Politiit ullormut nalunaarutaat: Tillinniarnerit aserorterinerillu

Narsami utoqqaat illuat ataasinngornermi nalunaaqutaq 10.45 aserorteriffigineqarpoq, Kalaallit Nunaata politiivini sillimasut pisortaat Thomas Jeppsen taama oqarpoq.

- Igalaat marluk aserorneqarsimapput, naluarput qanoq aserorneqarsimanersut, taanna oqarpoq ilassutigalugulu, politiit pasisaqartut sukumiinerusumillu misissuissallutik.

Sillimasut pisortaat qupperarpoq Sisimiunilu pisimasoq oqaluttuaralugu. Sisimiuni pinerluttut kinaassusersineqanngitsut DTU-p eqqaani sikkiliisivimmut parnaaqqasumut iserteriarlutik sikkilit sarfatortut nalituut arlallit tillissimavaat.

- Illoqarfimmi piffissap sivikitsuinnaap ingerlanerani aappassaa  taamatut pisoqarpoq, taamaattumik pisut pillugit ilisimasaqaraanni politiinut iluaqutaasinnasunik, attavigineqarusuttorujussuuvugut.

Kalaallit Nunaanni politiit 70 14 48-mut sianerfigineqarsinnaapput.

Orsussaq benziina 90 literi umiatsiamit tillinneqartoq 

Pisimasoq kingulleq sillimasut pisortaannit oqaatigineqartoq Qasigiannguani ataasinngornermi ualikkut pisimavoq, orsussaq benziina 90 literi umiatsiamit tillinneqarmat. 

- Tillittup atortut assigiinngitsut orsussamut milluaatitut atorneqarsimannguatsiartut sumiiffimmut qimassimavai, sillimasut pisortaat oqarpoq. 

Suliamut tassunga atatillugu tigusarinnittoqarsimanngilaq, politiilli suliaq paasiniaaffigaat.

Naggassiutigalugulu minnerunngitsumilli, Aasianni Nukissiorfiit eqqaani ippassaq ikuallattoqareersorlu, ikuallattoqarsimatilllugu misissuinerit Kalaallit Nunaata Politiivinit ullumi suliarineqassapput.