Maanna piffissaq nunatsinni takornariaqarnerpaaffiuvoq, takornariallu ukioq manna amerlaneroqqipput.

Nuummi nutaamik mittarfeqalernerata ilutigisaanik takornariat USA-mit Europamiillu toqqaannartumik tikissinnaalerput, tamatumalu saniatigut umiarsuit takornariartaatit sineriammut tikikulanerullutik.

Visit Greenlandip oqarnera naapertorlugu umiarsuit takornariartaatit ukioq manna nunatsinnukartutut nalunaarsorneqartut 800-t sinneqarput – aatsaallu taama amerlatigalutik.

Ineriartornerli nunatsinni sumiiffinni assigiinngitsumik malugineqarpoq.

Sumiiffinnimi arlalinni inuussutissarsiornerup ineriartulernerata innuttaasut nunaqavissullu inuussutissarsiortut akornanni naligiissaarniarnerani unammillernartoqartoq misigisimaneqarpoq.

Nuuk – ineriartornermi qitiusoq

Nuummi mittarfittaap ammarneqarnera ilutigalugu nunatsinnut tikittut amerliartulerput.

Takornariat amerlanerusut tikittalerput, illoqarfimmilu nutaanik periarfissaqalerlunilu nutaanik pisariaqartitsisoqalerpoq.

Attaveqaasersuutit, akunnittarfiit, misigisassarsiortitsinerillu ineriartornermut malinnaassapput, taamaammat illoqarfimmi pisinnaasatigut ilungersuasoqarpoq.

Air Greenlandittaaq silap qanoq innera pissutigalugu timmisartuussinissanik arlalinnik taamaatitsinerit, nakkutilliivimmi ajornartorsiuteqarneq utaqqinerillu sivisuut nalaappai.

Ilulissat – Piginnittuuneq pillugu oqallinneq

Ilulissani takornariat amerlassusaat pillugu unammillernartoqanngilaq – tassanili kikkut taakku iluanaarutigineraat ajornartorsiutigineqarluni. Tamannalu pillugu maanna oqallittoqarpoq.

Najukkami takornarialerisut umiarsuit takornariartaatit Ilulissanut tikikkaangata akunnermiuliullutik takornariartitsisut takornariartitsivissuillu suliassap ilarujussuanik suliaqartarnerat sumiiffimmilu suliffeqarfeeqqat annikippallaanik suliassaqartarnerat isornartorsiortuarpaat.

Nunatta kujataani angalassisussatut 2040-p tungaanut kiffartuussinermik isumaqatigiissuteqarfiusoq Greenland Cruisesimit Vela Linemillu atorneqartoq ilaatigut pineqarpoq.

Tamanna pissutigalugu Avannaata Kommuniani borgmesteri, Lars Erik Gabrielsen (S) ingerlatsivinnut taakkununnga isornartorsiuilluni Ilulissat umiarsualiviani umiarsuarnut takornariartaatinut – pisortanullu ’nipaatsumik akerliussutsimik takutitsisoqarnissaanut’ aggersaavoq.

Borgmesterillu akuliunnera inuussutissarsiuteqarnermut naalakkersuisup, Naaja H. Nathanielsenip (IA) tusagassiuutinut nalunaaruteqarluni aaqqiagiinnginneq imminut ilisimatitsissutigineqartoq tassa takornariat takornariartitsisullu siorasaarneqarlutillu suaartarfigineqarsimanerat "akuersaarneqarsinnaanngitsumik pissusilersornerunerarlugu" assuarlerpaa.

Taassuma tusagassiuutinut nalunaaruteqarnermini borgmesterip pisortani suliaqarnermik ilungersuutigisamillu ingerlatsinermik akulerussinera isornartorsiorpaa.

Naalakkersuisoq Ilulissanukartariaqartoq

Ilulissat Excursionsip pisortaata, Jan Cortsenip oqarnera naapertorlugu naalakkersuisoq nunatsinnut iluaqutaanngitsoq tunuartariaqartoq naalakkersuisup nalunaaruteqarnerata kingorna oqaatigaa.

Taanna facebookikkut videoliami ima oqarpoq:

- Nunavissut sullinnianngikkukkit, selskabillu ataasiakkaat sullinniarukkit pitsaanerunngila tunuaruit? Pitsaanerunngila akisussaaffiit suliassatillu allamut tunniukkukkit nunaqavissumut sullisserusuttumut?

Naaja H. Nathanielsen kalaallinut iluaqutaanngissoralugu oqaatsini naggaserpai.

- Kalaallinut nunaqavissunut ataasinnguamulluunniit iluaqutaanngilaq.

Tamatuma saniatigut Siumup siulittaasuata, Aleqa Hammondip Naaja H. Nathanielsen Ilulissanukarluni nunaqavissut takornarialerisut naapissagai kaammattuutigaa.

- Takornariaqarneq nunaqavissunut iluaqutigisussanngorlugu siunertaavoq taamaammalli nunaqavissut takornarialerisut misigisimapput Naalakkersuisumit oqartussaaffigineqartumit nipangersarneqarlutillu tusaaneqanngitsutut misigisimanerat. Tamanna Siumumit tusaanngitsuusaarnagu iliuuseqarfigeqqullugu matumuuna Naalakkersuisoq akisussaasoq kajumissaarparput tusarneqarnissamik kissaateqartut ornillugit susassaqartutut qanimut oqaloqatiginninnerit paaseqatigiinnissarlu anguniarlugu orniguttariaqartoq, Aleqa Hammond pingasunngornermi ullaap tungaani tusagassiuutinut nalunaarummi allappoq.

Visit Greenlandip pisortat oqartussaasuisa akerliussutsimik takutitsisoqarnissaanut kaammattuuteqarneq aamma mianersoqqussutiginikuuaa, nunaqavissullu isertitat nunaqavissunut pissarsiaqaataavallaannginnerannik misiginerat soorunami ernumanartuusoq aamma erseqqissaatigalugu.

Tamatuma saniatigut Sulisitsisut aaqqiagiinnginneq isornartorsiorpaat, tamannalu inuussutissarsiornermut nunattalu angalavissatut tusaamaneqarneranut innarleeratarsinnaasoralugu.

Paamiut – Takornariat ajornartorsiortitsisut

Paamiuni allamik unammillernartoqarpoq. Tassani piginnittuuneq pineqannginnerulluni takornariat amerlassusaat pineqarneruvoq.

Innuttaasut avataanit tikeraarpassuarnit akornusersorneqartarlutik misigisimapput, tassanilu kangerlunni aalisarneq umiarsuarnik angisuunik sumiiffinnut eqqissisimatinneqartunut ingerlaartoqartartoq misigineqarluni.

Takornariaqarnermut inatsimmi Inatsisartuni siorna akuerineqartumi umiarsuit ilaasartaatit nunatsinni sukkut ingerlasinnaanerat pillugu ersarissumik malittarisassaqaraluarpoq.

Zonekkaarinermimi umiarsuit sumiiffiit ilaat pinngortitaq, uumasoqassuseq najukkamiluunniit inuussutissarsiutigalugu piniartut eqqarsaatigalugit ingerlaffigeqqusaanngilaat.