Aalisakkanik tunisassiorfissuaq tunitsivittut initoqisoq - maanna suliassanngortinneqarput
Kalaallit Nunaanni Aalisartut Piniartullu Kattuffiata suliffeqarfik Royal Greenland Atuisartoqarnermut Unammilleqatigiinnermullu Aqutsisoqarfimmut Saarulliup akiata appartinneqarnerata kingorna maalaarutigaat.
Naak ukiuni arlalinni aalisakkat akii isumaqatigiinngissutigineqartareeraluartut, KNAPK-mi siulittaasup Nikkulaat Jeremiassenip akuersaaginnarsinnaajunnaarlugu oqaluttuarpoq:
- Tassa paaserusuleratsigu eqqortumik iliortoqarnersoq aamma sumik tunngaveqarpiarnersoq paaserusuleratsigu taamatut sinerissap qanittuani aalisartut pilliutigineqartuarnerat akuersaarsinnaannginnatsigu, Nikkulaat Jermiassen oqarpoq.
Unammillerniarneq ajornartoq
Royal Greenland akinik aalisartut akueriinartariaqagaannik aalajangiisinnaammat, aalisartut illua tungiat pissaneqarnerulersimaqaaq.
- Tassa allamik periarfissaqanngillat annertunerpaamik saarullinniaqarfiit eqqarsaatigalugit. Avannarpasinnerusumi selvskabit allat aamma periarfissaaput kisianni nunatta kujasinnerusortaani saarullinniaqarfiunerusoq eqqarsaatigalugu kisermaassisuupput taakku selvskabit marluk allamik tunitsivissaqanngillat, taanna oqarpoq.
Nipisat arnarluit suaat akii pillugit upernaaq manna isumaqatigiinngissutigineqarput, KNAPK-lu akerliussutsimik takutsitsinissamik siorasaarereermat isumaqatigiittoqarpoq.
Isumaqatiginninniarnerlu ajornakusoorluinnarsimasoq NIkkulaat Jeremiassen oqaluttuarpoq:
- Isumaqatiginninniarsinnaaneq ajornakusoortupilussuuvoq killiffimmi matumani aammalu ukiut siulii eqqarsaatigalugit, sakkussaalatsinarpoq uani soorlu arnarluit suaat eqqarsaatigalugit tassunga killikkaluarpugut kisianni sumut tamaannga innersuussisoqaqattaarnerani isumaqatigiinnisarnissamut periarfissaqanngitsoq taanna qaangerparput.
Naallu KNAPK-p siulittaasiuata Atuisoqarnermut Unammilleqatigiinnermullu Aqutsisoqarfimmut maalaaruteqarnertik isumaqatigiinniarnermut qanoq sunniuteqassanersut nalugaluarlugu, maalaaruteqartariaqarpoq:
- Appasissorujussuarmik akeqartitsinermi sinerissap qanittuani aalisakkat akii pilliutigineqassappata soorunami ilaasortagut sinnerlugit iliuuseqartussaangatta uagut akuerisinnaanngivipparput.
