Bankivik: Taarsigassarsinissaq akikinnerusoq ileqqaagaqarnerulernerlu neriuuteqalersitsisoq
Bankiviup ukiup sisamararterutaasa pingajuanni naatsorsuutit kingulliit tusagassiuutinut nalunaarummi saqqummiuppai.
Ukioq 2025 maannamut naatsorsuutigineqartumit angusarissaarnerusoq, bankip aggustimi paasissutissiissutigaa.
Taamaattumik akileraarutit ilanngaatigereerlugit 210 millionit koruunit 240 millionit koruunillu akornanniit 235 millionit koruuninut 265 millionit koruuninullu ukiumi angusaqarluarniarluni ilavai.
Kalaallit Nunaanni aningaasaqarnikkut siuariartornerup kigaallannissaa naatsorsuutigineqartuarsinnarpoq.
Taama allaffissornermut pisortaaneq Turið F. Arge tusagassiuutinut nalunaarummi paasissutissiivoq.
- Naammaginartunik angusaqarnitta saniatigut aamma sullitatta ingerlalluarnerat siunissarlu pillugu inissisimalluarpasinnerat nuannaarutigaarput, ukiunut siuliinut naleqqiullugu piffissaq aggersoq aningaasaqarnikkut ineriartornerup kigaallannissaa naatsorsuutigineqarmat.
Taarsigassarsinissaq akikinnerusoq
Turið F. Argep ukiup qanoq ingerlasimanera ataatsimut isigalugu maannamut naammagisimaarpaa.
Uninngatitat, taarsigassarsititsinerit, realkreditimillu taarsigassarsititsinerni siuariaateqartoqartoq, pingaarnertut oqaatigaa.
Erniat ukiup ingerlanerani arfineq-marloriarlutik appartinneqarsimanerinik tamanna ilaatigut pissuteqarpoq.
Erniallu appartinneqaraangata taarsigassarsinissaq akikinnerulertarpoq.
Bankiviulli ernianik appaasarnerpassuaqaannarnissaa naatsorsuutiginngilaa. Akerlianik niuerfimmi aalaakkaanerusumik qaffasissuseqarnissaa naatsorsuutigineqartoq paasissutissiissutigaa.
Arlallit ileqqaagaqarnerulissasut
Sullitat ileqqaagaat ataatsimut isigalugu 2025-mi ukiup affaa siulleq 15 procentimik qaffariaateqartut, Bankiviup ukiup aallartisimalernerani paasissutissiissutigaa.
Qaffariaateqartuarallarsinnaassasorlu paasissutissiissutigaat.
Sullitat namminneerlutik netbankikkut ileqqaagaqarfissaminnik maanna pilersitsisinnaalernerinut pissutaasut ilagisinnaavaat.
