Hotel Kulusuk ukiuunerani matusoq - ikiorsiissutisisinnaanngitsoq

Icelandairip timmisartuutaa Kulusuliartussaq kingulleq Kulusummit qangattareerpoq. Keflavikimiit aasaru aatsaat timmisartuussisoqaqqissaaq.

Matuersaat kaajallatsinneqarpoq Hotel Kulusummilu matu ukiuunerani parnaaqqassaaq. 

Sulisut ineeqqani inoqanngitsuni angalaarujoornissaat, Islandimit pisisartoqanngippat, akissaqartinneqanngilaq.

Sulisut tamarmik, qimmeq qimuttoq ataaseq silataani paarsisoq kisiat pinnagu, soraarsinneqarput.

Tamanna pisiniarfiup piginnittuata Mike Nicolaisenip uggoraa.

- Tamanna alianarnerpaavoq. Sulisut kommunimut ikiorsiissutinik qinnuteqartariaqarnerat. Ukiorpassuarni tamaaneereeratta, tamanna aliasuutigeqaara, taanna oqarpoq.

Mike Nicolaisen Hotel Kulusuup saniatigut Tasiilami Hotel Angmagssalimmik aamma piginnittuuvoq. Ikiorsiissutisissagaluarunik, angalasunut Kulusummit ingerlariaqqissinnaajunnaartunut nioqqutissanik Tasiilameersunik qulimiguulimmik timmisartuussiniarsarisinnaanertik, piginnittup oqaluttuaraa.  Assi © : Markus Valentin / KNR

Akunnittarfik ukiukkut ammaneq ajormat, Nuummiit Tasiilamiillu tikittut timmisartoqarfimmi unnuisariaqalersinnaapput.

- Sooq ammaannassanngilagut, Mike Nicolaisen aperivoq nangillunilu:

- Inuppassuit tamanna paasisinnaanngilaat. Allaat Namminersorlutik Oqartussaneersut ilaasa Islandimut attaveqarnitta qanoq pingaaruteqartiginera paasisinnaanngilaat.

Iliuusissaaleqineq

Akunnittarfimmut ukiuunerani nerisassarsinissaq koruuninik millionilinnik naleqassaaq. 

Pulaartullu angalaqqissinnaajunnaarallartut qanoq amerlatiginissaat naatsorsorneqarsinnaanngimmat, aningaasat qanoq amerlatigisut annaaneqarlutillu utertinneqarumaarnersut ilisimaneqarsinnaanngilaq.

Suliffeqarfimmi namminersortumi tamanna navianaateqangaarpoq, Mike Nicolajsen oqaluttuarpoq.

- Angalasinnaajunnaartut qassiussanersut eqqoriarsinnaanngilarput. Aningaasarpassuit uninngatitassaapput.

Mike Nicolaisenip angalasut angalasinnaajunnaarallartut Kulusuup mittarfiani ukiuunerani unnuisitaasarnerat ajuusaarutigaa. Taamaattumik piffissap tamatuma nalaani ammatitsinissaminut aningaasatigut ikiorserneqarnissamik qinnuteqarluni Attaveqaasersuinermut Naalakkersuisoqarfimmut saaffiginninnikuuvoq. Isumaqatigiissuteqartoqanngilarli. Assi © : Markus Valentin / KNR

Taamaattumik aningaasatigut ikiorneqarumalluni Attaveqaasersuinermut Naalakkersuisoqarfimmut qaammat ataaseq matuma siorna saaffiginnippoq.

Maannamulli Namminersorlutik Oqartussat akunnittarfimmik ikiuinngillat, akunnittarfiutilik oqarpoq.

- Ukiuunerani taamatut nalaataqassagaluaruma (timmisartoqarfimmi unnuisoqassappat aaqq.) ima oqassaanga: Sooruna tapersersuillusi aaqqiissuteqaqataannginnassi.

KNR attaveqaasersuinermut naalakkersuisoqarfik saaffigaa Mike Nicolaisenillu ukiukkut ammaannarnissaq pillugu ikioqqunera tigusimaneraat apeqqutigalugu.

Naalakkersuisoqarfimmit suli akissutisinngilagut.

Nerriviit annoraaminermik puisip amiatut isikkulinnik qalilersoqqapput ullaakkorsiutinillu tigooraavissaq ullaakkorsiutinik assigiinngitsunik immerneqarnissaminut piareeqqavoq. Nillataartitsivissuarli nerisassanik imaqanngilaq akunnittarfillu sulisoqanngilaq. Assi © : Markus Valentin / KNR

Aqagu ikiorsiissuteqartuuppata qanoq sukkatigisumik ammaqqissinnaassagaluarpa?

- Killissatsinniippugut. Umiarsuarmik assartuineq kingulleq naammassereerpoq. Nioqqutissanilli atortunillu Hotel Angmagssalimmit imaluunniit KNI-p quersuaanit Tasiilamiittumit Kulusummut ukiup ingerlanerani timmisartuussisinnaavugut.

- Maannali iliuuseqartoqartariaqarpoq. Iliuuseqanngikkaanni akitsoraluttuinnassaaq. Najukkami suliffeqarfiutilittut assigiinngitsunik iliuuseqarnissannut periarfissaqarpunga. Iliuuseqarfigisinnaasakkali iluatiginngilaat.

- Taamaattumik iliuuseqarsinnaanngilagut.

Aningaasatigut ikiorsiissutit

Mike Nicolaisen Namminersorlutik Oqartussat qarasaasiakkut sapaatip-akunnerani kingullermi ataatsimeeqatigai.

Taassuma oqaluttuarnera naapertorlugu, Kulusummi ukiuunerani timmisartuussinermi ajornartorsiutinik aaqqinnissamut aningaasaateqartoqannginneranik paasitinneqarsimavoq. 

Akunnittarfimmilli piginnittup tamanna qularaa.

Assi © : Markus Valentin / KNR

Taassuma Kujataani takornarialerisut ukiut marluk matuma siorna sikorsuaqalermat aningaasatigut ikiorsiissutigineqarsimasoq eqqaavaa.

- Namminersornerullutik Oqartussat iliuuseqarsinnaasut siornatigut takoreerparput – aningaasaateqanngikkaluarlutik aningaasassarsisarnerat. Kujataanut tunngatillugu aningaasassarsipallapput.

- Taamaattumik ukioq ataaseq sinnerlugu nilliaatigisagut eqqarsaatigalugit oqartoqarsinnaavoq: ’Aaaarrrrhhhhh, pitsaanerusumik iliuuseqarsinnaavusi pimoorunnerullutalu.’

Kommune Kujallermi imigassaarniarneq sapaatip-akunnerini marlunni matoqqavoq. Taamaattumik Mike Nicolaisen politikerit Kujataani aningaasatigut ikiuiniaqqissanersut pissanngatigaa.

- Kujataanut qaammatialuit qaangiutsinnagit ikiorsiisoqassappat taava ajortoqarsimassaaq.

- Kujataani ikiorsiisoqarsinnaappat tamaanilu ikiorsiisoqarsinnaanani, ajortoqarsimassaaq. Inuit assigiinngissuteqarpat?