Naalakkersuisut Danmarkillu isumaqatigiissut nutaaq qulakkeerpaat: Nunarput imminut napatissinnaanngornissaanut taperserneqassaaq
Nalunaaqutaq 9.30 nutarterneqarpoq ministeriuneq Mette Frederiksen apersorneqarluni.
Kalaallit Nunaata Danmarkillu akornanni isumaqatigiissut oqaluttuarisaanermut pingaarutilik atsiorneqarpoq.
- Qaammatini arlalinni oqaloqatigiinnerup kingorna tunngaviusumik isumaqatigiissuteqartoqarmat nuannaarutigaara, taannalu namminersorneq pillugu inatsimmi siunertanut tapersersuissaaq, naalakkersuisut siulittaasuat Jens-Frederik Nielsen tusagassiuutinut nalunaarummi oqarpoq.
Danmarki 2026-miit 2029-mut 1,6 milliarder koruuninik immikkoortitsissaaq. Taakku ilaatigut mittarfinnut nutaanut, umiarsualiviit iluarsaanneqarnissaannut peqqinnissaqarfimmullu atorneqassapput.
Danmarkimi ministeriuneq Mette Frederiksen aamma oqarpoq Kalaallit Nunaata nukittunerulersinnissaa anguniarlugu naalakkersuisunik qanimut suleqateqartuarnissani qilanaaralugu.
- Isumaqatigiissut Kalaallit Nunaanni atugarissaarnermik aningaasaqarnikkullu ineriartornermik nukittorsaataasussaq ullumi atsiorpara. Isumaqatigiissutip Kalaallit Nunaanniittunut tamanut iluaqutaanissaa ataatsimut anguniagaraarput, ministeriuneq oqarpoq.
Tunissutaarniarfik ammasoq
Aningaasaqarnermut akileraartarnermullu naalakkersuisoq Múte B. Egede aningaasanut inatsisissatut siunnersuut saqqummiunneqarmat KNR-imut oqarpoq naalakkersuisut ataatsimut tapiissutit qaffanniarnagit, akerlianilli immikkoortunut aalajangersimasunut Danmarkimit aningaasanik amerlanerusunik qinnuteqartoqassasoq.
Tamannalu piviusunngorsimarpasippoq.
Kalaallit Danmarkimi napparsimmavinni uninngasarnerinut aningaasartuutit tamaasa Danmarkip siunissami akilertalerumavai.
Aammattaaq Ittoqqortoormiini mittarfiliortoqassaaq Qaqortumilu umiarsualiviliortoqassalluni.
Namminersorlutik Oqartussat inissianik iluarsaassinissamut 2,5 milliard koruuninik kinguaattooqqasut KNR-ip siusinnerusukkut allaaserinikuuaa. Naalakkersuisut tusagassiuutinut nalunaarutaanni allassimavoq ineqarnermut tunngasut aamma ilanngunneqartut – iluarsaassineq nutaanilluunniit sanaartornissaq pineqarnersut itisilerneqanngilaq.
Kalaallit Nunaat imminut napatittoq
Danmarkimiit tapiissutit nutaat Kalaallit Nunaata siunissaq ungasinnerusoq eqqarsaatigalugu imminut napatissinnaanissaanut iluaqutaassasut, Jens-Frederik Nielsen tusagassiuutinut nalunaarummi allappoq.
Assersuutigalugit attaveqarnermut, inuussutissarsiornermik ineriartortitsinermut nukissiuutinillu pilersuinerup isumannaatsuunissaanut aningaasaliinerit.
Isumaqatigiissut tamaat KNR-imiit suli atuarneqanngilaq, qanittukkulli sukumiinerusumik paasissutissiisoqassaaq.
Qallunaat Kalaallit Nunaanni ineriartorluartitsinissamut tapersersuerusuttut, ministeriuneq Mette Frederiksen KNR-imit apersorneqarluni oqarpoq.
- Ajunngitsorpassuarnik aallartitsisoqareerpoq. Imaaliornikkut attaveqarnermut pingaarutilimmut aningaasaliissuteqarpugut, immaqa aamma inuussutissarsiornermik ineriartortitsinissamut, kisiannilu aamma kalaalerpassuarnut pingaaruteqartumut, tassaasoq atugarissaarnissaq peqqinnissarlu.
Mette Frederiksen, aningaasaliinerit uku qallunaat Kalaallit Nunaanni inuiaqatigiinnut siornatigut aningaasaliivallaarsimannginnerannik nassuerutiginninneruppat?
- Pingaarnertut politikkikkut aningaasaliinissamut piumasaqarnermik ersersitsivoq aningaasaliinerunissamillu. Imaanngilarli Danmark siornatigut aningaasaliisimanngimmat, Danmarkimi taamaalioreerpoq, kisiannili anguniagarput suli naammassinngilarput, isumaqarpungalu unammisassarpassuaqartoq erseqqittoq.
- Aamma isumannaallisaanermut politikkimut tunngatillugu nutaami inissisimavugut, tamannalu ingerlanerani Issittoq pillugu isumaqatigiissummik nutaamik suliaqarpugut, Kalaallit Nunaata nukittunerulernissaanut illersornissaanullu iluaqutaasussaq. Taamaattumik suliassaqarfinni assigiinngitsuni arlalinni suliaqarpugut. Tamanna nutaajuvoq isumaqatigiissut annertoorujussuummat isumaqatigiissullu tunngaviusoq ukiuni arlalinni atuuttussaammat, tamannalu nuannaarutigeqaara, Mette Frederiksen oqarpoq.
