Kulusummi akunnittarfik septembarimi matussasoq

Hotel Kulusuk aasaq manna ukioq kaajallallugu akunnittarfittut naggataamik ammavoq. Aalajangiinermi angallannermi pissutsit tassa tikittoqarpallaartannginnera pissutigineqarpoq.

Allattoq Emil Weis

juulip 22-at 2026 10:31

Kulusummi akunnittarfik septembarip 30-anni matussaaq.

Akunnittarfimmi pisortaq piginnittorlu, Mike Nicolaisen tusagassiuutinut nalunaarummi allappoq.

- Piffissaq tikerartoqannginnerata nalaa angallannermi pissutsit maannakkut atuuttut qanoq inneri pissutigalugit ukioq kaajallallugu ingerlatsinissatsinnut tunngaviusinnaanngitsoq nalilerparput, tusagassiuutinut nalunaarummi allassimavoq.

Akunnittarfik heliskiingertoqarnerata nalaani suli ammasassaaq, aamma Islandimit timmisartukkut aappaagu toqqaannartumik aqquteqartoqaqqilerpat.

Aalajangiineq tamanna akunnittarfimmi piffissap tikerarfiunngitsup nalaani sulisut akissarsiaqartinneqarlutik soraarsinneqarnissaanik kinguneqassaaq.

Angallannermut aalaakkaasumik attaveqaateqartoqarnissaa amigaataasoq

Tunumi akunnittarfik 1998-imili akunnittarfinngorpoq, taannali maanna ukioq kaajallallugu akunnittarfiujunnaassaaq.

- Aalajangiineq tamanna ajuusaarutigingaarparput. Hotel Kulusuk Tunumi takornariaqarnermut ukiorpassuarni pingaaruteqarsimasoq, Mike Nicolaisen allappoq:

- Akunnittarfimmilli ukioq kaajallallugu ingerlatsiniaraanni angallannermi attaveqaatit patajaatsuunissaat pingaaruteqarpoq.

Taassuma akunnittarfik ukioq kaajallallugu akunnittarfinngoqqissinnaanissaa neriuutigaa, taamaattoqassappalli takornariaqarnermi pissutsit sammineqarnerusariaqarput.

- Tunumi takornariaqarneq attaveqaasersuutillu pillugit pitsaanerusumik sinaakkusiisoqarnissaa neriuutigaarput, taamaalilluta ukioq kaajallallugu akunnittarfimmik neqerooruteqarsinnaaleqqillutalu ukioq kaajallallugu sulisoqarsinnaaleqqissalluta, Mike Nicolaisen oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.