Narsarsuup mittarfiata matuneqarnera Qassiarsummi takornariartartut amerlassusaannik affaannangajanngortitsisoq

Naasunnguaq Karen Lundip apersorneqarnissani annilaanngatigilaarpaa.  

Taassuma oqaasissani piareersarluaraluarpai, nunaqarfiulli siunissaanut tunngassuteqarnera pissutigalugu taamaaliorneq nalorninartumik kinguneqarsinnaavoq. 

- Pisoq tamatsinnut sunniuteqartorujussuuvoq, Naasunnguaq Karen Lund oqarpoq.

KNR-ip taanna cafémi anginngitsumi qattunerni ivigaasuni, Qassiarsuup ilisarnaataanni inissisimasumi, Narsarsuup mittarfiata matuneqarnera nunaqarfiup takornariaqarneranut qanoq kinguneqarnera pillugu oqaluunniarlugu naapippaa.

- Massakkorpiaq artornarpoq pikkunarlunilu. Tapersersoqatigiinnissarput pisariaqartinneqarpoq, Naasunnguaq Karen Lund oqarpoq. 

Uinilu takornariartitsinermik ingerlataqarlutik suliffeqarfiuteqarput, tikeraat Qassiarsummi ullut arfineq-pingasut ingerlaneranni hestertitaasarlutillu kulturitsinnik ilinniartinneqartarput. Aappariit tamatuma saniatigut 600-ngajannik savaateqarput.

- Savaateqarneq aningaasatigut maannakkut iluatsitsiffiulluarpallaanngilaq, taamaattumik allamik aningaasarsiuteqarsinnaaneq pitsaasorujussuuvoq, Naasunnguaq Karen Lund oqarpoq. 

Qassiarsummut juulip qeqqa takornariaqarnerpaaffiusaraluarpoq, KNR-illi nunaqarfik ukioq manna tikeraarmagu tikeraat allat ikittuaraannaapput.  Assi © : Emil Weis / KNR

Naak Qassiarsummi takornariartitsisarneq ajornakusoorneruleraluartoq, Naasunnguaq Karen Lundip ajornartorsiornerup allamik kinguneqarsinnaanissaa neriuutigaa.

Nunaqarfimmi utoqqarnut meeqqanullu sanaartornissaq pineqarpoq.

Takornariaqanngingajavissoq

Aviaja Lennert, nunaqarfimmi tassani unnuisarfiutillip, takornariaqarnerup ukioq manna qanoq ingerlasimanera pillugu toqqaannarnerusumik oqaluttuarpoq.

- Sussaanngilaq, Aviaja Lennert oqarpoq.

Takornariat ukioq manna 44 procentimik ikileriarput, Aviajalu kisimi takornariat ikileriarujussuarnerannik eqqugaanngilaq.

- Qassiarsummi takornarianik sullissisut amerlanerit, takornariat 30 procentit sinnerlugit ikileriarnerannik nalaataqarsimanerat ilimagaara, Aviaja Lennert oqarpoq.

KNR-ip Narsarsuarmi tusarfiit arlallit oqaloqatigai, taakkualu Narsarsuarmi Qassiarsummilu 40 procentit missaanni ikileriartoqarsimanera missingerpaat.

- Takornariarfigineqartartoq nuannarineqartorujussuuvoq, maannali tassanngaannaq takornariarpassuaqarunnaavippoq, Aviaja Lennert oqarpoq.

Taassuma oqarnera naapertorlugu takornariat 2.000-it 3.000-illu missaanniittut qallunaatsiaap Erik Aappalaartup qarmagakuisa aseqqukuinut, Qassiarsuup Unescomit maanna eriagisassanngortitaassutigisaanut, ukioq kingulleq takornariarput.

Qassiarsummi Erik Aappalaartup Qassiarsummi naalagaatitaaffianiit ujaqqat ukiumit 985-imeersut suli takusinnaavatit. Qarmakkanit illuliat takuneqarsinnaasut ilai qarmakkat pissusitoqaatut sanaqqitaapput. Assi © : Emil Weis / KNR

- Siornatigut takornariarpassuaqartaraluarpoq, maannali inoqanngilluinnarpoq, Aviaja Lennert cafémi inoqarpianngitsumut qimerluujutigaluni oqarpoq:

- Qaqortumi angallatinik angallassisartut amerliartuinnarput, taakkuali kangerlummut maanga tikinneq ajorput. Disko Line kisimi tikittarpoq. Qaqortumut timmisartornissamut bilitsit tamanna ilutigalugu akisunerulerput, aamma Narsarsuarmisulli toqqaannartumik Europaliartoqarsinnaanngilaq.

Siunissaqarnissamik neriuuteqarneq 

Naasunnguaq Karen Lundimut ukioq manna taama sakkortutiginngilaq. Takornariat 14 procentiinnarnik ikileriarnerat taassuma nalaappaa.

Qassiarsuup nutaamik periarfissaqalerumaarnera taassuma neriuutigaa.

- Timmisartoqarfiup matunnginnerani pissutsit utertinneqarsinnaanngillat. Iluatsissavarput. Pinngitsoornata, Naasunnguaq Karen Lund ernini nukarleq marlunnik ukiulik chipsinik tunissutisiaminik poortukkanik arpalluni takkunnerani oqarpoq.

- Iliuuseqarta. Utoqqaat pillugit, meerartagut pillugit. Uagununa kinguaariittut nutaamik pilersitsisariaqartugut.

Naasunnguaq Karen Lundip tikeraat ilai Qaqortumut timmisartukkut aallartariaqarnertik tassanngaanniillu umiarsuarmik Qassiarsummut angalasariaqarnertik ajuusaarutigisareeraat, oqaluttuaraa. Assi © : Emil Weis / KNR

Naasunnguaq Karen Lundili mittarfik pillugu suli neriuutaarutivinngilaq:

- Narsarsuarmi arlaannik pisoqarnissaa mittarfillu arlaannit ammaqqinneqarnissaa neriuutigilaarpara. Tamatumalu ajornarluinnarnissaa ilimaginngilluinnarpara, Naasunnguaq Karen Lund oqarpoq.

Aningaasaliinerit ilungersunartut

Naasunnguaq Karen Lundip Qassiarsummi ukiut qulit matuma siorna tikeraat siulliit hiistimik angalaaqatigiinnissamut qaaqquai.

Islandimiut hiistii mikisut meqqullit savanik paarsisutut ukiukkut atorneqartarput, aasakkullu takornarianik qaqqajunnani angalassutigineqartarlutik.

- Atortunut, unnuisarfiutitsinnut UTV-nullu aningaasarpassuit aningaasaliissutigaagut. Aamma hiistilerineq nuannaraara, soorunami aamma suliffimmik taamaattumik pilersitsineq ineriartortitsinerlu suliarujussuuvoq, Naasunnguaq Karen Lund oqarpoq.

Tikeraat nunarsuarmit nunanit tamalaaneersut Naasunnguaq Karen Lundimut hiistimik angalaarnissamik inniminniisarput. Takornariat kalaallit kulturiannik tikeraaraangamik soqutigisaqartorujussuusarnerat taassuma oqaluttuaraa.  Assi © : Emil Weis / KNR

Taassuma Qassiarsummi siunissaq pillugu qanoq inissisimasoqarneranik erseqqissumik paasisaqannginneq pissutigalugu siunissap ilungersunartumiinnera oqaluttuaraa:

- Narsarsuarmi mittarfiup matuneqarnissaa ullulerneqarmat, Narsarsuarmi nutaamik pilersitserusuttut niuertarfiliorusuttullu arlaqaraluarpugut taamaattorli itigartinneqaannarpugut, tamannalu ajuusaarutigaara, Naasunnguaq Karen Lund oqarpoq:

- Sumiiffiit tamakkua qanoq atorniarneraat naluarput. Sunik tamanik matusinnginnerminni tamanna eqqarsaatigisimasinnaagaluarpaat.