Inatsisartut takornariartitsisarneq pillugu inatsimmut allannguutit akuersissutigigaat
Takornariartitsinermik ingerlatsinermi inatsit 2024-mi novembarimeersumi allassimavoq takornariartitsinermik ingerlataqartut Kalaallit Nunaanni angerlarsimaffeqassasut, suliffeqarfiullu minnerpaamik 2/3-iata nunatsinneersunit pigineqarnissaa piumasaqaataalluni.
Inatsilli iluarsiissuteqarfigineqarnissaa pisariaqartinneqartoq naalakkersuisut isumaqarput, inatsisartullu tamanna pillugu takornariartitsinermik ingerlataqarneq pillugu inatsimmut allannguuteqarnissaa aalajangerpaat.
Allannguutit ingerlatseqatigiiffinnut 2025-mi januaarip aallaqqaataa sioqqullugu pilersinneqarsimasunut tunnganerupput.
Ingerlataqartut ukiuni tallimani atuuttussamik immikkut akuersissuteqarsinnaanissaat siullertut siunnersuutigineqaraluarpoq.
Politikkikkulli isumaqatigiinniartoqareersorlu piffissaq taanna ukiunut marlunnut sivikillineqarpoq, suliani immikkut ittuni ukiut marluk angullugit ataasiarluni tamanna sivitsorneqarsinnaalerluni.
Ingerlataqartut taamaasillutik sivisunerpaamik ukiuni sisamani immikkut akuersissuteqarsinnaalissapput.
Sumiiffinni takornariartitsinermik ikittuinnarnik ingerlataqarfiusuni, takornariartitsinermilli ingerlatsiviunngitsuni immikkut akuersissuteqarnissamut piumasaqaat siunnersuummi taassuma saniatigut peerneqarpoq.
Kommunit nutaanik periarfissaqalissasut
Kommunit ataasiakkaat takornariartitsinermik ingerlataqartunut inatsisip allanngortinneqarneratigut nunanit allanit takornarianut piumasaqaateqalersinnaapput, assersuutigalugu aqqutinut ingerlavissani ataasiakkaanut tunngatillugu piumasaqaateqalersinnaallutik.
Piumasaqaatit tassaasinnaapput takornarniarnissamut nalunaarsimanissaq, pinngortitami pisuttuarnissamut akuersissuteqarnissaq, angalanermullu annaassiniarnermullu sillimmaserneqarnissaq piumasaqaatigineqarsinnaapput.
Uumasunut immikkut illersorneqartarialinnik , soorlu nannunik takornarniartitsinermik takornarniartitsisarnernut immikkut akuersissuteqartalernissaq naalakkersuisut aamma piumasarisalersinnaavaat.
Isumaqatigiissusiornissamut siammasissumik tapersiisoqartoq
Partiit tamarmiullutik inatsimmut allannguutissatut siunnersuutinut tapersersuinertik marlunngornermi oqaluuserineqarnerani oqaatigaat.
Takornariartitsisinermik ingerlatsisinnaanissamut piffissap immikkut akuersissuteqarfiusup ukiunit tallimanit ukiunut marlunnut sivikillineqarnera Kuno Fenckerip, Naleqqameersup, immikkut maluginiarpaa.
Kalaallit Nunaanni najugallit inuussutissarsiornermi salliutinneqarnissaat pingaaruteqartoq taassuma erseqqissaatigaa.
Inatsisip sukannernerulernissaa Naleqqap kissaatigigaa Fenckerip oqaatigaa, assersuutigalugu Namminersorlutik Oqartussat kiffartuussinissamik isumaqatigiissusiorneranut tunngasuni.
Inatsimmut allannguutit inuussutissarsiortunut kinguneqarnerlussinnaanerata Sulisitsisunit ernummatigineqarnera politikerit tusaaniartariaqaraat taassuma aamma kaammattuutigaa.
Kujataani savaatillit marluk unnuisarfinnik cafémillu ingerlataqartut, takornariartitsinermik ingerlataqartunut inatsisip allanngortinneqarneratigut takornariartartut ikilinissaannik ernummateqartut KNR-ip ippassaq allaaseraa.
Taakkummi angalatitsivissuarnik soorlu Topas Explorer Groupimik, Danmarkimeersumik, isumalluuteqartorujussuupput, inatsimmut allannguutissatut siunnersuutip pingajussaaneerneqannginnerani politikerit najukkami ingerlatsisunik salliutitsinerunissaat taakku kaammattuutigaat.
- Inatsit aqqutigalugu kalaallit suliffeqarfii ikiorneqarniarnerat paasisinnaavara. Kisianni uagut takornariaqarnermik suliffeqarfissuarnut sullissisuusugut eqqarsaatigineqanngilagut, Qassiarsummi Sillisit Hostel og Café Thorhildurimik ingerlatsisoq Elna Elsen oqarpoq.
Mimi Karlsenip, Inuit Ataqatigiinneersup, inatsimmut alllannguutissat aamma tapersersorpai:
- Takornariartitsinermik ingerlataqartut pitsaanerpaamik atugaqarnissaat, najukkamilu takornariartitsisartut salliutinneqarnissaat qulakkeertariaqarparput, taanna oqarpoq.
Lars Poulsenip, Siumumeersup, inatsimmut allannguutissatut siunnersuutit aamma tapersersorpai. Kalaallit Nunaanni najugallit suliffeqarfimmik namminneq aallartitsisinnaanissaannut periarfissagissaarnerunissaat taassuma naalakkersuisunut taassuma saniatigut kaammattuutigaa.
Inatsimmut allannguutit 2027-mi januaarip aallaqqaataani atuutilissapput.