Milliardilikkaanik amigartooreernerup kingorna, Naleraq: Mittarfissuit sooq ajutoorpat?
Naleraq Greenland Airportsip ataatsimeersuartitsinermini 2,7 milliard koruuninik amigartooruteqarluni 3 milliard koruunillu missaannik nalilinnik naleqannginnerulersitsinerminik kiisalu nammineq aningaasaatiminik amigartooruteqarluni saqqummiinerata kingorna mittarfissuit pillugit isornartorsiuingaatsiarpoq.
Partii pilersaarummi kukkussuteqarsimanerujussua kisitsisitigut takuneqarsinnaasoq isumaqarpoq, Naleqqamiillu ukiuni arlalinni isornartorsiorneqartarsimasoq uppernarsisillugu.
Partiip isumaa naapertorlugu aningaasatigut kingunerisassat pillugit misissuinernik naammattunik nutarterneqarsimasunik aamma piviusorsiorpalaartunik misissueqqissaarnernik peqartoqarani mittarfissuarnut milliardilikkaanik aningaasaliisoqarsimavoq.
Naleqqap aamma sineriammi, nunaqarfinni isorliunerusunilu innuttaasorpassuit akisoorujussuarnik, sivisunermik, aqqutinik navianarnerusunik aqqutikinnerusunilu angalasariaqarnerat saneqqutiinnarlugu mittarfissuarnut aningaasaliisoqarsimanera oqaatigaa.
Mittarfissuarnut nutaalianut akerliunngitsoq
Partii mittarfissuarnut nutaanut akerliunnginnerminik erseqqissaavoq, taamaakkaluartorli aningaasatigut tunngavigisat piviusumiit naapertuutinnginnerujussuat pillugu naalakkersuisut innuttaasunut nassuiaasariaqarsoraat.
- Naleraq mittarfissuarnut nutaanut attaveqaasersuutinulluunniit pitsaanerusunut akerliunngilaq. Kalaallit Nunaat ineriartortinneqarnissamik aningaasaliiffigineqarnissamillu pisariaqartitsivoq. Pisortalli suliffeqarfiutaat koruuninik milliardilikkaanik naleqannginnerulersitsisariaqarpat saniatigullu aningaasatigut tunngavigisat atorsinnaannginnerinik nassuerutiginnippat suut ajornartorsiutaasimanerannik naalakkersuisut nassuiaateqarnissaminnik pisussaaffeqartut tusagassiuutinut nalunaarummi allaqqavoq.
Naleraq ingerlatsinermi aningaasartuutit amerliartorneri milliardilikkaanillu naleqannginnerulersitsisariaqarsimanerit naalakkersuisut qanga paasisimaneraat suliniutillu aningaasaqarnera pillugu Inatsisartut innuttaasullu eqqortumik paasitinneqarsimanerat pillugu ilaatigut paasiniaavoq.
- Kalaallit Nunaata ineriartornera tamatsinnut iluaqutaasussaavoq – sineriammi, nunaqarfinni isorliunerusumilu innuttaasut pilliutiginagit, Inatsisartunut ilaasortaq Naleqqameersoq Jens NapãtôK tusagassiuutinut nalunaarummi taama allappoq.
Naleqqap qanoq isumaqarnera partiip siulittaasuata facebookiani aamma ersarippoq. Taassuma naalakkersuisut piviusorsiunngitsutut piginnaasakitsutullu weekendip ingerlanerani ikkussamini saqqummiummagit.
