'Napparsimasut sumiginnarsimavakka': Nakorsassaaleqineq sulisullu ikinnerusut Narsamut tatisisoq
- Ukiup affaa kingulleq ulapaarfiungaarmat napparsimasut isumagisannik sumiginnaasutut misigisimaannavippunga.
Berit Bygip Narsami peqqissaasuni kisiartaalluni aalajangersimasutut ukiut tallimaat avillugu atorfeqarluni peqqissaavimmi ulluinnarni sulinini taama nassuiaatigaa.
Taanna maanna soraarpoq, atuuffimminiiginnarnissaminimi akisussaassuseqarnerunngissoraa.
Peqqissaavimmi sulisut apriilimi ikilisinneqarput. Berit Bygip oqarnera naapertorlugu peqqinnissamik suliaqartut ajoqusersimasunut nakorsiartarfimmi uninngasunillu nakkutiginninnermi sulisussat marluinnaapput.
Peqqissaasut marluk ajoqusersimasunut nakorsiartarfimmi siusinnerusukkut sulisaraluarput, sulisullu ilinniarsimasup napparsimasut immikkoortortami isumagisarlugit.
- Ajoqusersimasunut nakorsiartarfimmi immikkoortortamilu peqqinnissamik suliaqartut marluinnaat sulisalernissaannik aalajangiisoqarmalli ajornerungaatsialerpoq, taanna KNR-imut oqarpoq.
Taassuma innuttaasut ikinnerunerat suliassat ikinneruneranik isumaqanngitsoq erseqqissaatigaa.
Narsami innuttaasut 1.250-it missaanniipput, Berit Bygillu oqarnera naapertorlugu peqqissaavimmi napparsimangaatsiartut passunneqarnissamik pisariaqartitsingaatsiartut amerlasimapput.
Taassuma oqarnera naapertorlugu oqalutsit portørillu upernaap ingerlanerani aamma ikilisarniarneqarput. Oqalutsilli ikilisaaffigineqarnerat unitsinneqarpoq, portørerlu ataaseq pissutsit pissutigalugit soraarsimalluni.
Peqqissaasup suliassai amerlanerulertut
Berit Bygip oqarnera naapertorlugu nakorsassaaleqineq ajornartorsiutaasup ilarujussuanut pissutaavoq.
Peqqissaavimmi nakorsanik piareersimasoqartarunnaassasoq ukiup aappaata affaata matuma siorna aalajangerneqarpoq. Tamanna pissutigalugu nakorsamik piffissami sivisuumi najuuttoqarneq ajorpoq, peqqissaasunullu suliassat amerlanerullutik.
- Taama uagut suliaqartarpugut, taanna suliassat nakorsanit siusinnerusukkut suliarineqartarsimasut pillugit oqarpoq.
Peqqissaasut peqqinnissaqarfinni allani nakorsat suleqatigisarpaat. Berit Bygilli oqarnera naapertorlugu nakorsat ingerlaavartumik nikerartarput, taakkulu Narsami napparsimasunik takunnippallaartaratik.
Nakorsaq kingulleq qaammatini marlunni suleriarluni taassuma oqarnera naapertorlugu aggustip naanerani aallarpoq. Tamatuma siornatigut qaammatini pingasuni Narsamiippoq.
- Piffissap taama sivisutigisarnera ilungersunarluinnartuusoraara, napparsimasut nakorsamit misissorneqarnissaminnut taama sivisutigisumik utaqqisarnerat pillugu oqarpoq.
Taassuma napparsimasut ataasiakkaat katsorsarneqartarnerat nakorsaqarneq pitsaanerugaluarpat allaanerusinnaagaluarnersoq oqaatigisinnaanngilaa. Taassumali ajornartorsiutaasut siusinnerusukkut paasineqarsimagunik siusinnerusukkut katsorsarneqarsinnaagaluarnersut arlaleriarluni eqqarsaatigisarsimavaa.
'Sumiginnaasimavunga'
Napparsimasut arlallit piffissami ataatsikkut annertuumik isumassorneqartariaqaraangata sulinerup ilungersuanarnera ersarinnerulertarpoq.
- Piartortunik isumagineqarluinnartariaqartunik arlalinnik ataatsikkut uninngasoqarnera nalaassimasanni ajornerpaat ilagaat, Berit Byg oqarpoq.
Napparsimasut arlallit ikiorneqarnissamik pisariaqartitsineranni sulisut kikkut najortariaqarnerlugit pingaarnersiuisariaqartarput. Tamanna Berit Bygip oqarnera naapertorlugu pisariaqartitsinermik nammineq naammassisinnaajuaannanngisaminik kinguneqartitsisarpoq.
- Sulisut taama ikitsigalutillu ulapittorujussuugaangamik taava sumiginnaaneq ilisimaneqartarpoq, pissutigalugu sumiiffimmi piffissami ataatsimi ataasiinnarmiittoqarsinnaammat. Uanga sumiginnaallunga aamma ilisimavara, tassami sumiiffimmi ataasiinnarmiissinnaagama. Taamaattoqarneralu akueriuminaappoq, taanna oqarpoq.
Suliffimmini ataqatigiittoqarniassammat qaangiuttoorluni suliniarsarisarsimavoq taamaalilluni sulinngiffissaraluamini sulisarluni unnukkullu sulianut tunngasunik atuartarluni.
Sulinerugaluarluni napparsimasut pisariaqartitaannik tamanik tunniussisinnaanissani ernummatigisarpaa.
Suliffimmilu atugassarititaasut peqqutigalugit suliatigut kukkunissamik qaninnerulersitsinerat ernumagaa, suliaqarsinnaanermummi akuersissuteqarneranut kingunerluuteqarsinnaammat.
Peqqinnissaqarfik paarlatsissarsisoqaraangat aamma sulisitsisariaqartarpoq.
- Ajoraluartumilli ajorsigaluttuinnarpoq. Suliffik ulapinnarsigaluttuinnarlunilu ajorsigaluttuinnartillugu sulisoqarniarneq ajornarsigaluttuinnartarpoq.
Sulisullu ikiliartuinnartillugit allanik sulisoqarniarnissap ajornarsigaluttuinnarnissaa ernummatigaa.
Suliffimmi oqarasuaat sianertoq
KNR-ip Berit Bygimik apersuinerani suliffiata oqarasuaataa arlaleriarluni sianerpoq. Taassuma napparsimasut peqqinnissamut tunngatillugu ikiorneqartariaqartut sianernerat tiguniarlugu oqaloqatigiinneq unitsiinnartariaqarpaa.
Berit Byg soraarniuteqarpoq Danmarkimullu decembarimi uterluni aallassalluni.
Taassuma suliffimmi ilungersuaneq sulisunuinnaq sunniuteqarani napparsimasut isumassorneqarnissaannik passunneqarnissaannillu qulakkeerinissamut ajornakusoortitsinissaa ernumassutigaa.
Sulisut tallimanngormat ataatsimiittut Berit Byg oqarpoq, tassanilu nutaarsiassat nuanniitsut arlallit saqqummiunneqarput.
- Narsami decembarip aallaqqaataanit peqqissaasoqarunnaarlunilu ikiortit ikittuinnanngortussaarpasipput. Innuttaasut sulisut taama ikitsiginerat toqqissisimanngissutigaat. Taamaammat ataatsimiigiannginnitsinni pissutsit ilungersunarnerulerput, Berit Byg oqarpoq.
Peqqissutsimut naalakkersuisoq, Anna Wangenheim naalakkersuisut sipaarniarnissamik imaluunniit Narsami peqqissaavimmi sulisunik ikilisaanissamut aalajangiisimannginnerarlugit KNR-imut akissummi allappoq.
Taassuma ulluinnarni aqutsineq, tassunga sulisussaqarneq piareersimasoqarnissaanullu pilersaarutit peqqinnissamut aqutsisoqarfimmit pilersaarusiorneqartartut innersuussutigaa.
KNR-ip peqqinnissaqarfik nakorsassaqarnissamut, sulisussaqarnissamut, missingersuutinut napparsimasullu isumannaatsuunissaannut apeqquteqarfigalugu saaffigaa, ilanngutassialli saqqummersinneqannginnerani akissutissarsinngilagut.
