Royal Greenland saarulliit akii pillugit: Rusland pissutaavoq
KNAPK-p Royal Greenland isornartorsiorpaa, aalisakkerivissuummi saarulliit tunisat akii 10,75 koruuninit 8,25 koruuninut tassa 23 procentimik apparniarlugit oktobarip qulingiluaanni aalajangiivoq.
Akit nunarsuup sinnerani niuernermi akit allanngoriartornerat malikkitsik, saarulliit Ruslandimeersut akiisa europami niuerfinni 30 procentimik akikinnerulersimanerat akinut appaanermut pissutaanerusoq, Royal Greenlandip maanna nassuiaatigaa.
Aalisakkerivissuaq tusagassiuutinut nalunaarummi allappoq.
Nunarsuarmi saarullittassiissutit 2 procentiinnanngui nunatta pigivai. Taamaattumik Royal Greenlandip niuernikkut akigitinneqartut malittariaqarai, nammineq nassuiaatigaat.
Muminganilu nunarsuarmi saarullittassiissutit annerpaartaat Barentip imataaneersut affaat Ruslandip pigai.
- Sinerissap qanittuani saarullinniarneq Royal Greenlandip pingaarnertut aallutaasa ilagaat, taamaammat ingerlatseqatigiiffittut nunarsuarmi niuerfinni pissutsinit sunnerneqarneq pinngitsoorneqarsinnaanngimmat suliffeqarfiup tunisinermi akimik appaanera niuerneq eqqarsaatigalugu iliuutsitut akisussaassusilittut nalilerneqarpoq, aalisakkerivissuaq tusagassiuutinut nalunaarummi allappoq.
Saarulliit akii nunarsuarmi niuernermi 2021-p naajartornerani qaffangaatsiarnikuupput, tamatumali kingorna aki appariartuinnalerlutik.
Akerliussutsimik takutitsineq aamma Atuisoqarnermut Unammilleqatigiinnermullu Aqutsisoqarfik
KNAPK-p ilaasortatik saarullinnik tunisinermut akit appasinnerat pissutigalugu akiliisinnaajunnaaratarnissaminnut aarlerinartorsiorput. Taamaattumik kattuffiup aalisartut novembarip aallaqqaataani akerliussutsimik takutitsissasut kaammattuutigaa.
Tamanna nunatsinni politikerinut malugititsiniarnissamik neriuuteqarneruvoq.
Tamatuma saniatigut kattuffiup Royal Greenland Atuisoqarnermut Unammilleqatigiinnermullu aqutsisoqarfimmut kisermaassinerarlugu nalunaarutigaa.
Royal Greenlandip tamanna tusagassiuutinut nalunaarummi oqaaseqarfiginngilaa. KNR-ip Royal Greenland apersorniarsaraa.
