EU-kommissæri: EU-p Issittoq pillugu periusissiaa nutaaq Kalaallit Nunaanni aallartippoq

- Issittoq pillugu periusissiaq pilersinnialeratsigu Kalaallit Nunaanni aallartippugut. Kalaallit Nunaanni angalaarpugut, tassani najugallit oqaloqatigalugit, suut pingaartinneraat paasiniarlugu, Síkela, EU-p Issittoq pillugu periusissiani saqqummiutereeraalu Ritzauimit apersorneqarluni oqarpoq.

- Issittoq peqatigalugu periusissiortoqarnissaa anguniagaavoq. Issittup Kalaallit Nunaatalu aalaakkaanerusup, atugarissaarnerusup, isumannaannerusup, piujuaannartitsinerlu tunngavigalugu ingerlasup pilersinneqarnissaa neriuutigaara, Jozef Síkela oqarpoq.

EU-Kommissionip periusissiaq nutaaq sapaatit akunnerata massuma ingerlanerani saqqummiuppaa, periusissiallu piviusunngortinneqarnissaa pillugu EU-mi nunani ilaasortaasuni maanna oqaluuserineqassalluni.

Periusissiamut 2021-mi pilersinneqartumut naleqqiullugu sillimaniarneq maanna pingaarnerutinneqarpoq, soorlu aamma avatangiisit mianerineqarnerullutillu silap pissusiata allanngoriartornerata iliuuseqarfigineqarnissaa pingaartinneqartut.

- Avatangiisit mianerineqarnissaat pingaartipparput, piujuaannartitsinerlu pingaarutilittut inissisimassalluni. Issittumilu pissutsit allanngoriartortut aallaavigalugit nutaanik aamma immersorlugu.

- Tassa sillimaniarneq qitiutinneqartoq. Aningaasarsiornikkullu periarfissat nutaat pilersinneqarnerat, Jozef Síkela oqarpoq.

Pisuussutit uumaatsut pingaarutillit silap pissusiata allanngoriartornerata ilutigisaanik iluaqutigineqarnerulersut, immakkullu angallannermi aqqutit nutaat Issittumi ukiuni tulliuttuni ineriartortitsinermi qitiulluinnassapput, Jozef Síkela oqarpoq.

Nunatsinni aningaasaliinerit nutaat

EU Kalaallit Nunaanni 1,5 milliardit koruunit nalinginut aningaasaliiniartoq, EU-Kommissionip siulittaasuata Ursula von der Leyenip, Jozef Síkela ministeriunerlu Mette Frederiksen(S) peqatigalugu Kalaallit Nunaannut septembarimi tikeraarami saqqummiuppaa.

Aningaasat aatsitassanut piujuaannartitsineq aallaavigalugu iluaqutigineqartunut, nukissiuutinut ataavartunut, qaammataasat atorlugit attaveqaatinut, piujuaannartitsinerlu aallaavigalugu takornarniartitsinermut inissianullu ilaatigut atorneqassapput.

Kalaallit Nunaanni sumiiffinni assigiinngitsuni diesel atorlugu generatorit nukissiuutinut ataavartunut taarserneqarnissaannut suliniutinut EU aamma aningaasaliiniarpoq.

Kalaallit Nunaata immap naqqatigut kabelikkut Europamut attaveqalernissaa, EU-p Issittoq pillugu periusissiamini nutaami aamma kissaatigaa.

Kalaallit Nunaanni attaveqaatit digitaliusut aqqutigalugit attaveqalernissap nukittorsarneqarnissaa EU-p takorloorpaa, Europa, Kalaallit Nunaat, Canada, Japan Korea Kujallerlu attaveqaqatigiilissallutik, atortut digitaliusut aqqutigalugit nammineernerusinnaaneq qulakkeerniarneqarluni.

Ritzau