Inatsisartut isumaqatigiissutit Danmark peqatigalugu aalajangiiffigisalissagaat, naalakkersuisut isumaqarput – kisianni qaqugumit?
Issittoq aamma Atlantikup Avannaa pillugit illersornissamut isumaqatigiissutip immikkoortuata aappaa tusagassiortunik katersortitsinermi sapaatip akunnerata siuliani sisamanngornermi illersorpaat.
Jens-Frederik Nielsenip (D) Vivian Motzfeldtillu isumaqatiginninniarnernut peqataatitsisoqarnerata amigaataanerarneqarneranut uani akissuteqaqqipput.
Immikkullu soqutiginartunik marlunnik nutaanik saqqummertoqarpoq.
Naalakkersuisummi sakkutooqarnermi pisinnaasanik nutaanik sakkussiornermillu taaguinermi saniatigut namminersorneq pillugu siunissami inatsisissaq aamma qaqinneqarpoq.
Naalakkersuisullu siulittaasuata naalakkersuisoqatigiit sakkutooqarnermi atortussiornissamut nutaamut isumaqatigiissutigineqaqqammertumi ikinnerussuteqartoqaratarsinnaannginnerarpaa.
Taperserneqarnerat qularnartoq
Namminersorneq pillugu inatsit naapertorlugu illersornissaqarneq danskit akisussaaffigaat, taamaammat Kalaallit Nunaata illersorneqarneranut isumaqatigiissutit Folketingip kisimi akuerisartussaavai.
Isumaqatigiissut nutaaq Naalakkersuisunit Inatsisartunut taasititsissutigineqannginnera, Naleqqap siulittaasuata, Pele Brobergip KNR-ikkut isornartorsiorpaa.
- Inatsisartuni tunuliaqutaminnik peqataatitsinissaminnik paasinninnginnerat isornartorsiorparput.
- Taakku (Siumut aamma Inuit Ataqatigiit) isumaqatigiissummut isumaqataanersut isumaqataannginnersulluunniit pillugu nipaatsoqarpoq. Tamanna malunnartorujussuusoq isumaqarpunga.
Vivian Motzfeldtip partiit siulittaasui tamarmik aamma nunanut allanut sillimaniarnermullu ataatsimiititaliaq isumaqatigiissutip imarisaanik paasissutissiissuteqarfigisimallugit aamma partiip siulittaasui isumaqatigiissummut ilassuteqarnissamut periarfissaqartut taakkulu ingerlateqqissimallugit, tusagassiortunik katersortitsinermi oqaatigeqqippaa.
Naleqqalli naalakkersuisoq sallunerarpaa.
KNR-ip Siumut Inuit Ataqatigiillu naalakkersuisut Danmarkimut isumaqatigiissummut tapersiinersut paasiniaaffigai. Taakkuli uterfiginninngillat.
Inatsisartuni taasititsineq
Jens-Frederik Nielsen tusagassiortunik katersortitsinermi oqaaseqartuuvoq.
Taassuma illersornissaqarneq danskit suliassarigaluaraat peqataatitsinerullu amigarnera isornartorsiorneqaraluartoq isumaqatigiissut nutaaq oqaluttuarisaanermi pingaaruteqartuunerarpaa.
- Danskit naalakkersuisuisa akisussaaffigaat. Siusinnerusukkut ajornartorsiutaasut ullumikkut qaangerpagut, illersornissamut isumaqatigiissummut peqataanerput oqaluttuarisaanermi pingaaruteqarpoq, suliaqarnissamummi ilanngunneqarpugut.
Naalakkersuisut Inatsisartut aamma taasitinneqartalernissaat isumaqatigiissutinilu annertuuni soorlu illersornissamut tapersersuisarnissaat anguniarlugu namminersorneq pillugu inatsisip allanngortinneqarnissaa sulissutiginiarpaat?
- Naalakkersuisut tungaaniit partiit allat peqataatinniarsaraagut. Suleqatigiinneq tamanna ineriartorteqqikkusupparput. Danskit naalakkersuisuinut isumaqatigiissuteqartoqassatillugu Inatsisartuni aamma akuersissuteqartoqartarnissaa anguniagaraarput.
Taamaammat Jens-Frederik Nielsenip Issittoq aamma Atlantikup Avannaa pillugit illersornissamut isumaqatigiissutip immikkoortuata aappaa aamma taasititsissutigineqassanersoq erseqqissumik akissuteqarfiginngilaa.
Isumaqatigiissut Inatsisartuni qaqissagussiuk tassanilu amerlanerussuteqartut itigartitsigaluarpata isumaqatigiissut qaqeqqissavisiuk?
- Isumaliutersuuteqarneq oqaluuserineqalaarpoq. Partiit siulittaasuinit tallimanit sisamat isumaqatigiissummik matumani tapersersuipput. Naalakkersuisoqatigiinni imaluunniit naalakkersuisoqatigiinnissamut isumaqatigiissummi allannguisoqarsinnaaneranik eqqarsaateqarnissamut tunngavissaqanngissoraara.
