Narsarmiut peqqinnissaqarfimmut akerliunertik takutinniarlugu aqqusinermi pisoqatigiittut: 'Nakorsamik atorfeqavissumik pisariaqartitsivugut’
Narsami innuttaasut illoqarfiup peqqinnissaqarfiani atukkanut akerliunertik takutinniarlugu, allagartarsualerlutik erseqqissumillu oqariartuuteqarlutik pingasunngornermi aqqusinikkut pisoqatigiipput.
‘Peqqinnissaqarfik toqqissisimanartoq piumasaraarput!’ aamma ‘Nakorsamik aalajangersimasumik pisariaqartitsivugut!’, akerliussutsimik takutitsisut oqartussaasut iliuuseqarnissaat piumasaralugu taama oqariartuuteqarput.
Narsami peqqissaasutut atorfeqartutuaasup, Berit Bygip, KNR-ip allaaserisaani marlunni oqaluttuarineqareersutut, suliffimmi atukkat pitsaanngitsut pissutigalugit soraarniuteqarnerata kingorna, akerliussutsimik takutitsisoqarpoq.
Innuttaasut peqqinnissaqarfiup sullissinera, sulisussaaleqinerup kingunerisaanik, siornatigornit ajornerulernissaa maanna annilaanngatigaat.
- Immaqa ernummatiginerpaavaat taanna peqqinnissaqarfimmi sullinneqarnermik ajorseriarnissaa, sipaarniarnerup kingorna. Peqqissaasut pingasut nalunngisatsitut decembarip aallaqqaataanni soraalerput. Immaqa tamanna ernumanarnerpaavoq, akerliussutsimik takutitsinermik aaqqissuisoq Sofia Olesen KNR-imut oqarpoq.
Nuummit iliuuseqartoqarnissaa ujartorneqartoq
Sofia Olesenip oqarnera naapertorlugu innuttaasut peqqinnissamut naalakkersuisoqarfimmit, peqqinnissaqarfimmit najukkamiluunniit peqqinnissaqarfiup sinniisaannit akerliusoqarnerata kingorna suli tusagaqanngillat.
Kujataanili nunap immikkoortuani nakorsaq nutaaq akerliussutsimik takutitsisoqarnerani najuuppoq. Nakorsaq Narsamut ataasinngornermi tikeraarpoq, akerliussutsimillu takutitsisut taassuma oqaluunnissaanut periarfissaqarput, Sofia Olesen oqaluttuarpoq.
Innuttaasulli oqaloqatigineqarnissartik taamaallaat naatsorsuutiginngilaat.
- Neriuppunga tusaaneqassasugut oqartussaniit. Allannguisoqartariaqarpoq. Ukiorpassuarni peqqinnissaqarfimmi ingerlariaaseq akuerineqarsinnaanngilaq, Sofia Olesen oqarpoq.
Taassuma ukiut ingerlanerini suliniutinik misissuinernillu, innuttaasut ujartugaannik aaqqiissutissarsineqanngitsunik aallartitsisoqartarsimanera qatsuppaa.
- Suliniuterpassuit misissuinerpassuit ingerlasartut ukiorpassuarni utaqqititsisut naammaleqaat.
‘Pisinnaatitaaffigivarput peqqinnissaqarfimmi isumannaatsumik sullinneqarnissaq’
Sofia Olesenip illoqarfimmi innuttaasut naaperiarlutik sulisussaaleqilertoqarnissaannut akerliunermik aaqqissuusisoqarnissaanik kajumissaarimmat, akerliussutsimik takutitsinissaq pilersaarusiarineqarpoq.
Aaqqissuisup akerliussutsimik takutitsineq sulinerup nalaani pigaluartoq, peqataasoqarnera nuannaarutigaa.
- Ajunngilaq, silagissuaq. Takkuttoqarpoq amerlapput. Aamma suliffiit naligigamikku. Kisianni tassa nunaqqatigiit amerlasuut tapersersuipput.
Akerliuneq Sofia Olesenimut innuttaasut ikiorneqarnissamik pisariaqartitsigaangata toqqissisimasinnaanissaannut tunngassuteqarpoq.
- Neriuppunga arlaatigut Nuummi issiatitagut iliuuseqassasut piaartumik aaqqiissutissanik suliniuteqassasut. Pisariaqarluinnarmammi. Pisinnaatitaaffigivarput peqqinnissaqarfimmi isumannaatsumik sullinneqarnissaq.
