Norgemi uuliasiornermut aningaasaateqarfiup Musk akissarsiaqarluaqarnissaa akueriumanngikkaa

Norgemi uuliasiornermut aningaasaateqarfiup Teslap pisortaata, Elon Muskip, akissarsiassaanut siunniut itigartinniarpaa.

Aningaasaliisarfiup Reutersimut tamanna ilisimatitsissutigaa.

Uuliasiornermut aningaasaateqarfik Teslami piginneqataassutsinik piginnittut annersaasa arfineq-aappaattut inissisimavoq, 1,12 procentinik piginneqataalluni, taakkualu nalingi 17 milliardit dollariupput.

Taakku danskit koruuninngorlugit 10 milliardit koruuninik naleqarput.

NRK naapertorlugu uuliasiornermut aningaasaateqarfik Muskip akissarsiaanut 2018-imi 2024-milu akerliusimavoq.

6500 milliardit koruunit angullugit

Ullut marluk qaangiuppata Teslap ataatsimeersuarnerani piginneqataasut Muskimut akissarsiassat siunnersuutigineqartut taasissutigisinnaavaat.

Piginneqataassutsit taakku ukiut qulit ingerlaneranni 6500 milliardit koruunit angullugit naleqalersinnaapput.

Norgep uuliasiornermut aningaasaateqarfia nunarsuarmi aningaasaliissutinut aningaasaateqarfinni annerpaavoq, 2024-llu naanerani 20 billionit - imaluunniit norskit koruuninngorlugit 20.000 milliardit koruunitut naleqarpoq.

Nalinga danskit koruuninngorlugit 12.540 milliardit koruunit missaanniippoq.

Nunarsuaq tamakkerlugu piginneqataassutsit børsitut nalunaarsorneqarsimasut 1,5 procentii aningaasaateqarfiup pigivai.

Pissutsit ajorsiartornissaannut ileqqaarnissamut Norgemi naalakkersuisut 1996-imi uuliamut aningaasaateqarfik pilersippaat. Taamanimiilli Norgep naalagaaffiata ataatsimut tunisaasa nalingat sisamararterutingajaannik qaffassimavoq.

/ritzau/