Nunatta karsia siunissamut piareersarneqassaaq – Innuttaasut maannakkut apersorneqarput

Nuummi Hotel Nordbop kælderiani aaqqissuusseqqinnermut isumalioqatigiissitap siullermik ataatsimiinnissaanut nerriviit hiistit aloqutaatut pingasunngornermi inissinneqarput.

Ilaasortat nunap pisortatigoortumik aaqqissuussaanera ukiut marluk ingerlaneranni eqqartussavaat. Takorluukkat assigiinngitsut saqqummiunneqartassapput, taakkulu politikerit nunap aningaasaqarnikkut ilungersunartuinik aaqqiiniarnermut atorneqarsinnaassapput.

Johnny í Grótinum isumalioqatigiissitami siulittaasuuvoq, Savalimmiunilu Aningaasaqarnermut Siunnersuisoqatigiinni aamma siulittaasuulluni.  

- Una suliassaq annertungaarmat annikigineqarsinnaanngilaq. Taamaattumik suliassamut maniguuttorujussuuvunga, taanna oqarpoq.

- Qulinik ilaasortaqarpugut, tamarmillu assigiinngitsunik piginnaasaqarput. Aaqqiissutissarsiniassagatta qanoq inissisimasoqarnera maannakkut paasiniarparput.

Aaqqissuusseqqinnermut isumalioqatigiissitami ilaasortat aajukua. Saamerlermit: Magni Laksáfoss, Hans Jørgen Mørch, Anne Nivíka Grødem, siulittaasup tullia, Line Mika Skov, Nivi Strunz, Ellen Lerch Høj, Johnny í Grótinum, siulittaasoq, Maliina Junge Jørgensen, Jørgen Aqe Møller. Hilde Singsaas assimi ilaanngilaq. Assi © : Naalakkersuisut

EU Danmarkilu

Naalakkersuisut, Aqqaluaq B. Egedep (IA) aningaasanut naalakkersuisuunerani, nunatta karsiata aaqqissuusseqqinnikkut aamma EU-p Danmarkillu aningaasaliinerisigut annaanneqartariaqarnera oqaatigisimavaat.

Naak EU-mit Danmarkimillu aningaasat pisariaqartinneqaqisut pissarsiarineqartaraluartut, Johnny í Grótinumip politikerit ajornartorsiutit tamakku aningaasanik iluarsineqareersimasutut isumaqalernissaat ernumassutigisinnaallugu oqaatigaa. 

- EU-mit aningaasanik takkuttoqarpat sakkutooqarnermut allanulluunniit aningaasaliisoqarpat, tiguartissutigineqarnissaat ernumanarsinnaavoq, Johnny í Grótinum oqarpoq. 

2027-mut aningaasanut inatsisissatut siunnersuutip saqqummiunneqarnerani, aningaasaqarnermut naalakkersuisup Aqqaluaq B. Egedep (IA) naalakkersuisut allannguutissanut piareersimanerarlugit kingulliullugu oqaatigaa. Assi © : KNR / Markus Valentin

Danmarkimiit EU-miillu aningaasat nunatta karsiata missingersuutaanut nalinginnaasumut immoortinneqartanngikkallarput. 

Paarlattuanilli ilinniartitaanermut, illunik iluarsaassinermut, ilisimatusarnermut, Danmarkimi peqqissartunut, sakkutooqarnermut allanullu atorneqarput. 

Savalimmiut Norgelu

Aningaasaqarneq pillugu nalunaarusiarpaalooreerput. Attassiinnarnissamut Ineriartortitsinissamullu pilersaarut 2 aaqqissuussinissamut sisamanik sammiveqartoq kingullermik saqqummersinneqarpoq.

Naallu aaqqissuusseqqinnerit siunnersuutigineqartut tamarmik erngertumik atuutilersinneqartaluartut nunatta karsia ukiuni qulikkaani tulliattuni suli amigartooruteqassaaq.

Tamanna utoqqaat soraarnerussutisiassaannut aningaasartuuteqarnerunissamik inuusuttullu ikippallaartut suliffeqarnissaannik pissuteqarpoq.

Naalakkersuisut nikerartut nalunaarusiani siunnersuutigineqartunik inatsisiliornissamut pikkorinnerunnginnertik pissutigalugu Inatsisartuni isornartorsiorneqarput.

Suliaqarnerli una siusinnerusumit allaanerusinnaavoq. Johnny í Grótinumip naalakkersuisut Norgemut isumassarsiorsimanerannik nersualaarpai.

Aaqqissuusseqqinnissamut ataatsimiititaliaq namminersortuuvoq, taamaakkaluartorli atorfilinnik aaqqiissutissatut siunnersuutigineqartunik piviusunngortitsinissamik suliaqartussanik allattoqarfeqarluni.

- Nunanut amerlasuunut allanut sanilliullugu tamanna pitsaalluinnartuusoraara, Johnny í Grótinum oqarpoq.

Inuit tusaaneqassasut

Johnny í Grótinumip sulinissap ukiunik marlunnik sivisussusilerneqarsimanera nuannaarutigaa. Savalimmiunimi ingerlariaaserineqarsimasoq misigeqqikkusunngilaa. 

- Savalimmiuni naalakkersuisut siorna aaqqissuusseqqinnermut isumalioqatigiissitaliorput. Taakkulu akissutinik isummanillu saqqummiussipallattartussaapput. Tamanna periuseq eqqortuusorinngilara.  

Isumalioqatigiissitaq aatsaat aallartippoq misissuileruttorlunilu. Taamaattumik Johnny í Grótinumip pisortat aaqqissuuteqqinnissaannut inuiaqatigiit isummersuutissaqarnersut paaserusuppaa. 

- Isumassarsiatsialaanerpaat innuttaasuneerlutillu pisortat ingerlatsiviini sulisuni inuiaqatigiinni atugarissaarnermi nakkutilliisuniillutillu ulluinnarni maluginiagaqartuniipput.

Ataatsimiititaliaq eqimattanik sammisaqarlunilu inuiaqatigiinni ukiup ingerlanerani misissuissaaq.

- Pingaartumik inuusuttni. Taakkumi inuiaqatigiinni uani piffissaq ungasinnerusoq eqqarsaatigalugu najugaqarfigisussaavaat. Taamaammat taakku tusarfigissavagut.

Innuttaasutut siunnersuummik, isumassarsiamik eqqarsaammilluunniit Aaqqissuusseqqinnermut ataatsimiititaliamut nassiussaqarusukkaanni Aningaasaqarnermut Naalakkersuisoqarfiup nittartagaatigut nassiussisoqarsinnaavoq.