Akerliussutsimik takutitsinissamut akunniinnanngortoq aki isumaqatigiissutigaat

Aalisartut Nuummi akerliussutsimik takutitsinissaannut akunniinnanngortoq Royal Greenlandip akiutinneqartoq qaffappaa. Akerliussutsimik takutitsinissaq taamaatiinnarneqarpoq.

Allattoq Christine Hyldal

apriilip 18-at 2023 12:25

Nutserisoq Connie Fontain

Aalisartut nipisaat suaasa akii pillugit akerliussutsimik takutitsinissaannut akunniinnanngortoq illuatungeriit marluk akornanni aaqqiagiinnginneq unippoq

Royal Greenlandimmi aalisartut 26 koruunimik kiilumullu bonusimik 1 koruunimik neqorooruteqarfigai, tamannalu KNAPK-p akueraa.

Taamaalilluni nipisaat suaannik tunisinermi akiliutinneqartoq KNAPK-p piumasaqaatigeqqaagaanit 1 koruunimik appasinnerulluni 27 koruuniulerpoq.

KNAPK-p pisortaa, Vittus Qujaukitsoq KNR-imut oqarpoq.

- Aaqqiagiinnginneq unitsinneqarpoq. Royal Greenlandip siunnersuutaa soorunami piumasaqaatitaqartumik siulersuisuunerit akueraat, taanna oqarpoq.

SULIAQ NAATSUMIK

Aalisartut apriilip aallaqqaataani nipisanniarsinnaanngortarput. Ullunilu 60-ini nipisanniarsinnaatitaapput.
Ukioq mannali taamaattoqanngilaq.
Isumaqatigiinngissut siornarnisaq qaqeqqinneqarpoq.
Royal Greenlandip nipisaat suaannut tunisanut kiilumut 22 koruunimik akiliuteqarniarneranut isumaqatigiinnginneq tunngassuteqarpoq - tamanna annikippallaartut aalisartut isumaqarput, taakkulu tamanna pissutigalugu qassutitik nunamiitsiinnarpaat.
Royal Greenlandip kiilumut 22 koruuni siorna aamma neqeroorutigaa. Tamanna pissutigalugu aalisartut Royal Greenlandip saani Namminersorlutik Oqartussallu silataanni akerliussutsimik takutitsipput.
Aki aallarniutigineqartoq Royal Greenlandip nammineq aquppaa, isumaqatigiinniartussatulli pisussaaffeqanngillat.
Sapaatilli akunneri pingasut qaangiuttut aalisartut qassutitik atuliinnarpaat nipisannialerlutillu. Akiliutinneqartorlu 22 koruuni qaffanneqanngilaq.
Nipiaat suaannut akigititap kiilumut koruuninik pingasunik qaffanneqarnissaa, tassa kiilumut 25 koruuneqalernissaa kiilumullu bonusimik 1 koruuneqarnissaa Royal Greenland aalisartunut neqeroorutigaa.
Aalisartut apriilip 18-iani akerliussutsimik takutitsinissaannut akunneq ataasiinnanngortoq isumaqatigiissuteqartoqarpoq: Aalisartut suannut kiilumut 26 koruunimik bonusimullu 1 koruunimik akilerneqartassapput.

Aalisartut taamaalillutik nipisanniarsinnaalernerup aallartinneranit ullut 18-it qaangiuttut nipisanniarsinnaanngulerput.

- Neqeroorut akueraarput, kisianni isumaqatigiissutip naammassinissaanut suli inissitassaqarpugut, Vittus Qujaukitsoq oqarpoq.

Ullumikkut akerliussutsimik takutitsinissap - aallartinnissaanut akunneq ataasiinnanngortoq - taamaalilluni taamaatiinnarneqarpoq.

Royal Greenlandimit akiutinneqartoq nutaaq

Royal Greenlandimmi nipisaat suaasa akii 26 koruunimut kiilumullu koruunik bonusilerlugu qaffanniarlugit nalunaaqutaq ullup qeqqarluinnartoq nalunaarutigaa.

- Uagut, piginnittuttalu nipisaat suanniarneq erngertumik aallartinneqarnissaa kissaatigaarput, taamaammat aalisarneq aallartipallanniarlugu akit qaffanniarlugit maanna nalunaarutigaarput, Royal Greenlnadip pisortaa, Susanne Arfelt Raja-mand, oqarpoq.

Nipisaat suaat pillugit aaqqiagiinnginneq apriilip aallaqqaataani aallartippoq, aamma naak ulluni 60-ini nipisanniartoqarsinnaanera ullormi tassani aallartikkaluartoq.

Royal Greenlandip suannut kiilumut 22 koruunit bonusimullu 1 koruuni neqeroorutigaa. Akili taanna aalisartut kattuffiata KNAPK-p akuerinngilaa. Aaqqiagiinnginnerlu aallartilluni.

Aalisartut tunisinermi akit 5 koruunimik bonusimullu 1 koruunimik tapiissuteqarfigineqarnissaat piumasaraat. Aaqqiagiinnginnerli ulluni 17-ini alloriarfiunngilaq.

Royal Greenland ippassaq allorialaarpoq, taakkumi kiilumut 25 koruunit kiilumullu bonusi 1 koruuni neqeroorutigaa - KNAPK-lli tamanna aamma akuerinngilaa.

Ullumikkut nalunaaqutaq ataatsimut akerliussutsimik takutitsinissaq aalisartut sapaatip akunnerata naanerani aarlerisaarutigisaat atuutsiinnarneqartoq, KNAPK-p siulittaasuata KNR-imut oqaatigaa. Akimi suli appasippallaarpoq.

- Akit akitsoriartorput, taamaammallu pisissutigisinnaasat appasillutik. Inatsisartut ataatsimiittarfiata saanut akerliussutsimik takutitsinissaq pilersaarutaavoq, taanna oqarpoq.

Aaqqiagiinnginneq siorna aallartittoq

Maannali Royal Greenland KNAPK-lu i9mminnut qanillingaaramik qassutit ninginneqarsinnaalerput.

- Royal Greenlandimut isumaqatigiinniarnitsinni piumasaqaatitsinni annertoorujussuaq anguarput. Soorunami aalisarnerup sukkanerpaamik aallartinneqarsinnaanissaa KNAPK-p aalajangiinerani piumasaqaataavoq, Vittus Qujaukitsoq KNR-imut oqarpoq.

Aaqiagiinnginneq siornali aallartippoq. Aalisartullu akitigut aaqqiagiinneq taammarluinnaq pissutigalugu nipisanniarsinnaanerup aallartinneranit sapaatit akunneri pingasut qaangiuttut aatsaat nipisannialerlutik.

Akili siorna allanngortinneqanngilaq - aalisartut kiilumut 22 koruunik akilerneqarput.