Sammisaq: Takornariaqarneq

Topasip pisortaa: Najukkami suliffeqarfiit suliassagut tigusinnaajuaannanngilaat

Topasip najukkami suliffeqarfiit suliassaarutsinnianngilaat. Takornariaqarneq pillugu inatsilli atuutilerpat sumiiffinni arlalinni suliffeqarfiit amigaataassapput.
- Siunertarineqartoq (takornariaqarneq pillugu inatsimmi aaqq.) paasisinnaalluarpara. Pisuttuarluni angallassineq allanik suliarineqarsinnaappat tamanna Topasimut ajornartorsiutaanavianngilaq. Taamali neqerooruteqartoqanngikkuni angalasut akiligaanni sammisassamik amigaateqassaagut. Assi © : KNR
Allattoq Isak Hüllert
novembarip 19-at 2026 07:31

Angalatitsivissuit Topas aamma Albatros nunatsinni takornariaqarnermik suliaqarnermi ukiorpassuarni siuttut ilaanniipput.

Taakkuli inissisimanerat najukkami takornariaqarnermik suliaqartut akornanni ernumassutigineqarpoq, taakkumi suliffeqarfissuit sullitassanik tigumminnillutik isertitat ilarujussuinik pissarsisarnissaat ernumassutigaat.

Isornartorsiuineq tamanna KNR-ip Ilulissanut oktobarip naanerani tikeraarnermini najukkami takornarialerisunit arlaleriarluni tusarpaa.

LÆS OGSÅ: INDSÆT ILULISSAT OPERATØR TEKST 

Topas Travelimi pisortap, Michael Sloth Højgaardip Disko Linemilu siuttup ernumassuteqartoqarnera paasisinnaalluarpaa.

Sunali tamaat ajornaatsuinnaanngissoraa.

- Attaveqatigiinnermiipput. Disko Linep nammineq ilai suliarisarpai ilaalu allanit pisiarisarlutigit, taanna KNR-imut oqarpoq.

Pisortalli oqarnera naapertorlugu Topas najukkami tapiissuterpaalunnik pisisarpoq. Ilaatigut umitsiamik assartuineq, aserfallatsaaliuineq, nerisassaq angallassinerlu. Suliffeqarfik tamatuma saniatigut najukkameersunik sulisoqartarpoq.

-  Suliffeqarfiit Topasitut ittut ataqatigiiaartorpassuaqarfiuvoq, tassa amerlasuunik sulisunik akileraartartunik sulisoqarpugut. Nioqqutissarpassuarnik pisisarpugut, sannavinnillu ingerlatitsilluta, assersuutigalugu najukkamiittunit takornariaatigut illoqarfimmi ingerlanneqartarput, taanna oqarpoq.

Najukkami periarfissanik amigaateqartoqartoq

Angalatitsivissuit ataatsimoortunik neqerooruteqarneq aamma nunat tamalaat akornanni inniminniinermut aqqutit aqqutigalugit takornarianut attaveqarnerup annerpaartaa aqukkaat, najukkami takornariartitsisut akornanni ernumassutigineqarnerpaavoq.

Michael Sloth Højgaardip oqarnera naapertorlugu suliffeqarfissuit najukkami suliffeqarfinnut mattussinissaannut tunngassuteqanngilaq.

Taassuma Topasip misigisassarsiortitsinerit arlallit najukkami suliffeqarfinnit pisiarerusukkaat tamannali periarfissaajuaannanngitsoq erseqqissaatigaa.

- Siunertarineqartoq (takornariaqarneq pillugu inatsimmi aaqq.) paasisinnaalluarpara. Pisuttuarluni angallassineq allanik suliarineqarsinnaappat tamanna Topasimut ajornartorsiutaanavianngilaq. Taamali neqerooruteqartoqanngikkuni angalasut akiligaanni sammisassamik amigaateqassaagut.

Illoqarfiit minnerit soorlu Qasigiannguit najukkami takornariaqarnermik suliaqartunik, suliassanik nangitsisinnaasumik amigaateqarsoraa.

Ilulissani pissutsit allaanerupput. Topasip Diskole Line suliffeqarfiup ilaasartuinut takornariartitsisoq ilaatigut suleqatigineqarpoq.

Pisortap tamatuma saniatigut takornariaqarnermi ataatsimoortumi isornartorsiuinermi ersersinneqartutut Topas taama initutigisorinngilaa.

- Topasip takornariat immaqa tusindit ataallugit amerlassuseqartut ukiumut Kalaallit Nunaannukartittarpai. (…) Taakku takornariartorpassuit ilaminiinnarai.

Inuussutissarsiornermut Aatsitassanullu Naalakkersuisoqarfiup Ilulissani suliffeqarfinnit ataasiakkaanit takornariat qanoq amerlatigisut sullinneqarnersut kisitsisaatiginngilaa. Naalakkersuisoqarfiup oqarnera naapertorlugu takornariartitsisut ataatsiakkaat naatsorsuusiaanik ilisimannittoqanngilaq.

Najukkamiittuut Topasip takornariartitaanit aamma isertitaqartartut

Michael Slot Højgaardip najukkami inuussutissarsiummik ingerlatsisut, suliffeqarfissuarnut isornartorsiuisut, taakku suleqatiginerisigut aamma isertitaqartartut erseqqissaatigaa.

Taassuma Avannaata Kommuniata borgmesteria, Lars-Erik Gabrielsen takornariaqarnermik suliffeqarfimmik aamma ingerlatsisoq ilaatigut oqaatigaa.

- Taanna isornartorsiuisutta siuttuisa ilagigaat nalunngilara, kisianni aamma taanna uagut piunitsinnit kaaviiaartitaqangaatsiartut ilagaat, pisortaq oqarpoq.

Borgmesterip takornariaqarnermik suliffeqarfiutimi Topasimit angallassisarnera eqqunnginnerarpaa.

Lars-Erik Gabrielsenip Disko Linep suliffeqarfiutini aasap ingerlanerani angallammik atorneqarsinnaasuuteqarnersoq paasiniarlugu attaviginiarsimasinnaagaa oqaatigaa.

Lars-Erik Gabrielsenilli oqarnera naapertorlugu nammineq suliffeqarfiutini taakku pillugit kaaviiaartitarpassuaqartoq danskit pisortaanerata oqaatigiguniuk taava sallulluinnarpoq.

KNR-ip pisortaq angallassinernut pineqartunut akiligassat allagartaanik saqqummiusseqqusivoq, akissuteqarfigineqarnissaminulli suli utaqqilluni.

Topas Namminersorlutik Oqartussanut immikkut akuersissuteqarfigineqarnissaminut qinnuteqarami suliffeqarfiup suliaqarnera kalaallit aningaasaqarneranut qanoq tapiissuteqartarnera nassuiaatigaa

Pisortap oqarnera naapertorlugu Disko Linep piginnittuunissamut piumasaqaatit nutaat pillugit ukiunik marlunnik immikkut akuersissuteqarfigineqarnera najukkami tunngaveqarnerminik, kalaallinik sulisoqarnermik, aningaasaqarnikkullu tapiissuteqarnermik ilaatigut tunngaveqarpoq.

Inuussutissarsiornermut aatsitassanullu naalakkersuisoqarfiup Disko Line aamma Albatros Arctic Circle immikkut akuersissuteqarfigineqarnissamik qinnuteqarsimasut, KNR-imut uppernarsarpaa.

Disko Line suliffeqarfissuup Topas Explorer Groupimut ilaavoq, Albatros Arctic Circlelu Albatros Travelimut ilaalluni.

Albatros Circle immikkut akuersissuteqarfigineqartoq, naalakkersuisoqarfiup paasissutissiissutigaa. Topasip pisortaata oqarnera naapertorlugu Disko Line ukiunik marlunnik aamma akuersissuteqarfigineqarpoq.

Topas Explorer Group suliffeqarfia misigisassarsiornissamik neqerooruteqarneq ajorami immikkut akuersissuteqarfigineqarnissamik qinnuteqanngilaq.

Immikkut akuersissut ilaatigut suliffeqarfiup aningaasaqarnikkut tapiissutaanik, kalaallinik susoqarneranik aamma najukkami suliffeqarfinnik suleqateqarneranik naliliinikkut tunniunneqartarpoq.

Ilulissat eqqaanni takornariaqarnermik suliaqartut 18-it maannakkut takornariartitsinermut akuersissummik imaluunniit immikkut akuersissummik maannamut pissarsereersut, naalakkersuisoqarfik paasissutissiivoq.

Albatros: Tamatigut iluanaarutaaneq ajorpoq

Albatros Travel KNR-imit apersorneqarusunngilaq, tusagassiortunullu siusinnerusukkut akissutini tusarniaanermilu akissutini innersuussutigalugit.

Suliffeqarfilli Ilulissani najukkami takornariartitsisartup isornartorsiuinerisa ilaannut allakkatigut oqaasertaliivoq.

Claus Foss Hansenip WhaleToursimeersup Albatros Travel  takornariaqarnermut inatsimmi immikkut akuersissuteqarfigineqanngikkuni Kangerlussuarmi akunnittarfimmik sulianillu allanik matusinissamik sioorasaaruteqarsimasoq tusarsimallugu KNR-imut oqaatigaa.

Angatitsiviup pilersitsisuata, Søren Rasmussenip tamanna eqqunnginnerarpaa.

- Sioorasaarisimanata isumaqarpunga, kisianni takornariartitsisoqarsinnaanngikkuni taava takornariartitsisoqassanngilaq, Søren Rasmussen oqarpoq.

Suliffeqarfik tamatuma saniatigut takornariaqarneq pillugu inatsimmi siunertarineqartut inuussutissarsiornermi pissutsit piviusut eqqarsaatigineqarnerat naammanngitsoq isumaqarpoq.

Albatrosip oqarnera naapertorlugu takornariartitsinermi suliarpassuit piffissap sivikitsuinnaap iluani takornariaqartarnera pissutigalugu iluanaarutaaneq ajorput. Taamaammat takornariartitsiviit angisuut tunuartariaqalissappata suliaqartussanik nutaanik nassaarniarnissaq ajornakusoorsinnaavoq.

Aningaasaliingaatsiarnissat pisariaqarajuttarput, taakkulu matussusernissaat ajornakusoorsinnaasarpoq.

Suliffeqarfiullu takornariaqarnerpaaffiusartumi takornarianik sullissisinnaassuseqarneq pingaartumi Ilulissani aamma amigaataasartoq erseqqissaatigaa.

Inuussutissarsiornermut aatsitassanullu naalakkersuisoqarfiup takornariaqarneq pillugu inatsimmi nunatsinni innuttaasut takornariaqarnermik inuussutissarsiuteqarnermi salliutinneqarnissaannik qulakkeeriniarnissaq aamma takornariaqarnermi pilersitsinerup annerpaartaa inuiaqatigiinnut kalaallinut iluaqutaanissaa siunertarineqartoq paasissutissiissutigaa.

Piginnittuunermut piumasaqaatit nutaat suliffeqarfinnut pioreersunut 2027-mi januaarip aallaqqaataani atuutilissapput.

Kisianni Disko Line aamma Albatros Arctic Circle 2029-mi januaarip tungaanut immikkut akuersissuteqarfigineqareerput.

Naalakkersuisut allannguutissatut siunnersuut, suliffeqarfinnut januaarip aallaqqaataat 2025 sioqqullugu pilersinneqarsimasunut ukiut tallimat tikillugit immikkut akuersissuteqarsinnaalersitsisussaq maanna siunnersuutigaat.