KNR-ip Uummannami eqqaavissuarmi eqqagassarpassuaqarnera tikkaarittarneralu siornatigut allaaserisareerpaa. 

- Eqqaavissuaq ulikkaaqqasuaannarpoq aasakkullu tipeqartaqaluni. Eqqaavissuarmilu ikuallaasoqaraangat oqartussanit qaminneqartarpoq, Sofie Nielsen Uummannameersoq KNR-imut aasaq taama oqarpoq. 

Inatsisartulli Uummannami Upernavimmilu eqqagassaqarnikkut ajornartorsiutit maanna aaqqiivigerusuppaat. 

- Uummannaq Upernavillu qeqertaniipput sikoqartarneranillu silarluttarneralu umiarsuit tikinniartarnerannut killeqartitsisarput, Atassutip siulittaasua Aqqalu C. Jerimiassen eqqagassaqarpallaarnerata aaqqiivigineqarnissaanik siunnersuuteqarluni taama oqarpoq: 

- Taamaattumik nuna tamakkerlugu eqqagassalerisarnerup attanneqaannarsinnaanera misissorneqartariaqarpoq. Tamanna eqqagassanik katersisarneq, containerinik aserfallatsaaliineq, umiarsuit kinguaattoortarnerat illoqarfinnilu taakkunani marlunni eqqagassat amerligaluttuinnarnissaasa aarlerinarneri aallaavigalugit misissuisoqartariaqarpoq. 

Inatsisartut utoqqaat pisinnaatitaaffiisa qanoq pitsanngoriartortinneqarnissaat pillugu sisamanngornermi aamma suliarineqarluni. Tamanna uani atuarneqarsinnaavoq. 

Misiliutigalugu suliniuteqarneq

Naalakkersuisut illoqarfinni taakkunani marlunni eqqagassanik ajornartorsiuteqarnerup aaqqiivigineqarnissaa isumaqatigiissutigaat. 

Taarsiulluguli eqqagassalereriaatsinik misissuisartussanik nuna tamakkerlugu suleqatigiissitaliortoqarnissaa kissaatigaat, tassanilu Avannaata Kommunia misiliutigalugu suliniuteqassaaq. 

- Suleqatigiissitat eqqagassalereriaatsinik sanillersuussisassapput, taakkununngalu aaqqiissutissat assigiinngitsut avatangiisinut sunniutaasinnaasut inuiaqatigiillu aningaasaqarnerannut sunniutaasinnaasut ilanngullugit nalilersorneqassallutik, naalakkersuisut allannguutissatut siunnersuumminni allapput: 

- Aningaasaqarneq, avatangiisinut sunniutaasinnaasut, eqqagassat amerlassusaat, ingerlatsineq, assartuineq, sikoqassuseq ikuallaavinniillu kissartup atorluarneqarsinnaanera sanilliussinerni aallaavigineqassapput. 

Naleqqap siunnersuummut akerliliillutik taasipput, Atassut taasinngilaq Demokraatiniilli aamma Inuit Ataqatigiinniit amerlanerussuteqartoqarneratigut allannguutissat akuerineqarput. 

Utoqqaat ataqqinassusaat illersorneqassasoq 

Demokraatit inatsisissatut siunnersuut, naalakkersuisut ‘utoqqaat inatsisitigut isumannaatsuunerat, isumassorneqarnerat ataqqinassusaasalu qanoq illersorneqarsinnaanerannik’ nassuiaammik suliaqarnissaannut tunngasoq, sisamanngornermi siullermeerlugu suliaraat.

- Utoqqaat qanigisaallu aaqqissuusseriaaseq pillugu ikiorneqartussaatitaallutik ikiorneqarusullutik ilungersortariaqarnerat ilumoorsinnaanngilaq, siunnersuuteqartoq  Magrethe Thårup Andersen (D) oqarpoq.

Utoqqarnut akisussaaffeqarfiup ilungersunartorsiornera, utoqqaat pillugit oqaaseqartartup 2025-mut nalunaarusiaanit paasinarsisoq taassuma maluginiaqquaa:

- Isumassuinerup naammannginnera, inatsisitigut isumannaatsuunissap amigaataanera, oqartussaasut suleqatigiinnissaasa amigaataanerat, puigortunngortunik sullissinerup tungaatigut erseqqinngitsoqarnera, ineqarnerup tungaatigut ajornartorsiutit aamma illoqarfiit nunaqarfiillu akornanni nunatigut assigiinngissuterujussuaqarnerata ajornartorsiutaanera nalunaarusiami sammineqarput.

Naleqqap soraarninngornermi ukiorineqartut pillugit misissuinissaq oqallinnermi aamma sammineqarput.

Naalakkersuisulli siunnersuutit taakku marluk utoqqaat pillugit inatsimmut ilanngunneqartariaqarnerarpaat, tamanna naalakkersuisunit aappaagu saqqummiunneqassangatimmat.  

Siunnersuut Ilaqutariinnermut Peqqissutsimullu Ataatsimiititalimut innersuunneqarpoq.