutai piffissaq ungasinnerusoq eqqarsaatigalugu ernumassutigineruai.
- Inissaqassuseq ernumassutigilaarsinnaavara. Iluatsilluarnermimmi ajornartorsiuteqartoqalersinnaasoq oqaatigineqarsinnaavoq. Piumaneqassuserli ineriartulaaruni inissaqartitsinermik ajornartorsiuteqalissaagut.
Inuiaqatigiinnut tamanut iluaqutaassasoq
Air Greenlandip ammaanissaq timmisartuutileqatigiiffiup aningaasaqarneranik nukittorsaanissamut aamma tunngassuteqarpoq.
Nunatsinni silaannakkut angallassinermik ingerlatsineq orsussap sillimmatissallu akitsoriartornerat ilutigalugu akisuneruleriartorpoq, nunanit allaniillu takornarianit isertitat timmisartuutileqatigiiffiup nunap iluani timmisartuussinerata aningaasalersorneranut iluaqutaasinnaapput.
- Takornarianik tikeraanillu nunatsinnut angallassinermit aningaasassarsisinnaagutta nunatta karsiata akileraartartullu akiliuteqartinnagit inuiaqatigiit sinnerinut pitsaanerusumik kiffartuussisinnaavugut, Jacob Nitter Sørensen oqarpoq.
Pisortap tamatuma saniatigut angallassisoqarnerulernera najukkani suliffissanik amerlanerusunik pilersitsiffiussasoq naatsorsuutigaa.
Air Greenland Ilulissani timmisartorsuarnik isumaginninnissamut, ilaatigut angallannermik usilersuinermillu suliaqartussanik amerlanerusunik atorfinitsitsereerpoq. Ukiuunera takornariaqarneq ineriartussappat akunnittarfinni, soorlu Air Greenlandimit pigineqartumi Hotel Arcticimi najukkamilu ingerlatsiffiusuni aamma suliffissaqarnerulersinnaavoq.
Taassuma ammaanerup sunniutai piffissap ingerlanerani aatsaat takuneqarsinnaalertussat piffissamut ungasinnerusumut eqqarsaatiginninnermik aningaasaliinertut isigaa.
Aningaasaliisut nioqquteqarfiusup qanoq ineriartornera takoqqaassavaat, aatsaat taava aningaasaliinerit nutaat pilersaarusiorneqarsinnaalissapput.
- Ukiut qulit ingerlareerpata kingumut qiviarluta mittarfinnut ukununnga aningaasaliinitta qanoq pitsaatiginera takusinnaalissagipput qularutiginngilara.
Ilulissani mittarfiup ammarneratigut aningaasaliinissat nutaat pingaarutilimmik tunngavissinneqassapput. Attaveqaatit nutaat siuariartornermut iluaqutaatilernissaanik suliaqarneq maanna allartilerpoq.
- Mittarfik ineriartornissamut aningaasaliinissamullu tunngaviuvoq. Tunngaviusoq maanna inissinneqarpoq. Maanna ineriartortoqalernissaa takusinnaalissagipput isumaqarpunga.
